Tata Cars waiting period : టాటా కార్ల డెలివరీ వెయిటింగ్ పీరియడ్- ఏ మోడల్‌కు ఎంత సమయం పడుతోంది?

టాటా మోటార్స్ కార్ల వెయిటింగ్ పీరియడ్స్ వివరాలు అందుబాటులోకి వచ్చాయి. పెట్రోల్, డీజిల్, సీఎన్జీ కార్లు త్వరగా డెలివరీకి వస్తుండగా కొన్ని ఎలక్ట్రిక్ మోడళ్లకు మాత్రం 24 వారాల వరకు వెయిటింగ్ పీరియడ్ ఉంది! పూర్తి వివరాలను ఇక్కడ చూసేయండి..

టాటా మోటార్స్​ కార్లు కొనాలని లేదా డెలివరీ కోసం ఎదురుచూస్తున్న కస్టమర్లకు అప్డేట్. పెట్రోల్, డీజిల్, సీఎన్జీ, ఎలక్ట్రిక్ వాహనాల పోర్ట్‌ఫోలియోలో వివిధ మోడళ్లను బట్టి వెయిటింగ్ పీరియడ్ మారుతూ వస్తోంది. కొన్ని కార్లు కేవలం ఒకటి రెండు వారాల్లోనే డెలివరీ అవుతుండగా, ఎలక్ట్రిక్ వెర్షన్లలో మాత్రం కొన్ని మోడళ్లకు గరిష్టంగా 24 వారాల వరకు వేచి ఉండాల్సి వస్తోంది.

టాటా కార్ల వెయిటింగ్ పీరియడ్ వివరాలు..

త్వరగా డెలివరీకి లభించే టాటా కార్లు..

టాటా మోటార్స్​కు సంబంధించి.. టిగోర్, ఆల్ట్రోజ్ కార్లు అత్యంత వేగంగా కస్టమర్ల చేతికి చేరుతున్నాయి. అన్ని పవర్‌ట్రెయిన్ ఆప్షన్లలో ఈ రెండు కార్లకు కేవలం 1 నుంచి 2 వారాల వెయిటింగ్ పీరియడ్ మాత్రమే ఉంది. కర్వ్ ఈవీ కూడా ఇదే జాబితాలో ఉండగా, నెక్సాన్ పెట్రోల్, సీఎన్జీ వెర్షన్లు కూడా ఇదే సమయ వ్యవధిలో అందుబాటులో ఉన్నాయి. కర్వ్ పెట్రోల్ మోడల్ కూడా త్వరగానే డెలివరీకి లభిస్తోంది. అయితే దీని డీజిల్ వెర్షన్ల మాత్రం 2 నుంచి 3 వారాలు వెయిటింగ్ పీరియడ్​ తర్వతో అందుబాటులోకి వస్తోంది.

కాస్త వెయిటింగ్ పీరియడ్ ఉన్న మోడల్స్..

టాటా మోటార్స్‌కు చెందిన కొన్ని ప్యాసింజర్ వెహికల్స్ మోస్తరు డెలివరీ టైమ్‌లైన్‌ను కలిగి ఉన్నాయి. నెక్సాన్ డీజిల్, నెక్సాన్ ఈవీ కార్లకు 3 నుంచి 4 వారాల వెయిటింగ్ పీరియడ్ ఉంది. టియాగో పెట్రోల్, సీఎన్జీ స్మార్ట్ వేరియంట్లకు 10 నుంచి 12 వారాల సమయం పట్టగా, ఇతర ట్రిమ్‌లు 4 నుంచి 6 వారాల్లో లభిస్తాయి. పంచ్ పెట్రోల్, సీఎన్జీ స్మార్ట్ వేరియంట్లకు 10 నుంచి 12 వారాలు కాగా, మిగిలిన వెర్షన్లకు 6 నుంచి 7 వారాల సమయం పడుతోంది. సియెర్రా ఐసీఈ పెట్రోల్ ఎన్ఏ స్మార్ట్ వేరియంట్ 6 నుంచి 8 వారాల్లో డెలివరీ అవుతుండగా, ఇతర పెట్రోల్, డీజిల్ వెర్షన్లు 2 నుంచి 6 వారాల్లో అందుబాటులో ఉన్నాయి.

ఎస్‌యూవీల వెయిటింగ్ వివరాలు..

టాటా ఎస్‌యూవీ శ్రేణిలో పెట్రోల్, డీజిల్, ఎలక్ట్రిక్ వేరియంట్లను బట్టి డెలివరీ సమయాలు మారుతున్నాయి. హారియర్ పెట్రోల్, సఫారీ పెట్రోల్ మోడళ్లకు 10 నుంచి 12 వారాల వెయిటింగ్ పీరియడ్ ఉండగా, వాటి డీజిల్ వెర్షన్లు మాత్రం కేవలం 2 నుంచి 3 వారాల్లోనే డెలివరీ అవుతున్నాయి. హారియర్ ఈవీ అన్ని వేరియంట్లలోనూ 2 నుంచి 3 వారాల తక్కువ డెలివరీ టైమ్‌లైన్‌ను కలిగి ఉంది.

టాటా ఈవీలకు భారీగా పెరిగిన వెయిటింగ్ పీరియడ్..

టాటా ఎలక్ట్రిక్ మోడళ్ల విషయంలోనే అత్యధిక వెయిటింగ్ పీరియడ్ నడుస్తోంది. టియాగో ఈవీ స్మార్ట్ 19, ప్యూర్+ 19 వేరియంట్లకు 18 నుంచి 24 వారాల సమయం పడుతుండగా, ఇతర ట్రిమ్‌లు 4 నుంచి 6 వారాల్లో లభిస్తున్నాయి. పంచ్ ఈవీ స్మార్ట్ 30 కూడా 18 నుంచి 24 వారాల వెయిటింగ్ పీరియడ్‌ను కలిగి ఉంది. స్మార్ట్ 40 వేరియంట్‌కు 10 నుంచి 12 వారాలు, ఇతర వేరియంట్లకు 8 నుంచి 10 వారాలు పడుతుంది. సియెర్రా ఈవీ ప్యూర్ 65 మోడల్ 12 నుంచి 15 వారాల్లో డెలివరీ అవుతోంది.

అంటే.. ఐసీఈ, సీఎన్జీ మోడళ్లతో పోలిస్తే టాటా ఎలక్ట్రిక్ వాహనాలకే ఎక్కువ సమయం పడుతున్నట్లు స్పష్టమవుతోంది. టిగోర్, ఆల్ట్రోజ్, హారియర్, సఫారీ డీజిల్ మోడళ్లు త్వరగా అందుబాటులోకి వస్తుండగా, టియాగో ఈవీ, పంచ్ ఈవీ మోడళ్లు మాత్రం ఎక్కువ ఆలస్యమవుతున్నాయి.

మరి వీటిల్లో మీరు ఏ టాటా కారు కొనుగోలు చేస్తున్నారు?