చక్కెర ధర పెరిగింది.. కంపెనీలకు తీపి కబురు.. 6 శాతం పెరిగిన షుగర్ స్టాక్స్

రాబోయే పండుగల సీజన్‌ను దృష్టిలో ఉంచుకుని పంచదార నిల్వలపై ప్రభుత్వం కఠిన పరిమితులు విధించడంతో చక్కెర కంపెనీల షేర్లు విపరీతంగా పెరిగాయి. మార్కెట్లో చక్కెర హోల్ సేల్ ధరలు రికార్డు స్థాయికి చేరడం, రాబోయే రోజుల్లో సరఫరా కొరత ఏర్పడే అవకాశాలు ఉండటమే ఇందుకు ప్రధాన కారణం.

పండుగల సీజన్ దగ్గరపడుతున్న వేళ దేశీయంగా పంచదార ధరలు రికార్డు స్థాయికి చేరుతుండటంతో కేంద్ర ప్రభుత్వం కీలక నిర్ణయం తీసుకుంది. పంచదార వ్యాపారుల వద్ద ఉండే నిల్వలపై కఠిన పరిమితులను విధిస్తూ ఉత్తర్వులు జారీ చేసింది. ప్రభుత్వ ప్రకటన వెలువడిన వెంటనే ఆగస్టు 20న స్టాక్ మార్కెట్లో చక్కెర కంపెనీల షేర్లు భారీగా పుంజుకున్నాయి. ద్వారికేష్ షుగర్ ఇండస్ట్రీస్ షేరు అత్యధికంగా 6.3 శాతం లాభపడగా, ధాంపూర్ షుగర్ 6 శాతం, బజాజ్ హిందుస్థాన్ 5.3 శాతం, శ్రీ రేణుకా షుగర్స్ 4 శాతం, బలరాంపూర్ చిని మిల్స్ 3 శాతం వరకు లాభాలతో రాణించాయి.

చక్కెర ధర పెరిగింది.. కంపెనీలకు తీపి కబురు.. 6 శాతం పెరిగిన షుగర్ స్టాక్స్

ప్రభుత్వం సవరించిన నూతన నిబంధనల ప్రకారం, నెలకు 10 మెట్రిక్ టన్నుల కంటే ఎక్కువ పంచదారను కొనుగోలు చేసే డీలర్లు తమ వద్ద గరిష్టంగా 15 రోజులకు సరిపడా సరుకును మాత్రమే నిల్వ ఉంచుకోవాల్సి ఉంటుంది. ఈ కొత్త పరిమితులు సెప్టెంబర్ 1 నుంచి నవంబర్ 30 వరకు అమలులో ఉంటాయి. ఈ సమయంలో ప్రతినెలా జరిగే చక్కెర విక్రయాలను ప్రభుత్వం నిశితంగా పరిశీలించనుంది.

విపరీతంగా పెరిగిన హోల్‌సేల్, రిటైల్ ధరలు

ప్రస్తుతం దేశీయ హోల్‌సేల్ మార్కెట్‌లో పంచదార ధరలు ఆందోళనకర రీతిలో పెరిగాయి. కాన్పూర్, కోల్‌కతా వంటి ప్రధాన మార్కెట్లలో క్వింటాల్ పంచదార ధర రూ. 6,000 మార్కును దాటిపోయింది. ముజఫర్‌పూర్, కొల్హాపూర్ ప్రాంతాల్లో క్వింటాల్ సగటు ధర రూ. 5,000 కంటే ఎక్కువగా నమోదైంది. గత ఏడాది క్వింటాల్ ఎక్స్-మిల్ సగటు ధర రూ. 3,900గా ఉండగా, ప్రస్తుతం అది రూ. 5,400 నుంచి రూ. 5,500 వరకు చేరింది. ఇక రిటైల్ మార్కెట్‌లోనూ ధరల మంట కొనసాగుతోంది. ఆగస్టు 18 నాటికి కిలో పంచదార రిటైల్ ధర గతేడాదితో పోలిస్తే 13 శాతం పెరిగి రూ. 52.30 వద్ద నమోదైనట్లు నివేదికలు చెబుతున్నాయి.

సరఫరాపై ఆందోళనలు - వర్షభావ ప్రభావం

అక్టోబర్ 1 నుంచి ప్రారంభమయ్యే 2026-27 చక్కెర సీజన్‌లో దేశీయంగా పంచదార లభ్యతపై తీవ్ర ఆందోళనలు వ్యక్తమవుతున్నాయి. దేశీయంగా ప్రతినెలా సగటున 50 లక్షల టన్నుల అవసరం ఉండగా, సీజన్ ప్రారంభంలో 40 నుంచి 42 లక్షల టన్నుల నిల్వలు మాత్రమే అందుబాటులో ఉండవచ్చని పరిశ్రమ అంచనా వేస్తోంది. కొందరు విశ్లేషకులైతే ఇది మరింత తగ్గి 32 నుంచి 35 లక్షల టన్నులకు పరిమితమయ్యే ప్రమాదం ఉందని హెచ్చరిస్తున్నారు.

మరోవైపు సరిగ్గా పడని వర్షాలు, పొడి వాతావరణం చెరకు దిగుబడిపై తీవ్ర ప్రతికూల ప్రభావాన్ని చూపాయి. రాబోయేది పండుగల కాలం కావడం, భారతదేశంలో రాజకీయంగా పంచదార అత్యంత సున్నితమైన అంశం కావడంతో ప్రభుత్వం ఇప్పటి నుంచే కఠిన చర్యలకు దిగింది.

మిల్లులకు లాభాల పంట - నిపుణులు ఏమంటున్నారు?

సాధారణంగా డిమాండ్-సరఫరా మధ్య వ్యత్యాసం పెరిగి ధరలు పెరగడం చక్కెర మిల్లులకు లాభదాయకమని ఎస్‌బీఐ సెక్యూరిటీస్ ఫండమెంటల్ రీసెర్చ్ హెడ్ సన్నీ తెలిపారు. ఉత్తరప్రదేశ్‌లో ఎక్స్-ఫ్యాక్టరీ ధర కిలో రూ. 54-55, మహారాష్ట్రలో రూ. 46గా ఉంటే, మిల్లుల వద్ద కిలో రూ. 37 నాటి తక్కువ ఖర్చుతో కూడిన పాత నిల్వలు ఉన్నాయి. ఈ పెంపు వల్ల మిల్లులకు మంచి లాభాలు వస్తాయని ఆయన విశ్లేషించారు.

గత మూడేళ్లుగా ఇథనాల్ ధరల్లో ఎలాంటి మార్పు లేకపోవడంతో ఆ విభాగంలో ఎదురవుతున్న నష్టాల ఒత్తిడిని ఈ చక్కెర ధరల పెరుగుదల భర్తీ చేస్తుందని సన్నీ అగర్వాల్ స్పష్టం చేశారు. షుగర్ రంగంలో బలరాంపూర్ చిని, త్రివేణి ఇంజనీరింగ్, ఈఐడీ ప్యారీ షేర్లు సానుకూలంగా ఉన్నాయని ఆయన పేర్కొన్నారు.

అయితే, పెరిగే ధరలను అదుపు చేసేందుకు ప్రభుత్వం 10 లక్షల టన్నుల రా-షుగర్ (పచ్చి చక్కెర) ను పన్ను రహిత దిగుమతులకు అనుమతించే అవకాశం ఉందనే విషయాన్ని గుర్తుంచుకోవాలని ఆయన హెచ్చరించారు. "ప్రభుత్వం కనుక ఏదైనా కొత్త నిబంధనలతో జోక్యం చేసుకుంటే ధరల్లో మళ్లీ క్షీణత వచ్చి షుగర్ షేర్లు పడిపోవచ్చు" అని సన్నీ అగర్వాల్ వ్యాఖ్యానిస్తూ, ఇన్వెస్టర్లు కచ్చితమైన స్టాప్-లాస్ స్థాయిలను పాటించాలని సూచించారు.