ఈ100 కార్లకు గ్రీన్ సిగ్నల్: 100 శాతం ఇథనాల్‌పై కేంద్రం కీలక నిబంధనలు

100 శాతం ఇథనాల్‌తో నడిచే ఈ100 ఫ్లెక్స్ ఫ్యూయల్ కార్లకు కేంద్ర రవాణా శాఖ పచ్చజెండా ఊపింది. ఈ మేరకు మోటార్ వాహనాల నిబంధనలకు కీలక సవరణలు చేసింది. విదేశీ ముడి చమురు దిగుమతులు తగ్గించడమే లక్ష్యంగా తెచ్చిన ఈ కొత్త రూల్స్ వివరాలు ఇవే.

విదేశీ ముడి చమురు దిగుమతుల భారాన్ని తగ్గించుకుంటూ ప్రత్యామ్నాయ ఇంధనాలను ప్రోత్సహించే దిశగా కేంద్ర ప్రభుత్వం మరో కీలక అడుగు వేసింది. 100 శాతం ఇథనాల్ లేదా పెట్రోల్‌తో కలిపిన ఇథనాల్ మిశ్రమంతో నడిచే 'ఫ్లెక్స్ ఫ్యూయల్' (ఈ100) వాహనాల తయారీ, వినియోగానికి దారి సుగమం చేస్తూ కేంద్ర రోడ్డు రవాణా, రహదారుల మంత్రిత్వ శాఖ (మోర్త్) నోటిఫికేషన్ విడుదల చేసింది. ఇందుకోసం కేంద్ర మోటార్ వాహనాల నిబంధనలకు కీలక సవరణలు చేపట్టింది.

సాధారణ కార్లలో ఇథనాల్ వాడొచ్చా?

ఈ100 కార్లకు గ్రీన్ సిగ్నల్: 100 శాతం ఇథనాల్‌పై కేంద్రం కీలక నిబంధనలు

ఉన్నత స్థాయి ఇథనాల్ మిశ్రమాల వినియోగంపై ప్రభుత్వం స్పష్టమైన మార్గదర్శకాలు ఇచ్చింది. "ఈ20 (20 శాతం ఇథనాల్) కంటే ఎక్కువ మోతాదు ఉన్న ఇంధనాలు లేదా ఈ100 ఇంధనం కేవలం వాటి కోసం ప్రత్యేకంగా రూపకల్పన చేసి, ధృవీకరించిన ఫ్లెక్స్ ఫ్యూయల్ వాహనాల్లో మాత్రమే వాడాలి" అని రవాణా మంత్రిత్వ శాఖ సీనియర్ అధికారి స్పష్టం చేశారు. సాధారణ పెట్రోల్ లేదా ఈ20 ఇంధనానికి మాత్రమే అనుమతి ఉన్న వాహనాల్లో ఈ85 లేదా ఈ100 ఇంధనాలు పోస్తే ఇంజన్లు దెబ్బతినే ప్రమాదం ఉందన్నారు.

సాంకేతిక ప్రమాణాలు.. బరువు పరిమితి పెంపు

కేంద్రం తెచ్చిన నూతన నిబంధనల ప్రకారం వాహనాల వర్గీకరణ, ఉద్గారాల (ఎమిషన్స్) పరీక్షలకు సంబంధించి సాంకేతిక ప్రమాణాలను సవరించారు. తేలికపాటి పెట్రోల్, డీజిల్ వాహనాల బరువు పరిమితిని ఇప్పటివరకు ఉన్న 3,000 కిలోల నుంచి 3,500 కిలోలకు పెంచారు. దేశంలో పెరుగుతున్న ప్రత్యామ్నాయ ఇంధన వాహనాల తయారీకి అనుగుణంగా చట్టబద్ధ నిబంధనలను నవీకరించడమే ఈ మార్పుల ముఖ్య ఉద్దేశం.

రేసులో మారుతీ సుజుకీ, టయోటా, టాటా

దేశంలోనే తొలి ఫ్లెక్స్ ఫ్యూయల్ ప్రయాణీకుల కారుగా 'వాగన్ ఆర్ ఫ్లెక్స్ ఫ్యూయల్' మోడల్‌ను 2026 జూన్‌లో మారుతీ సుజుకీ సంస్థ ఆవిష్కరించింది. ఈ కారు ఈ20 నుంచి ఈ100 వరకు ఉన్న ఎలాంటి ఇంధన మిశ్రమాన్నైనా తట్టుకుని నడుస్తుంది. సాధారణ పెట్రోల్ వాహనాలతో పోలిస్తే ఫ్లెక్స్ ఫ్యూయల్ కార్లలో ప్రత్యేకమైన ఇంజన్ విడిభాగాలు, ఫ్యూయల్ సిస్టమ్, ఎలక్ట్రానిక్ కంట్రోల్స్ ఉంటాయి.

భారతదేశ ఇంధన అవసరాల్లో ఎక్కువ భాగం విదేశీ ముడి చమురు దిగుమతులపైనే ఆధారపడి ఉంది. దీనివల్ల విదేశీ మారక ద్రవ్యంపై తీవ్ర ఒత్తిడి పడుతోంది. ఇప్పటికే 20 శాతం ఇథనాల్ కలిపిన ఈ20 పెట్రోల్‌ను దేశవ్యాప్తంగా అందుబాటులోకి తెచ్చారు. ఇథనాల్ వాడకం పెరిగితే స్వదేశీ జీవ ఇంధన రంగానికి (బయో ఫ్యూయల్స్) ఊతం లభించడమే కాకుండా రవాణా రంగానికి ఇంధన భద్రత చేకూరుతుంది.

పశ్చిమాసియాలో నిరంతరం నెలకొంటున్న భౌగోళిక రాజకీయ ఉద్రిక్తతల వల్ల చమురు సరఫరాకు విఘాతం కలగడం, ధరలు విపరీతంగా పెరగడం వంటి ముప్పులను తట్టుకోవడానికి ఇది ఎంతో దోహదపడుతుంది. గతంలో ఈ85, ఈ100, బి100 బయోడీజిల్, హైడ్రోజన్ సిఎన్‌జి (H-CNG) ఇంధనాలపై మోర్త్ ఇచ్చిన ముసాయిదా ప్రతిపాదనల ఆధారంగానే తాజాగా నిబంధనలను ఖరారు చేశారు. ఫ్యూయల్ స్టేషన్లలో ఈ ఇంధనాల లభ్యత పెరిగే కొద్దీ ఫ్లెక్స్ ఫ్యూయల్ వాహనాల వాడకం వేగవంతం కానుంది.