విద్యార్థులను బెదిరిస్తారా?: డీయూ అడ్వైజరీపై రాహుల్ గాంధీ మండిపాటు

జంతర్ మంతర్ వద్ద నిరసనల్లో పాల్గొనవద్దంటూ ఢిల్లీ యూనివర్సిటీ, జేఎన్‌యూ జారీ చేసిన అడ్వైజరీలపై ప్రతిపక్షాలు తీవ్రస్థాయిలో విరుచుకుపడ్డాయి. ప్రజాస్వామ్య హక్కులను అనుభవించే విద్యార్థులను బెదిరించడమేంటని ప్రతిపక్ష నేత రాహుల్ గాంధీ ప్రశ్నిస్తూ.. కాలక్రమంలో సమాధానం చెప్పాల్సి వస్తుందని హెచ్చరించారు.

ఢిల్లీలో విద్యార్థుల ఆందోళనల వేళ జంతర్ మంతర్ వద్ద ఎలాంటి నిరసనల్లో పాల్గొనవద్దంటూ ఢిల్లీ యూనివర్సిటీ (డీయూ), జవహర్‌లాల్ నెహ్రూ యూనివర్సిటీ (జేఎన్‌యూ) జారీ చేసిన మార్గదర్శకాలు తీవ్ర రాజకీయ దుమారం రేపుతున్నాయి. విద్యార్థులు, అధ్యాపకులు చట్టవిరుద్ధమైన ప్రదర్శనలకు దూరంగా ఉండాలని, నిబంధనలు మీరితే చట్టపరమైన, క్రమశిక్షణా చర్యలు తప్పవని హెచ్చరించడంపై ప్రతిపక్ష నేతలు తీవ్ర ఆగ్రహం వ్యక్తం చేశారు.

విద్యార్థులను బెదిరిస్తారా?: డీయూ అడ్వైజరీపై రాహుల్ గాంధీ మండిపాటు (Hindustan Times)

సమయం వచ్చినప్పుడు లెక్క తేలుస్తాం: రాహుల్ గాంధీ

ఈ వ్యవహారంపై లోక్‌సభ ప్రతిపక్ష నేత రాహుల్ గాంధీ సోషల్ మీడియా వేదికగా ఘాటుగా స్పందించారు. విశ్వవిద్యాలయ యాజమాన్యం విద్యార్థుల హక్కులను కాలరాసేలా వ్యవహరిస్తోందని విమర్శించారు.

"ప్రజాస్వామ్య హక్కులను వినియోగించుకునే విద్యార్థులను బెదిరించడానికి మీకు ఎంత ధైర్యం? సరైన సమయం వచ్చినప్పుడు దీనికి మీరే బాధ్యత వహించాల్సి ఉంటుందని గుర్తుంచుకోండి" అని రాహుల్ గాంధీ హెచ్చరించారు.

డీయూ జారీ చేసిన నోటీసును ఉటంకిస్తూ ఆయన ఈ వ్యాఖ్యలు చేశారు. విద్యార్థుల విద్యా, ఉద్యోగ అవకాశాలపై ఈ ఆందోళనలు ప్రభావం చూపుతాయని వర్సిటీ పేర్కొనడాన్ని ఆయన తప్పుపట్టారు.

సైన్యాల కంటే విద్యార్థులే ఎక్కువ విప్లవాలు తెచ్చారు: మహువా మొయిత్రా

తృణమూల్ కాంగ్రెస్ ఎంపీ మహువా మొయిత్రా కూడా డీయూ తీరుపై విరుచుకుపడ్డారు. విద్యాసంస్థలను భయపెట్టి అణచివేయాలని చూడటం దారుణమన్నారు.

"ఢిల్లీ యూనివర్సిటీ తీరు సిగ్గుచేటు. నేరపూరితమైన ఈ ప్రభుత్వ ఆదేశాలను పాటిస్తూ విద్యార్థులను భయపెడతారా? గత పదేళ్లలో 7.5 కోట్ల మంది విద్యార్థుల భవిష్యత్తును నాశనం చేసిన ప్రభుత్వానికి కొమ్ముకాస్తున్నారు. సైన్యాల కంటే విశ్వవిద్యాలయాల క్యాంపస్‌లే సమాజంలో అత్యధిక విప్లవాలను తీసుకొచ్చాయి" అని మహువా స్పష్టం చేశారు.

మరోవైపు స్వరాజ్ ఇండియా వ్యవస్థాపకుడు యోగేంద్ర యాదవ్ స్పందిస్తూ, దేశంలోనే అగ్రగామి విశ్వవిద్యాలయం తన విద్యార్థులను, అధ్యాపకులను కెరీర్ పేరుతో బెదిరించడం దారుణమని ఆవేదన వ్యక్తం చేశారు. "తన అత్యంత ప్రముఖమైన పూర్వ విద్యార్థి గుర్తింపును దాచడానికి కోర్టులో న్యాయపోరాటం చేస్తున్న విశ్వవిద్యాలయం, ఇప్పుడు విద్యార్థుల భవిష్యత్తును బెదిరిస్తోంది" అని ఎద్దేవా చేశారు. శివసేన (యుబిటి) నాయకురాలు ప్రియాంక చతుర్వేది కూడా డీయూ యాజమాన్యానికి సిగ్గుండాలని ఆగ్రహం వ్యక్తం చేశారు.

సామాజిక మాధ్యమాల్లో బాధ్యతగా ఉండాలి: జేఎన్‌యూ హెచ్చరిక

డీయూ బాటలోనే జవహర్‌లాల్ నెహ్రూ యూనివర్సిటీ (జేఎన్‌యూ) కూడా తమ విద్యార్థులు, అధ్యాపకులకు మార్గదర్శకాలు జారీ చేసింది. సుప్రీంకోర్టు ఆదేశాల ప్రకారం జంతర్ మంతర్ లేదా దాని పరిసర ప్రాంతాల్లో జరిగే నిరసనలకు దూరంగా ఉండాలని కోరింది.

సామాజిక మాధ్యమాల్లో కామెంట్లు చేసేటప్పుడు బాధ్యతాయుతంగా వ్యవహరించాలని, వర్సిటీ నిబంధనలు ఉల్లంఘిస్తే కోడ్ ఆఫ్ కండక్ట్ ప్రకారం కఠిన చర్యలు తప్పవని జేఎన్‌యూ యాజమాన్యం స్పష్టం చేసింది.