Assembly Elections 2026 : కేరళ, అసోం, పుదుచ్చేరిలో ప్రశాంతంగా ఎన్నికలు​ - రికార్డు స్థాయిలో పోలింగ్, ఎంతంటే..?

అసోం, కేరళ, పుదుచ్చేరిలో ప్రశాంతంగా ఎన్నికలు​ ముగిశాయి. అసోం, పుదుచ్చేరిలో రికార్డుస్థాయిలో పోలింగ్ శాతం నమోదైంది. మహిళలు అధిక సంఖ్యలో ఓటు హక్కును వినియోగించుకున్నారు.

అసోం, , పుదుచ్చేరి, కేరళ అసెంబ్లీ ఎన్నికల పోలింగ్ ప్రశాంతంగా ముగిసింది. మూడు రాష్ట్రాల్లోనూ ఈసారి భారీ సంఖ్యలోనే ప్రజలు ఓటు హక్కును వినియోగించుకున్నారు. చిన్న చిన్న ఘటనలు మినహా… ప్రశాంతంగానే ఎన్నికల ఓటింగ్ ముగిసింది.

ఓటర్లు

ముఖ్యమంత్రులతో పాటు పలువురు ప్రముఖులు వేర్వేరు చోట్ల ఓటు వేశారు. మరోవైపు ఎలాంటి అవాంఛనీయ ఘటనలు జరగకుండా పోలీసులు పటిష్టమైన బందోబస్తు చర్యలు చేపట్టారు.

అసోం, పుదుచ్చేరి , కేరళ రాష్ట్రాల్లో జరిగిన ఎన్నికల పోలింగ్ వివరాలను ఈసీ ఓ ప్రకటన ద్వారా వెల్లడించింది. అసోం, పుదుచ్చేరి రాష్ట్రాల్లో గత రికార్డులను అధిగమించి అత్యధిక స్థాయిలో ఓటింగ్‌ నమోదైంది.

• పుదుచ్చేరి: 89.83 శాతం పోలింగ్ నమోదైంది. గతంలో 2011 ఎన్నికల్లో నమోదైన 86.19 శాతమే అత్యధికం.
• అసోం: 85.38 శాతం పోలింగ్‌తో సరికొత్త రికార్డు సృష్టించింది. గతంలో 2016 అసెంబ్లీ ఎన్నికల్లో నమోదైన 84.67 శాతమే ఇప్పటివరకు అత్యధికం.
• కేరళ : కేరళలో మొత్తం 78.03 శాతం పోలింగ్ నమోదైంది.
• అసోంలో 84.80 శాతం పురుషులు, 85.96 శాతం మహిళలు ఓటేశారు.
• కేరళలో పురుషులు 75.01 శాతం పోల్స్ నమోదు చేయగా, మహిళలు 80.86 శాతంగా ఉన్నారు.
• కేంద్రపాలిత ప్రాంతమైన పుదుచ్చేరిలో 88.09 శాతం మంది పురుష ఓటర్లు ఓటు వేయగా, 91.33 శాతం మంది మహిళలు ఓటు వేశారు.

కర్ణాటక, నాగాలాండ్, త్రిపురలోని నాలుగు అసెంబ్లీ స్థానాలకు ఉప ఎన్నికలు జరిగాయి. ఎక్కడా అవాంఛనీయ ఘటనలు జరగకుండా పోలీసులు భారీ భద్రతను ఏర్పాటు చేశారు. ముఖ్యమంత్రులు, పలువురు వీఐపీలు సామాన్యుల మాదిరిగా క్యూలైన్లలో నిలబడి ఓటు వేసి అందరికీ ఆదర్శంగా నిలిచారు.