అభిజీత్ దిప్కే అమెరికా చదువులకు డబ్బులు ఎక్కడి నుంచి వచ్చాయి?

కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే అమెరికా చదువులకు అయిన ఖర్చులు ఎవరు భరించారు? అంత ఆదాయం ఎక్కడిదంటూ విమర్శలు వచ్చాయి. ఆదాయానికి మించిన ఆస్తుల ఆరోపణల నేపథ్యంలో ఆయన ఈ వివరణ ఇచ్చారు.

కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే అమెరికాలో తన ఉన్నత చదువులకు సంబంధించి వెల్లువెత్తుతున్న ఆర్థిక వ్యవహారాల వివాదంపై స్పందించారు. గుజరాత్‌కు చెందిన ఒక ఆర్‌టిఐ (RTI) కార్యకర్త తన విదేశీ విద్యపై ప్రశ్నలు గుప్పించిన నేపథ్యంలో, బోస్టన్ యూనివర్సిటీ ఇచ్చే మెరిట్ స్కాలర్‌షిప్, ఎడ్యుకేషన్ లోన్ల సహాయంతోనే తన చదువు పూర్తయిందని ఆయన స్పష్టత ఇచ్చారు.

స్కాలర్‌షిప్ పత్రాలు బయటపెట్టిన దిప్కే

కాక్రోచ్ జనతా పార్టీ (CJP) వ్యవస్థాపకుడు అభిజీత్ దిప్కే (HT_PRINT)

కాక్రోచ్ జనతా పార్టీ నేతృత్వంలో ఇటీవలే దేశంలో భారీ స్థాయిలో విద్యార్థుల నిరసన ప్రదర్శనలు జరిగాయి. ఈ క్రమంలో జర్నలిస్ట్ బర్ఖా దత్‌కు ఇచ్చిన ఇంటర్వ్యూలో దిప్కే మాట్లాడుతూ, "నాకు బోస్టన్ విశ్వవిద్యాలయం నుంచి స్కాలర్‌షిప్ వచ్చింది. మిగిలిన ఖర్చుల కోసం విద్యా రుణం తీసుకున్నాను. ఆ రుణాన్ని నేనే తిరిగి చెల్లించాల్సి ఉంది" అని తెలిపారు.

తన మాటలకు ఆధారంగా బోస్టన్ విశ్వవిద్యాలయం జారీ చేసిన అధికారిక స్కాలర్‌షిప్ పత్రాన్ని కూడా ఆయన ప్రదర్శించారు. ఆ డాక్యుమెంట్ ప్రకారం, మాసచుసెట్స్‌లోని బోస్టన్ యూనివర్సిటీ ఆయనకు ఒక్కో సెమిస్టర్‌కు $12,500 చొప్పున మూడు సెమిస్టర్లకు కలిపి మొత్తం $37,500 (సుమారు రూ.31 లక్షలకు పైగా) 'డీన్స్ స్కాలర్‌షిప్' మంజూరు చేసింది.

ఆర్‌టిఐ ఫిర్యాదులతో మొదలైన వివాదం

సూరత్‌కు చెందిన అమృత్ తివారీ అనే ఆర్‌టిఐ కార్యకర్త అభిజీత్ దిప్కే తండ్రి భగవాన్‌రావ్ దిప్కే ఆర్థిక మూలాలపై విచారణ జరపాలని డిమాండ్ చేయడంతో ఈ వ్యవహారం వెలుగులోకి వచ్చింది. మహారాష్ట్ర పారిశ్రామిక అభివృద్ధి సంస్థలో (MIDC) జూనియర్ ఇంజనీర్‌గా పనిచేసే భగవాన్‌రావ్ జీతం నెలకు రూ.60,000 నుంచి రూ.65,000 మాత్రమేనని, ఆ జీతంతో కొడుకును అమెరికా పంపి చదివించడం ఎలా సాధ్యమని ఆయన ప్రశ్నించారు. ఈ మేరకు మహారాష్ట్ర ప్రభుత్వానికి ఫిర్యాదు చేసిన తివారీ, ఆదాయానికి మించిన ఆస్తుల కోణంలో విచారణ జరపాలని కోరారు.

పార్టీ నిధుల వివాదంపై అభిజీత్ దిప్కే స్పందిస్తూ, తమ ఉద్యమానికి ప్రజల నుంచి లభించిన మద్దతునే ప్రధానంగా ప్రస్తావించారు. "మేం రాబోయే రోజుల్లో 'క్రౌడ్ ఫండింగ్' (Crowd-funding) ద్వారా నిధులు సేకరిస్తాం. మా వద్ద ఉన్న ప్రతి రూపాయి వివరాలను అత్యంత పారదర్శకంగా వెల్లడిస్తాం" అని దిప్కే తెలిపారు.

జంతర్ మంతర్ వద్ద జరిగిన ఆందోళనల్లో పాల్గొన్న వారికి సాధారణ ప్రజలే స్వచ్ఛందంగా ఆహారం, మంచి నీరు అందించారని ఆయన చెప్పారు. అలాగే ఢిల్లీ పోలీసుల్లోని కింది స్థాయి సిబ్బంది కూడా తమ పోరాటానికి అంతర్గతంగా మద్దతు తెలిపారని, కొందరు పోలీసులు తమ వద్దకు వచ్చి ఉద్యమానికి కృతజ్ఞతలు తెలిపారని ఆయన వెల్లడించారు.