'సర్వం' ఏఐ సంచలనం.. రూ.1,950 కోట్ల భారీ నిధుల సేకరణ

ఇండియన్ ఆర్టిఫిషియల్ ఇంటెలిజెన్స్ స్టార్టప్ 'సర్వం' (Sarvam) సిరీస్ బి నిధుల సేకరణలో భాగంగా 234 మిలియన్ డాలర్లు (సుమారు రూ.1,950 కోట్లు) సమీకరించింది. ఐటీ దిగ్గజం హెచ్‌సీఎల్ టెక్నాలజీస్ సారథ్యంలో జరిగిన ఈ పెట్టుబడులతో సంస్థ మార్కెట్ విలువ 1.5 బిలియన్ డాలర్లకు చేరి యూనికాన్ హోదాను సొంతం చేసుకుంది.

బెంగళూరు కేంద్రంగా పనిచేస్తున్న భారతీయ ఏఐ స్టార్టప్ 'సర్వం' గ్లోబల్ టెక్ మార్కెట్‌లో సరికొత్త రికార్డు సృష్టించింది. తన సిరీస్ బి నిధుల సేకరణలో భాగంగా తొలి విడతలోనే 234 మిలియన్ డాలర్లను (సుమారు రూ.1,950 కోట్లు) రాబట్టింది. మొత్తం 300 మిలియన్ డాలర్ల నిధుల సేకరణను లక్ష్యంగా పెట్టుకున్న ఈ సంస్థ ప్రస్తుత మార్కెట్ విలువ 1.5 బిలియన్ డాలర్లకు (రూ.12,500 కోట్ల పైమాటే) చేరింది. దేశీయంగా సొంత సాంకేతికతతో ఏఐ రంగాన్ని బలోపేతం చేయాలనే భారత ఆకాంక్షలకు ఈ పెట్టుబడులు మరింత ఊతాన్ని ఇస్తున్నాయి.

హెచ్‌సీఎల్ టెక్నాలజీస్ భారీ పెట్టుబడి

'సర్వం' ఏఐ సంచలనం.. రూ.1,950 కోట్ల భారీ నిధుల సేకరణ

ఈ నిధుల సేకరణకు ప్రముఖ ఐటీ సేవల దిగ్గజం హెచ్‌సీఎల్ టెక్నాలజీస్ (HCL Technologies) నాయకత్వం వహించింది. సర్వం స్టార్టప్‌లో 10.46 శాతం వాటాను దక్కించుకుంటూ హెచ్‌సీఎల్ ఏకంగా 150 మిలియన్ డాలర్ల పెట్టుబడి పెట్టింది. నియంత్రణ సంస్థల ఫైలింగ్స్ ప్రకారం, ఈ రౌండ్‌లో బెసిమర్ వెంచర్ పార్ట్‌నర్స్ కొత్తగా చేరగా, పాత ఇన్వెస్టర్లు ఖోస్లా వెంచర్స్, పీక్ ఎక్స్వీ పార్ట్‌నర్స్ కూడా భాగస్వామ్యమయ్యారు. మిగిలిన 66 మిలియన్ డాలర్ల నిధులను త్వరలోనే ఇతర ఇన్వెస్టర్ల నుంచి సమీకరించనున్నట్లు సంస్థ స్పష్టం చేసింది.

నిధుల వినియోగం - లక్ష్యాలు

ఈ భారీ నిధులను సరికొత్త సాంకేతిక ఆవిష్కరణలకు, మౌలిక వసతుల కల్పనకు ఉపయోగించనున్నారు. "ఈ నిధులను విభిన్న విభాగాల్లో పెట్టుబడిగా పెడుతున్నాం. మొదటిది, మరింత మెరుగైన, పోటీతత్వంతో కూడిన ఫ్రంటియర్ మోడల్స్ అభివృద్ధి చేయడానికి, పరిశోధనలు (R&D) సాగించడానికి పెద్ద మొత్తంలో ఖర్చు చేస్తాం. రెండోది, కంప్యూట్ మౌలిక వసతుల కల్పన. భారతదేశంలో పూర్తిస్థాయి అప్లికేషన్లను అందుబాటులోకి తెచ్చేందుకు ఈ నిధులు తోడ్పడతాయి" అని సర్వం కో-ఫౌండర్ ప్రత్యుష్ కుమార్ వివరించారు.

విదేశీ టెక్నాలజీపై ఆధారపడకుండా..

ఇటీవలే అమెరికా ప్రభుత్వం ఆ దేశానికి చెందిన ప్రముఖ ఏఐ సంస్థ ఆంత్రోపిక్ (Anthropic) తన సరికొత్త మోడల్స్ (ఫేబుల్ 5, మైథోస్) ఎగుమతులపై ఆంక్షలు విధించింది. ఇలాంటి అంతర్జాతీయ ఆంక్షలు, రాజకీయ పరిణామాల నేపథ్యంలో, భారతదేశానికి సొంత ఏఐ సాంకేతికత ఎంత అవసరమో సర్వం నిధుల సేకరణ నిరూపిస్తోంది. విదేశీ మోడళ్లను తెచ్చుకుని వాటిని భారతీయ డేటాతో మార్చడం కాకుండా, మన దేశంలోనే ప్రాథమిక స్థాయి నుండి సొంత మోడళ్లను సర్వం నిర్మిస్తోంది.

ఈ ఏడాది ఫిబ్రవరిలో జరిగిన ఇండియా ఏఐ ఇంపాక్ట్ సమ్మిట్‌లో సర్వం 'కేజ్' (Kaze) పేరుతో సరికొత్త స్మార్ట్‌గ్లాసెస్‌ను ప్రకటించింది. ఇది నేరుగా వినియోగదారుల కోసం కాకుండా వ్యాపార సంస్థల (B2B) ఉత్పాదకతను పెంచడం కోసం తయారు చేశారు.

"ఈ స్మార్ట్‌గ్లాసెస్‌ను కంపెనీలు మా ఏఐ ఏజెంట్లతో కలిపి సబ్‌స్క్రిప్షన్ పద్ధతిలో కొనుగోలు చేస్తాయి. ప్రస్తుతం వీటి తయారీ ప్రక్రియ నడుస్తోంది. వీటిని కొనుగోలు చేసే మొదటి విడత కంపెనీలను ఇప్పటికే గుర్తించాం" అని ప్రత్యుష్ కుమార్ తెలిపారు.

నిరంతరం ఫోన్లు లేదా కంప్యూటర్లు వాడలేని డెలివరీ డ్రైవర్లు, ఫీల్డ్ వర్కర్ల ఉత్పాదకతను పెంచేందుకు ఇవి ఉపయోగపడతాయి. నెలకు రూ. 25,000 జీతం తీసుకునే సాధారణ ఉద్యోగి కూడా ఏఐ సేవలను తక్కువ ఖర్చుతో వాడుకునేలా చేయడంపైనే తాము దృష్టి పెట్టామని సంస్థ పేర్కొంది.

సర్వం ఏఐ మోడల్స్ ఇవే

సర్వం పోర్ట్‌ఫోలియోలో ప్రస్తుతం శక్తివంతమైన ఏఐ మోడల్స్ ఉన్నాయి. అందులో '105B మోడల్' నాలెడ్జ్, రీజనింగ్ విభాగాల్లో గ్లోబల్ మోడళ్లకు గట్టి పోటీ ఇస్తోంది. కన్జ్యూమర్ హార్డ్‌వేర్ (మొబైల్స్, ల్యాప్‌టాప్స్) పై పనిచేసేలా 'సర్వం 30B'ని ఆప్టిమైజ్ చేశారు. అలాగే చేతిరాతను, భారతీయ భాషల పత్రాలను సులభంగా గుర్తించే 'సర్వం విజన్' (Sarvam Vision) మోడల్‌ను ప్రస్తుతం 35 మిలియన్ల ఇన్సూరెన్స్ ఫారాలు, భూ రికార్డులను డిజిటలైజ్ చేయడానికి ఉపయోగిస్తున్నారు. 2023లో కేవలం 41 మిలియన్ డాలర్లతో ప్రయాణం ప్రారంభించిన ఈ స్టార్టప్, రెండున్నరేళ్లలోనే ఈ స్థాయికి ఎదగడం గమనార్హం.