ఏడాది పాటు ChatGPT Go ఫ్రీ.. ఫ్రీ.. ఫ్రీ! భారతీయులకే ఈ బంపర్​ ఆఫర్​..

చాట్​జీపీటీ గో సబ్‌స్క్రిప్షన్ ఏడాది పాటు ఉచితంగా లభించనుంది! భారతీయలకు ప్రత్యేకంగా ఈ బంపర్​ ఆఫర్​ని ప్రకటించింది ఓపెన్​ఏఐ. అయితే, ఇందుకు రిజిస్ట్రేషన్​ మాత్రం త్వరలోనే చేసుకోవాల్సి ఉంటుంది! పూర్తి వివరాల్లోకి వెళితే..

శామ్ ఆల్ట్‌మన్ నేతృత్వంలోని ఓపెన్‌ఏఐ కంపెనీ భారతీయ వినియోగదారుల కోసం భారీ ఆఫర్‌ను ప్రకటించింది! నవంబర్ 4 నుంచి ప్రారంభమయ్యే పరిమిత కాల ప్రమోషనల్ పీరియడ్‌లో రిజిస్టర్ చేసుకున్న వారికి ChatGPT Go సబ్‌స్క్రిప్షన్‌ను ఒక సంవత్సరం పాటు ఉచితంగా అందిస్తున్నట్లు వెల్లడించింది.

ఉచితంగా చాట్​జీపీటీ గో..

భారత్‌లో తొలిసారిగా బెంగళూరులో కంపెనీ నిర్వహించనున్న 'దేవ్​డే' ఈవెంట్‌కు ముందు ఓపెన్​ఏఐ ఈ నిర్ణయం తీసుకోవడం విశేషం. ఈ ఆఫర్ కొత్త యూజర్లకు, ఇప్పటికే చాట్​జీపీటీ గో సబ్‌స్క్రైబర్‌లకు కూడా అందుబాటులో ఉంటుంది. ఇప్పటికే సబ్‌స్క్రైబ్ చేసుకున్న వారికి అదనంగా 12 నెలల ఉచిత సేవలు లభిస్తాయి!

చాట్​జీపీటీ గో ద్వారా లభించే ప్రయోజనాలేంటి?

అధునాతన ఏఐ (ఏఐ) టూల్స్‌ను మరింత అందుబాటులోకి తీసుకురావాలని వినియోగదారులు కోరిన నేపథ్యంలో, వారి ఫీడ్‌బ్యాక్ ఆధారంగా చాట్​జీపీటీ గో సబ్‌స్క్రిప్షన్ ప్లాన్‌ను ఓపెన్‌ఏఐ గత ఆగస్టులో భారత్‌లో, తక్కువ ధరకే (నెలకు రూ. 399) ప్రారంభించింది.

ఈ ప్లాన్ ద్వారా వినియోగదారులు అధిక మెసేజ్ పరిమితులు, ఇమేజ్ జనరేషన్ (చిత్రాలను రూపొందించడం), ఫైల్ అప్‌లోడ్ వంటి సామర్థ్యాలను పొందవచ్చు. ఇది రోజువారీ, వృత్తిపరమైన అవసరాలకు అనువుగా ఉంటుంది.

ఓపెన్‌ఏఐ తెలిపిన వివరాల ప్రకారం.. చాట్​జీపీటీ గోను ప్రారంభించిన మొదటి మార్కెట్లలో భారతదేశం ఒకటి. ఇది ఈ ప్రాంతంపై కంపెనీకి పెరుగుతున్న దృష్టిని తెలియజేస్తుంది. లాంచ్ అయిన మొదటి నెలలోనే, భారతదేశంలో చెల్లింపు సబ్‌స్క్రైబర్‌ల సంఖ్య రెట్టింపు అయ్యింది! దీంతో ఓపెన్‌ఏఐ ఈ ప్లాన్‌ను ప్రపంచవ్యాప్తంగా దాదాపు 90 మార్కెట్‌లకు విస్తరించింది.

ప్రపంచంలోనే అతిపెద్ద మార్కెట్లలో భారత్!

భారతదేశం తమకు రెండొవ అతిపెద్ద, వేగంగా అభివృద్ధి చెందుతున్న వినియోగదారుల బేస్​లో ఒకటిగా ఉందని ఓపెన్​ఏఐ పేర్కొంది. డెవలపర్లు, విద్యార్థులు, నిపుణులతో సహా లక్షలాది మంది ప్రజలు ప్రతిరోజూ చాట్​జీపీటీని ఉపయోగిస్తున్నారు.

"ఈ ప్రమోషన్ ఓపెన్‌ఏఐ'ఇండియా-ఫస్ట్' నిబద్ధతకు కొనసాగింపు. ఇది ఇండియాఏఐ మిషన్​కి మద్దతు ఇస్తుంది. వచ్చే ఏడాది ఏఐ ఇంపాక్ట్ సమ్మిట్‌కు దేశం సన్నద్ధమవుతున్న తరుణంలో, భారతదేశంలో ఏఐ చుట్టూ పెరుగుతున్న వేగాన్ని ఈ చర్య మరింత బలోపేతం చేస్తుంది," అని కంపెనీ ఒక ప్రకటనలో తెలిపింది.

ఓపెన్‌ఏఐ వైస్ ప్రెసిడెంట్, చాట్​జీపీటీ హెడ్ నిక్ టర్లీ మాట్లాడుతూ.. భారతదేశంలో చాట్​జీపీటీ గో ప్రారంభించినప్పటి నుంచి వచ్చిన ఉత్సాహపూరిత స్పందన తమను ప్రోత్సహించిందని చెప్పారు.

"కొన్ని నెలల క్రితం భారతదేశంలో చాట్​జీపీటీ గోను ప్రారంభించినప్పటి నుంచి, మా వినియోగదారుల నుంచి వచ్చిన ఆదరణ, సృజనాత్మకత మాకు స్ఫూర్తినిచ్చాయి," అని టర్లీ అన్నారు. "భారత్‌లో మా మొదటి దేవ్​డే ఎక్స్​ఛేంజ్​ ఈవెంట్ సందర్భంగా, దేశవ్యాప్తంగా ఎక్కువ మంది ప్రజలు ఈ అధునాతన ఏఐ సేవలను సులభంగా యాక్సెస్ చేయడానికి, ప్రయోజనం పొందడానికి వీలుగా చాట్​జీపీటీ గోను ఏడాది పాటు ఉచితంగా అందిస్తున్నాము," అని తెలిపారు.