ఒక్కసారి ఫుల్​ ట్యాంక్​ కొట్టిస్తే.. ఈ సెడాన్​లో దిల్లీ నుంచి కన్యాకుమారి వరకు వెళ్లొచ్చు!

స్కోడా సూపర్బ్​ అద్భుతం చేసింది! ఒక్కసారి ఫుల్​ ట్యాంక్​ చేయిస్తే.. 2831 కి.మీల దూరం ప్రయాణించింది. అంటే, దిల్లీ నుంచి కన్యాకుమారికి వెళ్లినా ఇంకా ఇంధనం మిగిలే ఉంటుంది!

ఆటోమొబైల్​ ప్రపంచం వేగంగా ఎలక్ట్రిక్ వాహనాలవైపు మళ్లుతున్న ప్రస్తుత తరుణంలో ఒక డీజిల్ సెడాన్ తన సామర్థ్యంతో అందరిని ఆకర్షించింది! ఈ మేరకు సరికొత్త తరం స్కోడా సూపర్‌బ్‌ 2.0 టీడీఐ అత్యద్భుతమైన ఫీట్‌ను సాధించింది. ఈ కారుకు ఒక్కసారి ఫుల్​ ట్యాంక్ చేయించిన తర్వాత, 2,831 కిలోమీటర్లు ప్రయాణించింది. రీఫిల్ లేకుండా అత్యధిక దూరం ప్రయాణించిన కారుగా ప్రపంచ రికార్డు సృష్టించింది!

స్కోడా సూపర్​బ్​

ఈ ఘనత కేవలం డ్రైవర్ ఓర్పును మాత్రమే కాకుండా, ఈ కారులోని అధునాతన ఇంజనీరింగ్, ఏరోడైనమిక్స్, డీజిల్ ఇంజిన్ల సామర్థ్యాన్ని చాటిచెబుతోంది.

మైలేజ్​ పరీక్షలో అద్భుతం..

ఈ రికార్డును సాధించడానికి ఉపయోగించిన స్కోడా సూపర్‌బ్‌ 2.0 టీడీఐ కారు పూర్తిగా స్టాండర్డ్ మోడల్! దీనికి ఎలాంటి పర్ఫార్మెన్స్ మార్పులు, లేదా ప్రత్యేకమైన మోడిఫికేషన్లు చేయలేదు.

ఈ కారులో ఎస్సెన్స్ ట్రిమ్​ని ఈ ఫీట్​ కోసం ఉపయోగించారు.

ఇది 2.0-లీటర్ ఫోర్-సిలిండర్ టర్బో డీజిల్ ఇంజిన్‌తో పనిచేస్తుంది. ఈ ఇంజిన్ 148 బీహెచ్‌పీ పవర్​ని, 360 ఎన్‌ఎం టార్క్‌ను ఉత్పత్తి చేస్తుంది. దీనికి 7-స్పీడ్ డీఎస్‌జీ గేర్‌బాక్స్, ఫ్రెంట్-వీల్ డ్రైవ్ జత చేశారు.

సాధారణంగా ఈ కారు అధికారిక డబ్ల్యూఎల్‌టీపీ ఇంధన వినియోగం 100 కి.మీ.కి 4.8 లీటర్లుగా ఉంది. ఇది దాని పరిమాణంలో ఉన్న కారుకు అప్పటికే ఆకట్టుకునే సామర్థ్యమే!

అయినా, యూరప్ అంతటా జాగ్రత్తగా ప్లాన్ చేసిన రూట్‌లో డ్రైవ్ చేయడం ద్వారా, సూపర్‌బ్‌ సెడాన్​ దాదాపుగా రెట్టింపు సామర్థ్యాన్ని అందించింది. ఇది సగటున 100 కిమీకి కేవలం 2.61 లీటర్లు మాత్రమే డీజిల్‌ను వినియోగించింది. అంటే, లీటర్‌కు 38.3 కిలోమీటర్ల మైలేజీని సాధించింది. దాదాపు ఐదు మీటర్ల పొడవు, 1.6 టన్నుల బరువున్న ఎగ్జిక్యూటివ్ సెడాన్, ఒక చిన్న హ్యాచ్‌బ్యాక్ మాదిరిగా ఇంధనాన్ని వినియోగించుకోవడం విశేషం.

ఈ రికార్డు ప్రయత్నంలో, సూపర్‌బ్‌లోని 66-లీటర్ల ఇంధన ట్యాంక్‌ను పూర్తిగా నింపారు. ప్రతి కిలోమీటర్‌ను వేగానికి కాకుండా, గరిష్ట సామర్థ్యాన్ని పెంచే లక్ష్యంతో కఠినమైన నియంత్రిత పరిస్థితుల్లో నడిపారు.

రికార్డు ఎలా సాధించారు?

రికార్డు సాధించడంలో సూపర్‌బ్‌ డ్రైవ్‌ట్రైన్, ఏరోడైనమిక్స్ ముఖ్య పాత్ర పోషించినప్పటికీ, ఖచ్చితమైన ప్రణాళి, స్థిరమైన డ్రైవింగ్ పద్ధతులు కూడా విజయానికి కీలకం అయ్యాయి.

ఎకో మోడ్: కారును ఎకో మోడ్‌లో ఉంచి నడిపారు. దీనివల్ల థ్రాటిల్ ప్రతిస్పందన మృదువుగా, గేర్ మార్పులు సున్నితంగా జరిగాయి.

క్రూజింగ్ స్పీడ్: డీజిల్ ఇంజన్ అత్యంత సమర్థవంతంగా పనిచేసే 80 కేఎంపీహెచ్​ వేగంలోనే కారును స్థిరంగా నడిపారు.

టైర్ నిర్వహణ: రోలింగ్ నిరోధకత తగ్గించడానికి ఫ్యాక్టరీ సిఫార్సు చేసిన రేటులో టైర్ ప్రెజర్‌ను నిర్వహించారు. లో-రెసిస్టెన్స్​ టైర్లను వాడడం వల్ల ఎయిర్ డ్రాగ్ మరింత తగ్గింది.

సూక్ష్మమైన ప్రణాళిక: ముందు వెళ్లే వాహనం నుంచి స్థిరమైన దూరం పాటించడం ద్వారా సూపర్‌బ్‌ ఎయిర్​ రెసిస్టెన్స్​ని తగ్గించుకుంది. అలాగే కొండలను ముందుగానే అంచనా వేయడం ద్వారా బ్రేకింగ్, యాక్సలరేషన్​ని కనిష్టంగా ఉంచారు.

జర్మనీలో ఉష్ణోగ్రతలు సుమారు 1 డిగ్రీ సెల్సియస్క్​కి పడిపోవడం, అలాగే వినియోగాన్ని పెంచే పొడవైన ఎత్తైన ప్రదేశాలు ఉండడం వంటి కొన్ని ప్రతికూల పరిస్థితులు ఎదురయ్యాయి. అయితే, ఫ్రాన్స్ గుండా వెళ్లేటప్పుడు అనుకూలమైన అనువర్తిత పవనాలు లభించడంతో, కొన్ని ప్రాంతాల్లో సూపర్‌బ్‌ 100 కిమీకి 2.2 లీటర్ల వరకు తక్కువ డీజిల్​ వినియోగాన్ని నమోదు చేసింది.

అధునాతన డీజిల్ ఇంజనీరింగ్‌ను తెలివైన డిజైన్‌తో జత చేస్తే నేటికీ ఎలాంటి అద్భుతాలు చేయవచ్చో ఈ ఫలితం స్పష్టం చేస్తోంది.

తక్కువ డ్రాగ్ కోఎఫిషియంట్, క్లీన్​ డ్రైవ్‌ట్రైన్, సమర్థవంతమైన ట్రాన్స్‌మిషన్‌తో ఉన్న సూపర్‌బ్‌, చాలా హైబ్రీడ్ కార్లు కూడా పూర్తి ట్యాంక్‌పై ప్రయాణించలేని దూరాన్ని సులభంగా అధిగమించింది.

మరీ ముఖ్యంగా, ఈ కారు బేస్ ఎస్సెన్స్ ట్రిమ్‌లో ఉపయోగించడం మరింత ఆకట్టుకుంటుంది. అంటే ఇందులో ఉత్పత్తి స్థాయిలో ఉండే సాధారణ ఇంధన ఆదా సాంకేతికత తప్ప, మరే అధునాతన సాంకేతికతలు లేవు.

ఎలక్ట్రిక్ వాహనాల రేంజ్ ఛార్జింగ్ వేగంపై దృష్టి కేంద్రీకృతమైన ఈ కాలంలో, స్కోడా సూపర్‌బ్‌ సాధించిన ఈ అసాధారణ విజయం, సుదూర ప్రయాణ సామర్థ్యం విషయంలో డీజిల్ ఇంజన్ ఇప్పటికీ రాణిస్తుందని గుర్తుచేస్తుంది. సుమారు 2800 కిలోమీటర్లు అంటే, దిల్లీ నుంచి కన్యాకుమారి వరకు ప్రయాణించినా ఇంకా ఇంధనం మిగిలి ఉండేంత దూరాన్ని ఇది సూచిస్తోంది. ఈ సెడాన్ లగ్జరీ, ఇంధన పొదుపు రెండూ ఒకే ప్యాకేజీలో ఎలా ఉండవచ్చో స్పష్టంగా నిరూపించింది.