జొమాటో, స్విగ్గీలకు ఫ్లిప్‌కార్ట్ సవాల్: త్వరలో ‘ఈట్-ఇన్ బై మినిట్స్’

భారత ఫుడ్ డెలివరీ రంగంలోకి ఈ-కామర్స్ దిగ్గజం ఫ్లిప్‌కార్ట్ అడుగుపెడుతోంది. 'ఈట్-ఇన్ బై మినిట్స్' పేరుతో సరికొత్త సేవలను అక్టోబర్ ముగిసేనాటికి అందుబాటులోకి తెచ్చేందుకు సిద్ధమవుతోంది. తక్కువ కమిషన్ మోడల్‌తో జొమాటో, స్విగ్గీలకు గట్టి పోటీ ఇచ్చేందుకు ప్రణాళికలు రచిస్తోంది.

దేశీయ ఫుడ్ డెలివరీ రంగంలో ఏకాధిపత్యాన్ని చెలాయిస్తున్న జొమాటో, స్విగ్గీలకు సవాల్ విసిరేందుకు ఈ-కామర్స్ దిగ్గజం ఫ్లిప్‌కార్ట్ సిద్ధమైంది. 'ఈట్-ఇన్ బై మినిట్స్' (Eat-in by Minutes) పేరుతో త్వరలోనే ఫుడ్ డెలివరీ సేవలను ప్రారంభించబోతోంది. అక్టోబర్ 2026 ముగిసేనాటికి సాధారణ వినియోగదారులకు ఈ సేవలను అందుబాటులోకి తెచ్చేందుకు కసరత్తు చేస్తోంది. ఇందుకోసం బెంగళూరులోని తన ప్రధాన కార్యాలయంలో పనిచేసే దాదాపు 8,000 మంది ఉద్యోగులతో అంతర్గత పరీక్షలు (Internal Trials) శరవేగంగా నిర్వహిస్తోంది.

జొమాటో, స్విగ్గీలకు ఫ్లిప్‌కార్ట్ సవాల్: త్వరలో ‘ఈట్-ఇన్ బై మినిట్స్’

ఈ ఏడాది జులైలో ఫ్లిప్‌కార్ట్ గ్రూప్ సీఈఓ కల్యాణ్ కృష్ణమూర్తి సూచనప్రాయంగా ప్రకటించిన ఫుడ్ డెలివరీ ప్రణాళికలు ఇప్పుడు ఆచరణ రూపం దాలుస్తున్నాయి. ఫ్లిప్‌కార్ట్ యాప్‌లోనే ట్రావెల్, క్విక్ కామర్స్ 'మినిట్స్' విభాగంతో పాటు ఈ ఫుడ్ డెలివరీ కోసం ప్రత్యేకంగా ఒక ట్యాబ్‌ను కేటాయించనున్నారు.

ఓఎన్‌డీసీ, ఈకార్ట్ భాగస్వామ్యంతో సేవలు

బెంగళూరు ప్రధాన కార్యాలయంలో జరుగుతున్న ప్రయోగాల్లో భాగంగా ఓఎన్‌డీసీ (ONDC) నెట్‌వర్క్‌లోని రెస్టారెంట్లతో పాటు, ఫ్లిప్‌కార్ట్‌తో నేరుగా ఒప్పందం కుదుర్చుకున్న హోటళ్లను భాగస్వామ్యం చేశారు. లాజిస్టిక్స్ రంగంలో తనకు ఉన్న అనుభవాన్ని ఉపయోగించుకుంటూ, సొంత డెలివరీ సంస్థ 'ఈకార్ట్' (Ekart) ద్వారా ఆహారాన్ని కస్టమర్లకు చేరవేసేందుకు ఏర్పాట్లు చేస్తున్నారు. బెంగళూరు వీధుల్లో 'ఈట్-ఇన్ బై మినిట్స్' లోగో ఉన్న టీ-షర్టులతో డెలివరీ బాయ్స్ ఇప్పటికే కనిపిస్తున్నారు.

నేషనల్ రెస్టారెంట్ అసోసియేషన్ ఆఫ్ ఇండియా (NRAI) అధ్యక్షుడు సాగర్ దరియాని తెలిపిన వివరాల ప్రకారం.. అక్టోబర్ చివరినాటికి రెస్టారెంట్ సేవలు ప్రత్యక్షంగా అందుబాటులోకి వస్తాయి. 2026 చివరినాటికి దేశంలోని ప్రధాన 5 నుంచి 6 నగరాలకు ఈ సేవలను విస్తరించాలని ఫ్లిప్‌కార్ట్ లక్ష్యంగా పెట్టుకుంది.

రెస్టారెంట్లకు తక్కువ కమిషన్ భారం

ఫుడ్ డెలివరీ రంగంలోకి ఫ్లిప్‌కార్ట్ ప్రవేశం రెస్టారెంట్ యజమానులకు పెద్ద ఊరటనిచ్చే అవకాశం ఉంది. ప్రస్తుతం మార్కెట్‌ను శాసిస్తున్న జొమాటో, స్విగ్గీలు ఒక్కో ఆర్డర్‌పై రెస్టారెంట్ల నుంచి 20 నుంచి 25 శాతం వరకు కమిషన్ వసూలు చేస్తున్నాయి. ప్రకటనలు, డిస్కౌంట్లు, ప్రమోషన్లతో కలిపి మొత్తం ఖర్చు ఆర్డర్ విలువలో 40 నుంచి 50 శాతానికి చేరుతోంది.

అయితే ఫ్లిప్‌కార్ట్ కేవలం 10 శాతం ప్రాథమిక కమిషన్‌తో (Base Commission) సేవలందించేందుకు సిద్ధమైంది. ఇతర ప్రమోషన్ ఖర్చులను కలిపినా మొత్తం భారం 15 నుంచి 16 శాతానికే పరిమితమవుతుందని సాగర్ దరియాని వివరించారు. దీనివల్ల రెస్టారెంట్ల ఆదాయం గణనీయంగా పెరిగే అవకాశం ఉంది.

మరోవైపు, ఆర్డర్‌కు రూ.20 నుంచి రూ.30 వరకు పొదుపు చేసే సామర్థ్యం ఉన్నప్పటికీ, కేవలం తక్కువ కమిషన్ కారణంగానే వినియోగదారులు పాత ప్లాట్‌ఫామ్‌లను వదిలి కొత్త దానికి మారతారని కచ్చితంగా చెప్పలేమని ప్రముఖ బ్రోకరేజ్ సంస్థ 'బెర్న్‌స్టీన్' విశ్లేషించింది.

దిగ్గజాలకు పోటీ ఇవ్వగలదా?

భారత ఫుడ్ డెలివరీ మార్కెట్‌లో జొమాటో, స్విగ్గీలదే పూర్తి ఆధిపత్యం. 'కెన్ రీసెర్చ్' (Ken Research) అంచనాల ప్రకారం 2024లో ఫుడ్ డెలివరీ మార్కెట్‌లో జొమాటో 58 శాతం వాటాతో అగ్రస్థానంలో ఉండగా, స్విగ్గీ 34 శాతం వాటాను కలిగి ఉంది.

ఇప్పటికే జీరో-కమిషన్ మోడల్‌తో పనిచేస్తున్న రాపిడో 'ఓన్లీ' (Ownly) సేవలు, స్విగ్గీ బడ్జెట్ సేవ 'టోయింగ్' (Toing) వంటివి మార్కెట్‌లో ఉన్నప్పటికీ, ఫ్లిప్‌కార్ట్‌కు ఉన్న విశాలమైన వినియోగదారుల పునాది (Customer Base), బలమైన ఈ-కామర్స్ వ్యవస్థ, క్విక్-కామర్స్ నెట్‌వర్క్ దీనికి అదనపు బలంగా మారనున్నాయి.