ప్రతిష్ఠాత్మక వరల్డ్​ ర్యాంకింగ్స్​లో ఐఐఎస్సీకి షాక్! టాప్ 250 నుంచి అవుట్..

ప్రసిద్ధ 'టైమ్స్ హయ్యర్ ఎడ్యుకేషన్' ప్రపంచ యూనివర్సిటీల ర్యాంకింగ్స్ 2027 ఫలితాలు విడుదలయ్యాయి. దేశీయంగా అగ్రస్థానంలో నిలిచిన బెంగళూరు ఐఐఎస్సీ అంతర్జాతీయంగా 254వ స్థానానికి పడిపోగా, భారత్ నుంచి రికార్డు స్థాయిలో 143 విద్యాసంస్థలు ఈ జాబితాలో చోటు దక్కించుకున్నాయి.

ప్రపంచ స్థాయి ఉన్నత విద్యా సంస్థల జాబితాలో భారత్‌కు చెందిన ప్రతిష్టాత్మక ఇండియన్ ఇన్‌స్టిట్యూట్ ఆఫ్ సైన్స్ (ఐఐఎస్సీ) బెంగళూరు ఈసారి నిరాశపరిచింది! 'టైమ్స్ హయ్యర్ ఎడ్యుకేషన్' (టీహెచ్​ఈ) విడుదల చేసిన వరల్డ్ యూనివర్సిటీ ర్యాంకింగ్స్ 2027లో ఐఐఎస్సీ మొదటి 250 స్థానాల నుంచి బయటకు వెళ్లిపోయింది. గత రెండేళ్లుగా (2024, 2025) 201-250 స్థానాల బ్యాండ్‌లో నిలిచిన ఈ దిగ్గజ వర్సిటీ.. ఈ ఏడాది అమెరికాలోని నార్త్‌ఈస్టర్న్ యూనివర్సిటీతో కలసి ఉమ్మడిగా 254వ ర్యాంకు సాధించింది.

ఐఐఎస్సీ బెంగళూరు.. (HT)

పరిశోధనా ప్రమాణాలు, బోధనా నాణ్యత మెరుగైనప్పటికీ, అంతర్జాతీయంగా పోటీ తీవ్రత విపరీతంగా పెరగడమే ఇందుకు ప్రధాన కారణమని విశ్లేషకులు చెబుతున్నారు.

గ్లోబల్ రేసులో పెరిగిన పోటీ..

ఈసారి ప్రపంచవ్యాప్తంగా 118 దేశాల నుంచి రికార్డు స్థాయిలో 2,297 విశ్వవిద్యాలయాలను పరిశీలించి ఈ ర్యాంకింగ్స్ కేటాయించారు.

"ర్యాంకింగ్స్ అనేవి తీవ్రమైన పోటీతో కూడుకున్న ప్రక్రియ. ప్రపంచవ్యాప్తంగా పోటీ అమాంతం పెరిగినప్పుడు, ఉన్న స్థానాన్ని నిలబెట్టుకోవడానికి కూడా విశ్వవిద్యాలయాలు నిరంతరం కష్టపడాల్సి ఉంటుంది," అని టైమ్స్ హయ్యర్ ఎడ్యుకేషన్ ప్రతినిధి స్పష్టం చేశారు.

ప్రముఖ ర్యాంకింగ్స్​లో భారత వర్సిటీలు..

సత్తా చాటిన తమిళనాడు, హిమాచల్ వర్సిటీలు..

హిమాచల్ ప్రదేశ్‌కు చెందిన శూలిని యూనివర్సిటీ 401-500 బ్యాండ్‌ను నిలబెట్టుకుని మూడో స్థానాన్ని దక్కించుకుంది. జమియా మిలియా ఇస్లామియా 501-550 బ్యాండ్‌కు పడిపోగా.. కేఐఐటీ, లవ్లీ ప్రొఫెషనల్ యూనివర్సిటీ (ఎల్​పీయూ)లు కూడా 501-550 స్థానాల్లో నిలిచాయి. అమిటీ, బెనారస్ హిందూ యూనివర్సిటీ, గ్రాఫిక్ ఎరా, మణిపాల్ అకాడమీలు 551-600 బ్యాండ్‌లో స్థానం సంపాదించాయి. కొత్తగా హిమాచల్ సెంట్రల్ వర్సిటీ, రోహిల్ ఖండ్ వర్సిటీలు 701-800 బ్యాండ్‌లో అరంగేట్రం చేశాయి.

ఐఐటీల వర్గానికి వస్తే.. ఐఐటీ ఇండోర్ (651-700), ఐఐటీ పాట్నా (701-800), ఐఐటీ గాంధీనగర్, ఐఐటీ మండి (801-1000) స్థానాల్లో నిలిచాయి.

అమెరికా తర్వాత భారత్‌దే హవా!

గ్లోబల్ ర్యాంకింగ్స్‌లో భారతదేశం తరఫున ప్రాతినిధ్యం భారీగా పెరిగింది. గతేడాది 128 సంస్థలు ఈ జాబితాలో ఉండగా, ఈసారి ఆ సంఖ్య 143కి చేరింది! దీనితో ప్రపంచంలోనే అత్యధిక వర్సిటీలు ఉన్న రెండో దేశంగా భారత్ రికార్డు సృష్టించింది. 168 సంస్థలతో అమెరికా మొదటి స్థానంలో ఉండగా, 124 వర్సిటీలతో టర్కీ, 112 సంస్థలతో జపాన్ తదుపరి స్థానాల్లో ఉన్నాయి.

ఇక ప్రపంచవ్యాప్తంగా బ్రిటన్‌కు చెందిన ఆక్స్‌ఫర్డ్ విశ్వవిద్యాలయం వరుసగా 11వ ఏడాది కూడా మొదటి ర్యాంకును కైవసం చేసుకుంది. టాప్-10 స్థానాల్లో ఏడు అమెరికా సంస్థలు సాధించగా, మిగిలిన మూడింటిని బ్రిటన్ దక్కించుకుంది.

బోధన, పరిశోధనా వాతావరణం, పరిశోధన నాణ్యత, అంతర్జాతీయ దృక్పథం, పరిశ్రమల భాగస్వామ్యం అనే 5 కీలక విభాగాలు, 17 సూచీల ఆధారంగా ఈ ర్యాంకింగ్స్ నిర్ణయించారు.