ఐపీఓ తర్వాత భారీగా పెరిగిన Groww స్టాక్​.. ఇప్పుడు కొనొచ్చా? లేక అమ్మేయాలా?

ప్రముఖ బ్రోకరేజ్ సంస్థ జెఫరీస్ సానుకూల నివేదికతో గ్రో (Groww) షేరు ధర సోమవారం ట్రేడింగ్‌లో 6.5% పెరిగింది. కంపెనీ క్లయింట్ల సంఖ్య, కొత్త వ్యాపారాలు మరియు లాభాల మార్జిన్ పెరిగే అవకాశం ఉందని విశ్లేషకులు భావిస్తున్నారు.

దేశీయ స్టాక్ మార్కెట్​లో ఆన్‌లైన్ బ్రోకింగ్ దిగ్గజం 'గ్రో' (Groww) షేర్ల జోరు కొనసాగుతోంది. గ్లోబల్ బ్రోకరేజ్ సంస్థ జెఫరీస్ ఈ స్టాక్‌పై బుల్లిష్‌గా ఉండటంతో సోమవారం దలాల్ స్ట్రీట్‌లో ఈ షేరు ధర ఒకానొక సమయంలో 6.5% మేర ఎగబాకింది. బెంగళూరు కేంద్రంగా పనిచేసే ఈ సంస్థ వృద్ధి అవకాశాలు మెరుగ్గా ఉన్నాయని పేర్కొంటూ జెఫరీస్ తన కవరేజీని ప్రారంభించింది.

భారీగా పెరిగిన గ్రో స్టాక్​- ఇప్పుడు కొనొచ్చా? (Bloomberg)

లిస్టింగ్ అయినప్పటి నుంచి గ్రో షేరు ఇప్పటికే 72% పెరిగింది. రూ. 100 ఇష్యూ ధరతో పోలిస్తే ప్రస్తుతం దాదాపు రెట్టింపు ధర వద్ద ట్రేడ్ అవుతోంది. మరి ఈ గ్రో స్టాక్​ని ఇప్పుడు కొనాలా? అమ్మేయాలా? లేక హోల్డ్​ చేయాలా? నిపుణులు ఏమంటున్నారంటే..

గ్రో షేర్​ ప్రైజ్​ టార్గెట్..

గ్రో షేరుకు జెఫరీస్ రూ. 180 టార్గెట్ ధరను నిర్ణయించింది! ఇది శుక్రవారం నాటి ముగింపు ధరతో పోలిస్తే దాదాపు 12% పెరుగుదలను సూచిస్తోంది. 2026-28 ఆర్థిక సంవత్సరాల మధ్య కాలంలో కంపెనీ ప్రతి షేరుపై వచ్చే సంపాదన (ఈపీఎస్​) 35% వార్షిక వృద్ధిని నమోదు చేయవచ్చని విశ్లేషకులు అంచనా వేస్తున్నారు.

గ్రో షేర్​ ప్రైజ్​- జెఫరీస్ విశ్లేషణ ఏంటి?

గ్రో సంస్థ తన బ్రోకింగ్ వ్యాపారాన్ని కేవలం 2021 ఆర్థిక సంవత్సరంలోనే ప్రారంభించినప్పటికీ, అతి తక్కువ కాలంలోనే దేశంలో అత్యధిక యాక్టివ్ క్లయింట్లు ఉన్న బ్రోకర్‌గా ఎదిగిందని జెఫరీస్ ప్రశంసించింది.

"మార్కెట్​లో 26% వాటాతో గ్రో దూసుకెళుతోంది. తన దరిదాపుల్లో ఉన్న ఇతర సంస్థల కంటే ఇది ఎంతో ముందుంది. మ్యూచువల్ ఫండ్ల ద్వారా వచ్చే కస్టమర్లను బ్రోకింగ్ వైపు మళ్లించడంలో, మొబైల్ యూజర్లకు అద్భుతమైన ఎక్స్​పీరియెన్స్​ని అందించడంలో ఈ సంస్థ సక్సెస్ అయ్యింది," అని జెఫరీస్ పేర్కొన్నారు.

• గుజరాత్​ కిడ్నీ అండ్​ సూపర్​ స్పెషాలిటీ ఐపీఓ జీఎంపీ ఎంత? అప్లై చేయాలా? వద్దా? పూర్తి వివరాలను తెలుసుకునేందుకు ఇక్కడ క్లిక్​ చేయండి.

ప్రస్తుతం గ్రో వద్ద ఉన్న కస్టమర్ల ఆస్తుల్లో దాదాపు 50% ఎటువంటి ఆదాయాన్ని అందించడం లేదు (ఎక్కువగా మ్యూచువల్ ఫండ్లలో ఉండటం వల్ల). దీనివల్ల భవిష్యత్తులో వారికి ఇతర లోన్లు, వెల్త్ మేనేజ్‌మెంట్ వంటి సేవలను అందించడం ద్వారా ఆదాయాన్ని పెంచుకునే పెద్ద అవకాశం కంపెనీకి ఉందని జెఫరీస్ అభిప్రాయపడింది.

గ్రో షేర్​ ప్రైజ్​- టెక్నికల్ వ్యూ: ఇంకా పెరిగే అవకాశం!

ప్రస్తుతం ఈ షేరు రూ. 170 వద్ద ట్రేడ్ అవుతోంది. చాయిస్ బ్రోకింగ్ పరిశోధనా విశ్లేషకురాలు అమృతా షిండే అభిప్రాయం ప్రకారం.. ఈ గ్రో స్టాక్ మళ్లీ మరింత పుంజుకునే సంకేతాలు కనిపిస్తున్నాయి.

"వాల్యూమ్స్ బాగున్నాయి, రూ. 175 రెసిస్టెన్స్​ లెవల్స్​ని దాటితే ఈ షేరు త్వరలోనే రూ. 200 మార్కును తాకే అవకాశం ఉంది!" అని వివరించారు.

ఇన్వెస్టర్లు రూ. 162-153 శ్రేణిలో ఈ షేర్లను కొనుగోలు చేయవచ్చని, రూ. 152 వద్ద స్టాప్ లాస్ పెట్టుకోవాలని ఆమె సూచించారు.

గ్రో మాతృ సంస్థ 'బిలియన్ బ్రెయిన్స్ గ్యారేజ్ వెంచర్స్' ఇటీవల ఐపీఓ ద్వారా రూ. 6,632 కోట్లు సేకరించిన సంగతి తెలిసిందే. ఈ ఇష్యూ దాదాపు 18 రెట్లు సబ్‌స్క్రైబ్ అయ్యి ఇన్వెస్టర్ల నమ్మకాన్ని గెలుచుకుంది.