సౌదీ అరేబియాకు విమానాల రద్దును పొడిగించిన ఇండిగో

మధ్యప్రాచ్యంలో భద్రతా ఆందోళనల నేపథ్యంలో సౌదీ అరేబియాకు విమాన సర్వీసుల రద్దును ఇండిగో మరింత కాలం పొడిగించింది. రియాద్, జెద్దా, దమ్మామ్, మదీనా మార్గాల్లో ఈ నిర్ణయం అమలు కానుంది. అక్కడి భారతీయుల కోసం రాయబార కార్యాలయం 24 గంటల కంట్రోల్ రూమ్‌లను ఏర్పాటు చేసింది.

పశ్చిమాసియాలో ముదురుతున్న భద్రతా సంక్షోభం నేపథ్యంలో ప్రముఖ భారతీయ విమానయాన సంస్థ 'ఇండిగో' కీలక నిర్ణయం తీసుకుంది. సౌదీ అరేబియాకు నడిచే తన విమాన సర్వీసుల రద్దును మరింత కాలం పొడిగిస్తున్నట్లు ప్రకటించింది. ఈ విషయాన్ని రియాద్‌లోని భారత రాయబార కార్యాలయం శుక్రవారం అధికారికంగా ధ్రువీకరించింది.

సౌదీ అరేబియాకు విమానాల రద్దును పొడిగించిన ఇండిగో (REUTERS)

"రియాద్‌ మార్గంలో ఇండిగో విమానాలు అక్టోబర్ 31 వరకు రద్దయ్యాయి. అలాగే జిద్దా, దమ్మామ్, మదీనా మార్గాల్లో అక్టోబర్ 27 వరకు సేవలు నిలిచిపోతాయి" అని భారత మిషన్ సామాజిక మాధ్యమం 'ఎక్స్'లో పేర్కొంది.

దాడుల తీవ్రతే కారణం

సౌదీ అరేబియాలోని విమానాశ్రయాలు, ఇంధన కేంద్రాలు, కీలకమైన మౌలిక సదుపాయాలే లక్ష్యంగా యెమెన్‌లోని ఇరాన్ మద్దతుగల హౌతీ తిరుగుబాటుదారులు డ్రోన్లు, క్షిపణులతో దాడులు తీవ్రతరం చేశారు. ఇటీవల దమ్మామ్‌లోని కింగ్ ఫహద్ అంతర్జాతీయ విమానాశ్రయంపై బుధవారం జరిగిన దాడిలో ఒక భారతీయుడు ప్రాణాలు కోల్పోగా, మరో ఇద్దరు గాయపడ్డారు. అదే రోజు సౌదీ అరామ్‌కోకు చెందిన షైబా చమురు క్షేత్రంపై జరిగిన మరో దాడిలో ఇంకొక భారతీయుడు గాయపడ్డాడు.

అంతకుముందు, అక్టోబర్ 10న రియాద్‌లోని కింగ్ ఖాలిద్ అంతర్జాతీయ విమానాశ్రయంపై జరిగిన దాడిలోనూ ఒక భారత పౌరుడు మరణించగా, పలువురు గాయపడ్డారు. ఈ వరుస అవాంఛనీయ ఘటనల నేపధ్యంలోనే విమానయాన సంస్థలు ఈ కఠిన నిర్ణయం తీసుకున్నాయి.

ఇతర విమానయాన సంస్థల నిర్ణయాలు

కేవలం ఇండిగో మాత్రమే కాకుండా ఇతర భారతీయ విమానయాన సంస్థలు కూడా సౌదీకి సర్వీసులను తాత్కాలికంగా నిలిపివేశాయి. ఎయిర్ ఇండియా, ఎయిర్ ఇండియా ఎక్స్‌ప్రెస్ సంస్థలు తమ అన్ని మార్గాల్లో అక్టోబర్ 24 వరకు విమానాలను రద్దు చేయగా, ఆకాసా ఎయిర్ అక్టోబర్ 27 వరకు సర్వీసులను నిలిపివేసింది.

"అత్యవసరంగా భారత్‌కు వెళ్లాల్సిన పౌరులు అవసరమైన వీసాలు పొంది బహ్రెయిన్, కువైట్ లేదా ఖతార్ మార్గాల ద్వారా ప్రయాణించే అంశాన్ని పరిశీలించవచ్చు" అని రాయబార కార్యాలయం సూచించింది.

ఉమ్రా యాత్రికుల రక్షణ, సహాయక చర్యలు

విమానాల రద్దు కారణంగా సౌదీలో ఉన్న భారతీయ ఉమ్రా యాత్రికులు ఇబ్బందులు ఎదుర్కొంటున్నారు. దీనిపై విదేశాంగ మంత్రిత్వ శాఖ తక్షణమే స్పందించింది.

"మిగిలిన ఉమ్రా యాత్రికులను వీలైనంత త్వరగా స్వదేశానికి రప్పించేందుకు రాయబార కార్యాలయం, కాన్సులేట్ జనరల్ అధికారులు విమానయాన సంస్థలు, టూర్ ఆపరేటర్లతో నిరంతరం మాట్లాడుతున్నారు" అని విదేశాంగ శాఖ అధికార ప్రతినిధి రణధీర్ జైస్వాల్ తెలిపారు.

రియాద్‌లోని భారత రాయబార కార్యాలయం, జిద్దాలోని కాన్సులేట్ జనరల్ కార్యాలయాలు క్షేత్రస్థాయిలో నిరంతరం శ్రమిస్తున్నాయి. స్థానిక భారతీయ స్వచ్ఛంద కార్యకర్తల సాయంతో 24 గంటలు పనిచేసే ప్రత్యేక కంట్రోల్ రూమ్‌లను ఏర్పాటు చేసి, బాధితులకు అవసరమైన సంక్షేమ సహాయాన్ని అందిస్తున్నాయి.

భారతీయులకు కీలక హెచ్చరికలు

సౌదీ అరేబియాలో దాదాపు 27.4 లక్షల మంది భారతీయులు వివిధ రంగాల్లో ఉపాధి పొందుతున్నారు. ప్రస్తుత ఉద్రిక్త పరిస్థితుల దృష్ట్యా భారత పౌరులు అత్యంత జాగ్రత్తగా ఉండాలని రాయబార కార్యాలయం ప్రత్యేక మార్గదర్శకాలను జారీ చేసింది. ఆకాశమార్గం నుంచి దాడులు జరిగే సూచనలు కనిపిస్తే వెంటనే సురక్షితమైన భవనాల లోపలికి వెళ్లాలని, సౌదీ అధికారుల సూచనలను ఖచ్చితంగా పాటించాలని సూచించింది.

దాడులు జరిగిన ప్రాంతాలను, క్షిపణి నిరోధక చర్యలను ఫోటోలు, వీడియోలు తీసి సోషల్ మీడియాలో పోస్ట్ చేయకూడదు. సౌదీ చట్టాల ప్రకారం ఇది తీవ్రమైన నేరమని, చట్టపరమైన చర్యలు ఉంటాయని హెచ్చరించింది.