సీఈసీ ఏకపక్ష నిర్ణయాలపై సుప్రీంకోర్టు కీలక ఆదేశాలు.. కేంద్రం, ఈసీలకు నోటీసులు

కేంద్ర ఎన్నికల సంఘం ప్రధాన కమిషనర్ (సీఈసీ) జ్ఞానేష్ కుమార్ ఇతర కమిషనర్ల ఆమోదం లేకుండా ఏకపక్షంగా నిర్ణయాలు తీసుకుంటున్నారన్న పిటిషన్‌పై సుప్రీంకోర్టు తీవ్రంగా స్పందించింది. ఈ వ్యవహారంపై వారంలోగా వివరణ ఇవ్వాలని కేంద్ర ప్రభుత్వం, ఎన్నికల సంఘాన్ని ఆదేశిస్తూ నోటీసులు జారీ చేసింది.

కేంద్ర ఎన్నికల సంఘంలో (ఈసీ) నిర్ణయాల ప్రక్రియ, సీఈసీ వైఖరిపై దాఖలైన ప్రజాప్రయోజనాల వ్యాజ్యం (పిల్) పట్ల అత్యున్నత న్యాయస్థానం స్పందించింది. మిగతా ఇద్దరు ఎన్నికల కమిషనర్ల ప్రమేయం లేకుండా సీఈసీ జ్ఞానేష్ కుమార్ నిర్ణయాలు తీసుకుంటున్నారన్న ఆరోపణలపై కేంద్ర ప్రభుత్వం, ఎన్నికల సంఘానికి నోటీసులు పంపింది. ఒక వారంలోగా తమ సమాధానం తెలియజేయాలని ఆదేశించింది.

ధర్మాసనం కీలక వ్యాఖ్యలు

సీఈసీ ఏకపక్ష నిర్ణయాలపై సుప్రీంకోర్టు కీలక ఆదేశాలు.. కేంద్రం, ఈసీలకు నోటీసులు

భారత ప్రధాన న్యాయమూర్తి (సీజేఐ) జస్టిస్ సూర్యకాంత్, జస్టిస్ జాయ్‌మాల్యా బాగ్చీ, జస్టిస్ వి. మోహనలతో కూడిన త్రిసభ్య ధర్మాసనం ఈ విచారణ చేపట్టింది. పిటిషనర్ తరఫున సీనియర్ అడ్వకేట్ వికాస్ సింగ్ వాదనలు వినిపించారు.

"ఎన్నికల కమిషన్ తీసుకునే నిర్ణయాలు ఏకగ్రీవంగా కానీ లేదా మెజారిటీ అభిప్రాయంతో కానీ ఉండాలి. సాధారణంగా అన్ని నిర్ణయాలు అలాగే జరుగుతాయని మేము భావిస్తున్నాం" అని విచారణ సందర్భంగా ధర్మాసనం వ్యాఖ్యానించింది.

పిటిషన్‌లోని ప్రధాన విజ్ఞప్తులు

పాట్నాకు చెందిన రాకేష్ కుమార్ సింగ్ ఈ పిల్ దాఖలు చేశారు. చట్టబద్ధంగా ఎన్నికల సంఘం మొత్తానికి ఉండే అధికారాలను సీఈసీ జ్ఞానేష్ కుమార్ ఒక్కరే చెలాయిస్తున్నారా అనే విషయాన్ని తేల్చాలని కోరారు. ఒకవేళ అది నిజమైతే ఆయన తీసుకున్న నిర్ణయాలను అనధికారికమైనవిగా ప్రకటించి తగిన చర్యలు తీసుకోవాలని విన్నవించారు.

ఈ కేసుపై తుది విచారణ పూర్తయ్యే వరకు జ్ఞానేష్ కుమార్ సీఈసీగా విధులు నిర్వహించకుండా నిరోధించాలని పిటిషనర్ కోరారు. ఆ సమయంలో ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషిల ఏకగ్రీవ నిర్ణయాలతో ఈసీ కార్యకలాపాలు సాగేలా ఆదేశించాలని విజ్ఞప్తి చేశారు. ఒకవేళ సీఈసీ పదవి ఖాళీ అయితే, సీజేఐ సభ్యుడిగా ఉండే కమిటీ సిఫార్సుల మేరకు నూతన నియామకం జరగాలని పేర్కొన్నారు.

14 సార్లు అభ్యంతరాలు.. రికార్డుల నమోదు

అయితే ఈ అంశంపై ఎన్నికల సంఘం వివరణ ఇస్తూ.. రాజ్యాంగబద్ధమైన వ్యవస్థలలో వేర్వేరు అభిప్రాయాలు ఉండటం సహజమని, తమ ఉత్తర్వులన్నీ చట్టబద్ధమైన విధానాల ప్రకారమే వెలువడ్డాయని వెల్లడించింది.