పాలే లేకుండా పనీర్ తయారీ.. అనలాగ్ అమ్మకాలపై నిషేధం.. ఎఫ్ఎస్ఎస్ఏఐ కీలక ప్రతిపాదనలు

పాల పదార్థాలు లేకుండా తయారుచేసే అనలాగ్ ఉత్పత్తులను 'పనీర్' పేరిట విక్రయించడంపై భారత ఆహార భద్రత, ప్రమాణాల ప్రాధికార సంస్థ (ఎఫ్‌ఎస్‌ఎస్‌ఏఐ) నిషేధం విధించేందుకు సిద్ధమైంది. నకిలీ పనీర్ ఉత్పత్తులతో వినియోగదారులు మోసపోకుండా నిరోధించేందుకు ఈ నూతన మార్గదర్శకాలను ప్రతిపాదించింది.

మార్కెట్లో లభించే కృత్రిమ లేదా ప్రత్యామ్నాయ పనీర్ ఉత్పత్తులకు అడ్డుకట్ట వేసేందుకు కేంద్ర ఆహార భద్రత, ప్రమాణాల ప్రాధికార సంస్థ (ఎఫ్‌ఎస్‌ఎస్‌ఏఐ) సంచలన నిర్ణయం తీసుకుంది. పాలు, పాల ఉత్పత్తులు కాకుండా వంట నూనెలు, పిండి పదార్థాలతో తయారుచేసే 'అనలాగ్ పనీర్'ను ఇకపై 'పనీర్' అనే పేరుతో విక్రయించకూడదని ప్రతిపాదించింది. ఈ మేరకు ఆహార భద్రత, ప్రమాణాల (అమ్మకాల నిషేధం, నియంత్రణ) నిబంధనలు - 2011కు సవరణలు చేస్తూ ముసాయిదా నోటిఫికేషన్‌ను విడుదల చేసింది.

పాలే లేకుండా పనీర్ తయారీ.. అనలాగ్ పనీర్ అమ్మకాలపై నిషేధం.. ఎఫ్ఎస్ఎస్ఏఐ కీలక ప్రతిపాదనలు

అనలాగ్ పనీర్ అంటే ఏమిటి?

పనీర్ అనగానే స్వచ్ఛమైన పాలు, వాటిలోని వెన్న, ప్రొటీన్లతో తయారు చేసే ఆహార పదార్థం గుర్తుకొస్తుంది. అయితే, అనలాగ్ పనీర్‌లో ఎలాంటి పాల ఉత్పత్తులను వాడరు. పాల కొవ్వులు, ప్రొటీన్ల స్థానంలో కూరగాయల నూనెలు (వెజిటబుల్ ఆయిల్స్), పిండి (స్టార్చ్), ప్లాంట్ ప్రొటీన్లు, ఎమల్సిఫైయర్లు, ఇతర రసాయనాలను ఉపయోగిస్తారు. చూడటానికి, తాకడానికి, రుచికి ఇది అచ్చం అసలైన పనీర్‌లాగే ఉంటుంది. దీంతో సాధారణ వినియోగదారులు అసలైన పనీర్‌కు, అనలాగ్ పనీర్‌కు మధ్య తేడాను గుర్తించలేక మోసపోతున్నారు.

ఎఫ్‌ఎస్‌ఎస్‌ఏఐ ప్రతిపాదించిన నియమాలు

ఇప్పటికే 'అనలోగ్ ఇన్ డైరీ కాంటెక్స్ట్' కేటగిరీ కింద లైసెన్స్ లేదా రిజిస్ట్రేషన్ పొందిన ఉత్పత్తులు తమ పేరులో, లేబులింగ్‌లో లేదా మార్కెటింగ్‌లో 'పనీర్' అనే పదాన్ని వాడటాన్ని తక్షణమే నిలిపివేయాలని ఎఫ్‌ఎస్‌ఎస్‌ఏఐ స్పష్టం చేసింది. ఆహార భద్రత, ప్రమాణాల చట్టం 2006లోని సెక్షన్ 92(2) ప్రకారం ఈ ప్రతిపాదనను సిద్ధం చేశారు.

ఈ ప్రతిపాదనపై ప్రజలు, పారిశ్రామికవేత్తలు తమ అభ్యంతరాలు, సూచనలను 60 రోజుల్లోగా పంపవచ్చని పేర్కొంది. న్యూఢిల్లీలోని ఎఫ్‌ఎస్‌ఎస్‌ఏఐ కార్యాలయానికి రాతపూర్వకంగా గానీ, regulation@fssai.gov.in ఈమెయిల్ ద్వారా గానీ తమ అభిప్రాయాలను తెలియజేయవచ్చని సూచించింది.

రాష్ట్రాల ఆంక్షలు.. జొమాటో నిర్ణయం

వినియోగదారుల ఆరోగ్యాన్ని కాపాడేందుకు ఇప్పటికే మహారాష్ట్ర, కర్ణాటక, మధ్యప్రదేశ్, గుజరాత్, ఛత్తీస్‌గఢ్, ఉత్తరాఖండ్, హిమాచల్ ప్రదేశ్ వంటి పలు రాష్ట్రాలు అనలాగ్ పనీర్ తయారీ, విక్రయాలపై ఆంక్షలు విధించాయి. హోటళ్లు, రెస్టారెంట్లు తాము అందించే వంటకాల తయారీలో అనలాగ్ పనీర్ ఉపయోగిస్తే ఆ విషయాన్ని కస్టమర్లకు స్పష్టంగా తెలియజేయాలని అధికారులు హెచ్చరించారు.

మరోవైపు ప్రముఖ ఫుడ్ డెలివరీ యాప్ జొమాటో కూడా దీనిపై కఠిన వైఖరి అవలంబించింది. తమ ప్లాట్‌ఫామ్‌లోని రెస్టారెంట్లు అనలాగ్ పనీర్ వంటకాలను 'పనీర్' పేరుతో విక్రయిస్తే జీరో టాలరెన్స్ విధానాన్ని అమలు చేస్తామని, అటువంటి రెస్టారెంట్లను యాప్ నుంచి తొలగిస్తామని స్పష్టం చేసింది. ఇప్పటికే అలాంటి ఉత్పత్తులను విక్రయిస్తున్నట్లు ప్రకటించిన రెస్టారెంట్ల వంటకాలను తమ మెనూల నుంచి తొలగించింది.

కస్టమర్లు తాము ఏం తింటున్నారో స్పష్టంగా తెలుసుకునే హక్కు వారికి ఉందని, ఆహార రంగంలో పారదర్శకత పెంచడమే లక్ష్యంగా ఈ చర్యలు తీసుకుంటున్నట్లు ఎఫ్‌ఎస్‌ఎస్‌ఏఐ అధికారులు వెల్లడించారు.