E-Paper
బ్లింకిట్‌లో సోనియా గాంధీ ఆత్మకథ: 8 నిమిషాల్లోనే డెలివరీ
కాంగ్రెస్ సీనియర్ నేత సోనియా గాంధీ ఆత్మకథ 'బిలాంగింగ్: ఎ జర్నీ ఆఫ్ లవ్' డిజిటల్ ప్లాట్‌ఫామ్ బ్లింకిట్‌లో అందుబాటులోకి వచ్చింది. 35 శాతం డిస్కౌంట్‌తో పాటు కేవలం 8 నిమిషాల్లోనే పుస్తకాన్ని ఇంటికి డెలివరీ చేస్తూ క్విక్ కామర్స్ సంస్థలు సరికొత్త సంచలనం సృష్టిస్తున్నాయి.
Prefer HTon Google
కాంగ్రెస్ సీనియర్ నేత సోనియా గాంధీ రాసిన ఆత్మకథ ‘బిలాంగింగ్: ఎ జర్నీ ఆఫ్ లవ్’ (Belonging: A Journey of Love) మార్కెట్లోకి వచ్చిన వెంటనే వినూత్న రీతిలో పాఠకులకు చేరువవుతోంది. ఇప్పటివరకు కేవలం నిత్యావసరాలు, పండ్లు, కూరగాయలు, ఎలక్ట్రానిక్స్ డెలివరీకే పరిమితమైన క్విక్ కామర్స్ దిగ్గజం బ్లింకిట్ (Blinkit) ఇప్పుడు పుస్తకాల విక్రయ రంగంలోకి అడుగుపెట్టింది. సోనియా గాంధీ పుస్తకం విడుదలైన రోజే బ్లింకిట్ ప్లాట్‌ఫామ్‌లో లిస్ట్ కావడం విశేషం.
35 శాతం డిస్కౌంట్.. 8 నిమిషాల్లో డెలివరీ
బ్లింకిట్ యాప్‌లో ఈ పుస్తకం అసలు ధర రూ.1,299 కాగా, 35 శాతం రాయితీతో రూ. 849కే అందుబాటులో ఉంచారు. ఆర్డర్ చేసిన కేవలం 8 నిమిషాల్లోనే ఈ హార్డ్‌కవర్ పుస్తకాన్ని డెలివరీ చేస్తున్నట్లు కంపెనీ ప్రకటించింది. సౌత్ ఢిల్లీలోని కొన్ని ప్రాంతాల్లో స్టాక్ వేగంగా అయిపోవడంతో 'అవుట్ ఆఫ్ స్టాక్' అని కనిపించింది.
ఈ-కామర్స్ దిగ్గజం అమెజాన్‌లో ఆర్డర్ చేస్తే డెలివరీకి దాదాపు 48 గంటల సమయం పడుతుండగా, బ్లింకిట్ కేవలం నిమిషాల వ్యవధిలోనే డెలివరీ అందిస్తూ పాఠకులను ఆకట్టుకుంటోంది. పుస్తక ప్రియులను ఆకర్షించేందుకు క్విక్ కామర్స్ ప్లాట్‌ఫామ్‌లు ఎంత వేగంగా తమ సేవలను విస్తరిస్తున్నాయో ఈ పరిణామం స్పష్టం చేస్తోంది.
దేశవ్యాప్తంగా అధికారిక విడుదల
హార్పర్ కాలిన్స్ ఇండియా (HarperCollins India) ప్రచురించిన ఈ పుస్తకం మంగళవారం ఉదయం 10 గంటల నుంచి దేశవ్యాప్తంగా ప్రధాన పుస్తక విక్రయ కేంద్రాలలో లభ్యమవుతోంది. ఢిల్లీలోని బహ్రీసన్స్, మిడ్‌లాండ్, చెన్నైలోని హిగ్గిన్‌బోథమ్స్‌తో పాటు వివిధ రాష్ట్రాల్లోని క్రాస్‌వర్డ్ అవుట్‌లెట్లలో దీని విక్రయాలు ప్రారంభమయ్యాయి.
గతంలో ఐఫోన్ కొత్త మోడళ్లను కేవలం 10 నిమిషాల్లో డెలివరీ చేసి సంచలనం సృష్టిం‌చిన బ్లింకిట్, ఇప్పుడు ప్రీమియం విభాగాలు, ప్రత్యేకమైన ఉత్పత్తుల విభాగంలోనూ వేగవంతమైన డెలివరీతో పోటీదారుల కంటే ముందంజలో ఉండేందుకు వ్యూహాత్మకంగా వ్యవహరిస్తోంది.
వివాదాలు దాటుకుని మార్కెట్లోకి..
ఈ 544 పేజీల పుస్తకంలో సోనియా గాంధీ తన బాల్యం, ఇటలీ నుంచి బ్రిటన్ ప్రయాణం, రాజీవ్ గాంధీతో పరిచయం, పెళ్లి, భారతదేశంలోకి అడుగుపెట్టిన పరిస్థితుల నుంచి రాజకీయాధికారంలోకి రావడం వరకు అనేక విషయాలను సవివరంగా చర్చించారు. ఇందిరా గాంధీ, రాజీవ్ గాంధీ హత్యల నాటి విషాదకర ఘట్టాలను కూడా ఆమె పంచుకున్నారు.
కాగా, ఈ పుస్తక ప్రచురణ గురించి మొదట్లో పెంగ్విన్ రాండమ్ హౌస్ ఇండియా సంస్థ చర్చలు జరిపినప్పటికీ, ఆ తర్వాత ఆ ఒప్పందం ముందుకు సాగలేదు. దాంతో హార్పర్ కాలిన్స్ ఇండియా ఈ పుస్తకాన్ని ప్రచురించేందుకు ముందుకు వచ్చి మార్కెట్లోకి తీసుకొచ్చింది.
