ప్రసిద్ధ ఆటోమొబైల్ దిగ్గజం మారుతీ సుజుకీ ఇండియా లిమిటెడ్ 2027 ఆర్థిక సంవత్సరం తొలి త్రైమాసికం (Q1 FY27) ఆర్థిక ఫలితాలను విడుదల చేసింది. వాహన విక్రయాలు, రాబడి గణనీయంగా పెరిగినప్పటికీ, ముడిసరుకుల వ్యయం మితిమీరడంతో కంపెనీ నికర లాభంలో క్షీణత నమోదైంది.
జూన్ త్రైమాసికంలో కంపెనీ ఏకీకృత నికర లాభం (Consolidated PAT) వార్షిక ప్రాతిపదికన 9.1 శాతం తగ్గి రూ.3,446 కోట్లకు చేరుకుంది. గతేడాది ఇదే త్రైమాసికంలో లాభం రూ.3,792 కోట్లుగా నమోదు కాగా, మార్చి త్రైమాసికం (Q4 FY26) తో పోలిస్తే 5.8 శాతం క్షీణించింది. అయితే కార్యకలాపాల ద్వారా వచ్చిన రాబడి మాత్రం వార్షిక ప్రాతిపదికన 35.9 శాతం వృద్ధి చెంది రూ.52,469 కోట్లకు చేరింది. ఎబిటా (EBITDA) మార్జిన్ 11.6 శాతం నుంచి 8.9 శాతానికి పడిపోయింది.
ఎగబాకిన వ్యయాలు.. కార్ల ధరల పెంపు
కంపెనీ మొత్తం ఖర్చులు వార్షికంగా 40.5 శాతం పెరిగి రూ.50,000 కోట్లకు చేరుకోవడమే లాభాల కోతకు ప్రధాన కారణంగా నిలిచింది. రాబడి కంటే ఖర్చుల వృద్ధి రేటే వేగంగా పెరిగింది.
ముడిసరుకుల వ్యయం ఏకంగా 45.9 శాతం పెరిగి రూ.32,013 కోట్లకు ఎగబాకింది. భౌగోళిక రాజకీయ ఉద్రిక్తతలు, అంతర్జాతీయంగా యుద్ధ వాతావరణం, ద్రవ్యోల్బణ ఒత్తిళ్ల వల్ల తయారీ ఖర్చులు ఊహించని రీతిలో పెరిగాయి. ఈ పెరిగిన వ్యయ భారంలో కొంత భాగాన్ని వినియోగదారులపై వేయక తప్పని పరిస్థితి ఏర్పడింది. ఇందులో భాగంగానే ఆగస్టు 2026 నుంచి తమ వాహనాల మోడళ్లను బట్టి రూ.30,000 వరకు ధరలను పెంచుతున్నట్లు మారుతీ సుజుకీ ఇదివరకే ప్రకటించింది.
రికార్డు స్థాయిలో విక్రయాలు.. పెరిగిన మార్కెట్ వాటా
ఆర్థిక సమీక్షా కాలంలో మారుతీ సుజుకీ వాహన విక్రయాల్లో సరికొత్త అధ్యాయాన్ని లిఖించింది. ఆల్-టైమ్ రికార్డు స్థాయిలో మొత్తం 6,82,724 వాహనాలను విక్రయించి 29.3 శాతం వృద్ధిని నమోదు చేసింది.
కంపెనీ సాధించిన ఈ ప్రగతిలో విభాగాల వారీగా వివరాలు:
- చిన్న కార్ల విక్రయాలు: 34.1 శాతం వృద్ధి
- ఎస్యూవీ (SUV) విక్రయాలు: 44.6 శాతం దూకుడు
- ఎగుమతులు: 28.6 శాతం పెరుగుదల
ఆర్థిక సమీక్షా కాలంలో మారుతీ సుజుకీ వాహన విక్రయాల్లో సరికొత్త అధ్యాయాన్ని లిఖించింది. ఆల్-టైమ్ రికార్డు స్థాయిలో మొత్తం 6,82,724 వాహనాలను విక్రయించి 29.3 శాతం వృద్ధిని నమోదు చేసింది.
కంపెనీ సాధించిన ఈ ప్రగతిలో విభాగాల వారీగా వివరాలు:
- చిన్న కార్ల విక్రయాలు: 34.1 శాతం వృద్ధి
- ఎస్యూవీ (SUV) విక్రయాలు: 44.6 శాతం దూకుడు
- ఎగుమతులు: 28.6 శాతం పెరుగుదల
ఈ విక్రయాల జోరుతో భారత ప్యాసింజర్ వాహన మార్కెట్లో మారుతీ సుజుకీ తన ఆధిపత్యాన్ని మరింత పెంచుకుంది. కంపెనీ మార్కెట్ వాటా 2.3 శాతం పెరిగి ఏకంగా 41.2 శాతానికి చేరింది. హర్యానాలోని ఖార్ఖోడా (Kharkhoda) వద్ద రెండవ తయారీ ప్లాంట్ను ప్రారంభించడంతో ఉత్పత్తి సామర్థ్యం గణనీయంగా పెరిగింది. ప్రస్తుతం డీలర్ల వద్ద నిల్వలు (Inventory) 13 రోజుల స్థాయిలోనే ఉంటూ ఆరోగ్యకరంగా ఉన్నట్లు సంస్థ స్పష్టం చేసింది.
(గమనిక: నిపుణులు, బ్రోకరేజ్ సంస్థల అభిప్రాయాలు వారి వ్యక్తిగతం. ఇన్వెస్టర్లు ఎలాంటి పెట్టుబడి నిర్ణయాలు తీసుకునేముందైనా గుర్తింపు పొందిన ఆర్థిక సలహాదారులను సంప్రదించడం శ్రేయస్కరం.)