భారత ఆహార భద్రతా ప్రమాణాల ప్రాధికార సంస్థ (ఎఫ్ఎస్ఎస్ఏఐ) జారీ చేసిన ఉత్తర్వులపై రిలయన్స్ కన్జ్యూమర్ ప్రొడక్ట్స్‌కు ఢిల్లీ హైకోర్టులో భారీ ఊరట లభించింది. తమ పాపులర్ బ్రాండ్ 'క్యాంపా' ఉత్పత్తులను 'ఎనర్జీ డ్రింక్' పేరుతోనే విక్రయించుకునేందుకు కోర్టు తాత్కాలికంగా అనుమతించింది. కంపెనీకి కనీసం ముందస్తు నోటీసు ఇవ్వకుండా ఉత్తర్వులు ఎలా జారీ చేస్తారని ఎఫ్‌ఎస్‌ఎస్‌ఏఐని న్యాయస్థానం ప్రశ్నించింది.
అధిక కెఫిన్ (Caffeine) కలిగిన పానీయాలను 'ఎనర్జీ డ్రింక్'గా ప్రచారం చేయకూడదని ఈ ఏడాది జూన్ 30న ఎఫ్ఎస్ఎస్ఏఐ ఆదేశాలు జారీ చేసింది. ఈ నిర్ణయాన్ని సవాలు చేస్తూ రిలయన్స్ ఇండస్ట్రీస్ అక్టోబరు 1న ఢిల్లీ హైకోర్టును ఆశ్రయించింది.
కోట్ల కొద్దీ ఇన్వెంటరీ ముప్పులో పడింది: రిలయన్స్
ఎఫ్ఎస్ఎస్ఏఐ హఠాత్తుగా తీసుకున్న ఈ నిర్ణయం వల్ల తమ వ్యాపార కార్యకలాపాలు తీవ్రంగా దెబ్బతిన్నాయని రిలయన్స్ కోర్టు దృష్టికి తీసుకెళ్లింది.
తమ వద్ద 'ఎనర్జీ డ్రింక్' లేబుల్‌తో సిద్ధంగా ఉన్న 16.8 కోట్ల క్యాన్లు (168 మిలియన్లు), 12 కోట్ల ప్లాస్టిక్ బాటిళ్ల (120 మిలియన్లు) నిల్వలు నిలిచిపోయాయని తెలిపింది.
దీనికి తోడు ఇప్పటికే ప్రింట్ చేసిన 40 కోట్ల క్యాన్లు (400 మిలియన్లు), 36 కోట్ల బాటిళ్ల (360 మిలియన్లు) ప్యాకేజింగ్ మెటీరియల్ వృథా అయ్యే ప్రమాదం ఏర్పడిందని పేర్కొంది.
ఎఫ్ఎస్ఎస్ఏఐ ఆదేశాల నేపథ్యంలో అధికారులు తమ స్టాక్‌ను సీజ్ చేశారని, ఇ-కామర్స్ ప్లాట్‌ఫారమ్‌ల నుంచి కూడా ఉత్పత్తులను తొలగించారని కంపెనీ ఆవేదన వ్యక్తం చేసింది.
నోటీసు ఇవ్వకపోవడంపై కోర్టు తీవ్ర ఆగ్రహం
మంగళవారం నాటి విచారణ సందర్భంగా ఢిల్లీ హైకోర్టు ఎఫ్ఎస్ఎస్ఏఐ తీరుపై అభ్యంతరం వ్యక్తం చేసింది. చర్యలు తీసుకునే ముందు రిలయన్స్‌కు షోకాజ్ నోటీసు ఎందుకు ఇవ్వలేదని నిలదీసింది. "చేసిన తప్పును సరిదిద్దుకోవడానికి ఎప్పుడూ ఆలస్యం కాదని" వ్యాఖ్యానించింది. ఈ కేసు తదుపరి విచారణను నవంబర్ 5వ తేదీకి వాయిదా వేసింది.
రంగంలోకి పెప్సికో, మాన్‌స్టర్ సంస్థలు
కేవలం రిలయన్స్ మాత్రమే కాకుండా ఇతర అంతర్జాతీయ బ్రాండ్లు కూడా ఎఫ్ఎస్ఎస్ఏఐ నిర్ణయంపై న్యాయపోరాటం చేస్తున్నాయి.
{{/usCountry}}కేవలం రిలయన్స్ మాత్రమే కాకుండా ఇతర అంతర్జాతీయ బ్రాండ్లు కూడా ఎఫ్ఎస్ఎస్ఏఐ నిర్ణయంపై న్యాయపోరాటం చేస్తున్నాయి.
{{/usCountry}}ప్రముఖ బ్రాండ్ 'రెడ్ బుల్' ఇప్పటికే కోర్టు నుంచి ఇలాంటి ఉపశమనాన్ని పొందింది. పెప్సికో, మాన్‌స్టర్ బెవరేజెస్ సంస్థలు కూడా ఎఫ్ఎస్ఎస్ఏఐ ఆదేశాలను సవాలు చేస్తూ పిటిషన్లు దాఖలు చేశాయి. వీటిపై కూడా ఢిల్లీ హైకోర్టు విచారణ జరపనుంది.
దేశవ్యాప్తంగా ఆహార పదార్థాల తనిఖీలను ప్రభుత్వం కఠినతరం చేస్తున్న సమయంలో, పానీయాల లేబెలింగ్ వ్యవహారంపై కోర్టు ఇచ్చే తుది తీర్పు అత్యంత కీలకంగా మారనుంది.