భరత్ తివారీ ఎన్‌కౌంటర్: బిహార్ సీఎస్, డీజీపీలకు మానవ హక్కుల కమిషన్ నోటీసులు

భోజ్‌పూర్ జిల్లాలో జరిగిన భరత్ భూషణ్ తివారీ ఎన్‌కౌంటర్ కేసు తీవ్ర సంచలనంగా మారింది. దీనిపై స్పందించిన మానవ హక్కుల కమిషన్ బిహార్ ప్రభుత్వ ప్రధాన కార్యదర్శి, డీజీపీలకు నోటీసులు జారీ చేస్తూ నాలుగు వారాల్లోగా నివేదిక ఇవ్వాలని ఆదేశించింది.

భోజ్‌పూర్ జిల్లా షాపూర్ పరిధిలోని బిలౌతీ గ్రామంలో జరిగిన భరత్ భూషణ్ తివారీ ఎన్‌కౌంటర్ ఉదంతం బిహార్ రాజకీయాన్ని, పోలీస్ శాఖను తీవ్రంగా కుదిపేస్తోంది. ఈ ఘటనపై మానవ హక్కుల కమిషన్ తీవ్రంగా స్పందించింది. బిహార్ ప్రభుత్వ ప్రధాన కార్యదర్శి ప్రత్యయ్ అమృత్, డీజీపీతో పాటు భోజ్‌పూర్ ఎస్ఎస్‌పీలకు కమిషన్ నోటీసులు పంపింది.

నాలుగు వారాల్లోగా పూర్తి నివేదిక ఇవ్వాలి

భరత్ భూషన్ తివారీ ఎన్‌కౌంటర్ కు నిరసనగా జన్ సురాజ్ పార్టీ నిరసనలు (Pappi Sharma)

భరత్ భూషణ్ తివారీ ఎన్‌కౌంటర్ కేసులో విచారణ సాగుతున్న వేళ, బాధితుడి కుటుంబ సభ్యులు న్యాయం కోసం పోరాడుతున్నారు. తమ కుమారుడు పోలీసులకు లొంగిపోయినప్పటికీ ఉద్దేశపూర్వకంగా కాల్చి చంపారని వారు ఆరోపిస్తున్నారు. బాధ్యులైన పోలీస్ అధికారులపై కఠిన చర్యలు తీసుకోవాలని డిమాండ్ చేస్తున్నారు. ఈ నేపథ్యంలో రంగంలోకి దిగిన మానవ హక్కుల కమిషన్, నాలుగు వారాల వ్యవధిలోగా పూర్తి నివేదికను సమర్పించాలని ఉన్నతాధికారులను ఆదేశించింది. సోమవారం నాడు కమిషన్ చైర్మన్ జస్టిస్ ఏఎం బదర్ ఈ మేరకు కీలక ఉత్తర్వులు జారీ చేశారు.

ఫేక్ ఎన్‌కౌంటర్ అంటూ కమిషన్‌కు ఫిర్యాదు

ముజఫర్‌పూర్‌కు చెందిన మానవ హక్కుల న్యాయవాది ఎస్‌కే ఝా జూన్ 20న మానవ హక్కుల కమిషన్‌కు ఈ విషయమై అధికారికంగా ఫిర్యాదు చేశారు. భోజ్‌పూర్ పోలీసులు కావాలనే ఫేక్ ఎన్‌కౌంటర్ చేశారని ఆయన తన ఫిర్యాదులో పేర్కొన్నారు. జూన్ 17న కాశీనాథ్ తివారీ కుమారుడైన భరత్ భూషణ్ తివారీని పోలీసులు ఎన్‌కౌంటర్ చేయడం మానవ హక్కుల తీవ్ర ఉల్లంఘనేనని ఆయన స్పష్టం చేశారు. ఈ మొత్తం వ్యవహారంపై రిటైర్డ్ న్యాయమూర్తితో విచారణ జరిపించాలని, తప్పు చేసిన పోలీసులపై ఎఫ్‌ఐఆర్ నమోదు చేసి చట్టపరమైన చర్యలు తీసుకోవాలని ఆయన కోరారు.

రంగంలోకి విచారణ కమిషన్, ఎఫ్‌ఎస్‌ఎల్ బృందాలు

విధి నిర్వహణలో నిర్లక్ష్యం వహించినందుకు గానూ ఒక ఎస్‌హెచ్వో, ఇద్దరు సబ్ ఇన్‌స్పెక్టర్లు, ఒక ఏఎస్ఐ, ఒక కానిస్టేబుల్‌ను సస్పెండ్ చేసినట్లు ఏడీజీ ధృవీకరించారు. జూన్ 16న నిందితుడిని అదుపులోకి తీసుకునే సమయంలో పోలీసులు సరైన పద్ధతి అనుసరించలేదని, ఆ వీడియో సామాజిక మాధ్యమాల్లో వైరల్ అయిందని ఆయన అంగీకరించారు. "ఎన్‌కౌంటర్‌ను మేమెప్పుడూ ఒక గొప్ప విజయంగా భావించం. కానీ పోలీసుల ప్రాణాలకే ముప్పు పొంచి ఉన్నప్పుడు, ఆత్మరక్షణ కోసం కాల్పులు జరపాల్సి వస్తుంది. ఆ క్రమంలోనే ఎదుటి వ్యక్తికి బుల్లెట్లు తగులుతాయి. ప్రస్తుతానికి ఈ వ్యవహారం జ్యుడీషియల్ కమిషన్ పరిధిలో ఉన్నందున పోలీస్ శాఖ తరఫున మరిన్ని వ్యాఖ్యలు చేయడం సరికాదు" అని సుధాంశు కుమార్ స్పష్టం చేశారు.