సీజేపీ నేత అభిజీత్ దిప్కే దేశవ్యాప్త ప్రచారం ‘క్యా బోల్తీ పబ్లిక్’ ప్రారంభం

కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే ప్రజల సమస్యలను నేరుగా తెలుసుకోవడానికి 'క్యా బోల్తీ పబ్లిక్' (Kya bolti public) అనే దేశవ్యాప్త ప్రచారాన్ని ప్రకటించారు. దేశంలో భరించలేని విధంగా మారిన విద్యా వ్యవస్థ సంస్కరణలే ఈ ప్రచారం యొక్క మొదటి ప్రధాన అజెండా అని ఆయన వెల్లడించారు.

ప్రజలు ఎదుర్కొంటున్న రోజువారీ ఇబ్బందులు, వాస్తవ సమస్యలను క్షేత్రస్థాయిలో తెలుసుకునేందుకు కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే గురువారం రోజున 'క్యా బోల్తీ పబ్లిక్' పేరుతో కొత్త దేశవ్యాప్త ప్రచార కార్యక్రమాన్ని ప్రారంభించారు.

సీజేపీ నేత అభిజీత్ దీప్కే దేశవ్యాప్త ప్రచారం ‘క్యా బోల్తీ పబ్లిక్’ ప్రారంభం (HT_PRINT)

ఈ సందర్భంగా ఆయన మాట్లాడుతూ.. తమ ప్రచారంలో 'విద్యా సంస్కరణలు' (Education Reforms) అనే అంశానికి మొదటి ప్రాధాన్యత ఇస్తున్నట్లు స్పష్టం చేశారు. ప్రస్తుతం దేశంలో విద్య అనేది సామాన్యుడికి అందుబాటులో లేకుండా, అత్యంత ఖరీదైనదిగా మారిపోయిందని ఆందోళన వ్యక్తం చేశారు.

విద్యా రంగాన్ని వ్యాపారంగా మార్చారు: అభిజీత్ దిప్కే

ఈ సందర్భంగా విద్యా విధానం, ఫీజుల దోపిడీపై అభిజీత్ దిప్కే తీవ్ర వ్యాఖ్యలు చేశారు.

భారీ పాఠశాల ఫీజులు: "మొదటి తరగతి (Class 1) చదివించేందుకే ఏటా దాదాపు రూ. 1 లక్ష నుంచి రూ. 2 లక్షల వరకు ఫీజులు వసూలు చేస్తున్నారు. ఇది కాకుండా డొనేషన్ల పేరిట అదనపు బాదుడు కొనసాగుతోంది. అంత ఆదాయం లేని పేద, దిగువ మధ్యతరగతి కుటుంబాలు ఈ డబ్బును ఎక్కడి నుంచి తెస్తాయి?" అని ఆయన ప్రశ్నించారు.

అప్పుల ఊబిలో కుటుంబాలు: కాలేజీ ఫీజులు, కోచింగ్ సెంటర్ల రుసుములు ఆకాశాన్ని తాకుతుండటంతో పిల్లలను చదివించేందుకు తల్లిదండ్రులు భారీగా అప్పులపాలు అవుతున్నారన్నారు. ఈ ఆర్థిక భారం నుంచి కుటుంబాలను విముక్తి చేయడమే తమ పార్టీ ప్రధాన ఉద్దేశమని తెలిపారు.

రాజ్యాంగ హక్కు - వ్యాపారంగా మార్పు: డాక్టర్ బి.ఆర్. అంబేడ్కర్ రాజ్యాంగంలో విద్యను ఒక ప్రాథమిక హక్కుగా (Fundamental Right) అందించారని, కానీ గత కొన్నేళ్లుగా విద్యను కేవలం లాభాలు గడించే ఒక పెద్ద వ్యాపారంగా (Fundamental Business) మార్చేశారని విమర్శించారు.

పిల్లలకు ఉన్నత విద్యను అందించడం తల్లిదండ్రులకు భారం కాకూడదని, విద్య ప్రతి ఒక్కరికీ అందుబాటులో ఉండేలా సమగ్ర మార్పులు తేవడమే తమ ‘క్యా బోల్తీ పబ్లిక్’ ప్రచారం ద్వారా లక్ష్యంగా పెట్టుకున్నామని దిప్కే పేర్కొన్నారు.