ఆగస్టు 29న ఏథర్ కోణార్క్ ఈ-స్కూటర్ లాంచ్.. 1 లక్ష కిలోమీటర్ల కఠిన పరీక్షలు

ఎలక్ట్రిక్ ద్విచక్ర వాహన తయారీ సంస్థ ఏథర్ ఎనర్జీ సరికొత్త 'కోణార్క్' ఎలక్ట్రిక్ స్కూటర్‌ను ఆగస్టు 29న మార్కెట్‌లోకి తెచ్చేందుకు సిద్ధమైంది. భారతీయ రహదారుల వాతావరణానికి తట్టుకునేలా దాదాపు 1 లక్ష కిలోమీటర్ల డ్రైవింగ్ అనుభవాన్ని సిమ్యులేట్ చేస్తూ 2,000 రకాల నాణ్యత పరీక్షలు నిర్వహించింది.

ఎలక్ట్రిక్ వాహన విపణిలో తన పట్టును మరింత బలపరిచేందుకు ప్రముఖ ద్విచక్ర వాహన సంస్థ ఏథర్ ఎనర్జీ రంగం సిద్ధం చేసింది. అత్యంత ఆసక్తిగా ఎదురుచూస్తున్న తన కొత్త 'ఏథర్ కోణార్క్' (Ather Konarc) ఎలక్ట్రిక్ స్కూటర్‌ను 2026 ఆగస్టు 29న ఆవిష్కరించనుంది. అయితే, ఈ గ్రాండ్ లాంచ్‌కు ముందే వాహనం నాణ్యత, దార్ఢ్యాన్ని నిరూపించే అత్యంత కఠినమైన టెస్టింగ్ వీడియోను కంపెనీ విడుదల చేసి ఆటోమొబైల్ వర్గాల్లో సంచలనం సృష్టించింది.

1 లక్ష కిలోమీటర్ల డ్రైవింగ్ అనుభవంతో ట్రేస్డ్ పరీక్షలు

ఆగస్టు 29న ఏథర్ కోణార్క్ ఈ-స్కూటర్ లాంచ్.. 1 లక్ష కిలోమీటర్ల కఠిన పరీక్షలు

ఏథర్ సంస్థ ఈ కొత్త స్కూటర్ అభివృద్ధికై దాదాపు 2,000 రకాల విభిన్నమైన రోడ్, మెకానికల్ పరీక్షలను పూర్తి చేసింది. వినియోగదారులు ఏళ్ల తరబడి వాహనాన్ని ఉపయోగించినా దెబ్బతినకుండా ఉండేందుకు ఏకంగా 1 లక్ష కిలోమీటర్లకు పైగా ప్రయాణ వాతావరణాన్ని ప్రత్యేక యంత్రాల ద్వారా సృష్టించి (Simulated) ఈ పరీక్షలు నిర్వహించారు.

భారతీయ రోడ్లపై ఉండే అసంఖ్యాక గుంతలు, ఎత్తైన స్పీడ్ బ్రేకర్లు, విరిగిన కాలిబాటల నుంచి వచ్చే తీవ్రమైన ఒత్తిడిని తట్టుకునేలా స్కూటర్ అండర్‌బాడీని నిరంతరం ఢీకొట్టే కేర్బ్ (Kerb) పరీక్షలు చేపట్టారు. దీనికి తోడు దెబ్బతిన్న రోడ్లపై ప్రయాణించేటప్పుడు హ్యాండిల్ బార్, స్టీరింగ్ సిస్టమ్‌ ఎంతవరకు నిలబడగలదో తేల్చేందుకు ప్రత్యేక రోటేటింగ్ పరికరాలతో నాణ్యతను పరీక్షించారు.

వర్షం, నీటి గండం దాటేలా భద్రతా ప్రమాణాలు

వర్షాకాలంలో ఉండే ప్రతికూల పరిస్థితులు, నిలిచిపోయే నీటిని దృష్టిలో ఉంచుకుని థర్మల్, రెయిన్ అండ్ వాటర్ వేడింగ్ (Water-wading) పరీక్షలు పూర్తి చేశారు. స్కూటర్‌లోని ఎలక్ట్రికల్ పరికరాలు, కంట్రోలర్లు, మోటార్‌లోకి నీరు చేరకుండా భద్రతను నిర్ధారించారు.

వందల కిలోమీటర్ల ప్రయాణంలో వాహనంలో వచ్చే ప్రకంపనాలను (Vibrations) తట్టుకునే సామర్థ్యాన్ని, బ్రేక్ కేబుళ్ల మన్నికను పరిశీలించారు. నిత్యం వాడే కీ-లాక్ సిస్టమ్, సెంటర్ స్టాండ్ వంటి భాగాలను వేలాది సార్లు ఆపరేట్ చేస్తూ నిరంతర వినియోగంలో వాటి దృఢత్వాన్ని పరీక్షించారు. అనుకోకుండా వాహనం కిందపడినా లేదా భారీ లోడ్లు వేసినా బాడీ ప్యానెళ్లు తట్టుకునేలా డ్రాప్, లోడ్ టెస్టులు చేశారు.

కొత్త 'ఈఎల్' ప్లాట్‌ఫామ్.. రూ. 1 లక్షకే బడ్జెట్ ధరలో?

ఈ మోడల్‌ను రూ. 1 లక్ష నుంచి రూ. 1.25 లక్షల అందుబాటు ధరల విభాగంలో మార్కెట్లోకి తెచ్చే అవకాశం ఉందని సమాచారం. బెంగళూరులో ఆగస్టు 29న జరిగే 'ఏథర్ కమ్యూనిటీ డే 2026' కార్యక్రమంలో ఈ స్కూటర్ డిజైన్, బ్యాటరీ ఆప్షన్లు, మైలేజ్/రేంజ్, ఫీచర్లు, ధరలను ప్రకటించనున్నారు. ఆగస్టు 30న ఈ స్కూటర్ ఫస్ట్ రైడ్ రివ్యూను కూడా మీడియాకు నిర్వహించనున్నారు.