స్టాలిన్‌ను కలిసిన సీఎం విజయ్.. ఆత్మీయ ఆలింగనం చేసుకున్న నేతలు

తమిళనాడు నూతన ముఖ్యమంత్రిగా అఖండ విజయం సాధించిన జోసెఫ్ విజయ్, పదవి చేపట్టిన మరుసటి రోజే మాజీ సీఎం ఎంకే స్టాలిన్‌ను కలిశారు. ఎన్నికల నాటి రాజకీయ వైరాన్ని పక్కనపెట్టి, ప్రజాస్వామ్య విలువలను చాటుతూ సాగిన ఈ మర్యాదపూర్వక భేటీ ఇప్పుడు దేశవ్యాప్తంగా చర్చనీయాంశమైంది.

తమిళనాడు రాజకీయ ముఖచిత్రం ఇప్పుడు పూర్తిగా మారిపోయింది. వెండితెరపై 'దళపతి'గా కోట్లాది మంది నీరాజనాలు అందుకున్న జోసెఫ్ విజయ్, ఇప్పుడు ప్రజాక్షేత్రంలో ముఖ్యమంత్రిగా తన సరికొత్త ప్రయాణాన్ని ప్రారంభించారు. ఆదివారం నాడు సీఎంగా ప్రమాణ స్వీకారం చేసిన విజయ్, సోమవారం నాడు ఒక గొప్ప రాజకీయ సంప్రదాయానికి తెరలేపారు. తన సమీప ప్రత్యర్థి, మాజీ ముఖ్యమంత్రి, డీఎంకే అధినేత ఎంకే స్టాలిన్‌ను ఆయన నివాసంలో కలుసుకున్నారు.

స్టాలిన్ ఇంటికి చేరుకున్న ముఖ్యమంత్రి విజయ్ (PTI)

రాజకీయాల్లో యుద్ధం కేవలం ఎన్నికల వరకేనని, వ్యక్తిగత గౌరవం అంతకంటే మిన్న అని నిరూపిస్తూ సాగిన ఈ భేటీకి సంబంధించిన దృశ్యాలు ఇప్పుడు సోషల్ మీడియాలో వైరల్ అవుతున్నాయి.

వైరం పక్కనపెట్టి.. ఆత్మీయ పలకరింపు

గత ఏప్రిల్ 23న జరిగిన అసెంబ్లీ ఎన్నికల్లో డీఎంకే (DMK), విజయ్ నేతృత్వంలోని తమిళగ వెట్రి కళగం (TVK) మధ్య అత్యంత హోరాహోరీ పోరు నెలకొంది. ప్రచార పర్వంలో ఒకరిపై ఒకరు విమర్శల తూటాలు పేల్చుకున్నప్పటికీ, ఫలితాల తర్వాత మాత్రం పరిస్థితులు పూర్తిగా మారిపోయాయి. డీఎంకే కోటను బద్దలు కొట్టి, చారిత్రాత్మక విజయం సాధించిన విజయ్, బాధ్యతలు చేపట్టిన వెంటనే స్టాలిన్ వద్దకు వెళ్లడం ఒక పరిణతి చెందిన నాయకుడి లక్షణంగా విశ్లేషకులు అభివర్ణిస్తున్నారు.

ఉదయనిధి స్వాగతం.. స్టాలిన్ ఆలింగనం

ముఖ్యమంత్రి విజయ్‌కు స్టాలిన్ నివాసం వద్ద సాదర స్వాగతం లభించింది. మాజీ ఉప ముఖ్యమంత్రి ఉదయనిధి స్టాలిన్ స్వయంగా విజయ్‌ను ఆహ్వానించారు. వీరిద్దరూ ఆత్మీయంగా కరచాలనం చేసుకోవడమే కాకుండా, ఒకరినొకరు కౌగిలించుకుని శుభాకాంక్షలు తెలుపుకున్నారు. ఆ తర్వాత ఎంకే స్టాలిన్ కూడా విజయ్‌ను ఆలింగనం చేసుకుని, ముఖ్యమంత్రిగా ఆయన ప్రయాణం విజయవంతం కావాలని ఆకాంక్షించారు. ఈ సందర్భంగా నేతలు పట్టు శాలువాలు కప్పుకుని, పుష్పగుచ్ఛాలు మార్చుకున్నారు.

తమిళ రాజకీయాల్లో మారిన సమీకరణాలు

గడిచిన ఐదు దశాబ్దాలుగా డీఎంకే, ఏఐఏడీఎంకే (AIADMK) మధ్యే తిరుగుతున్న తమిళనాడు రాజకీయాల్లో విజయ్ రాక ఒక పెనుమార్పును తెచ్చింది. కేవలం గ్లామర్‌తోనే కాకుండా, పక్కా వ్యూహంతో రంగంలోకి దిగిన విజయ్.. అనతికాలంలోనే ప్రజల మద్దతు కూడగట్టారు. అధికార పీఠం దక్కించుకున్న వెంటనే ప్రతిపక్ష నేతను కలిసి గౌరవం ప్రదర్శించడం ద్వారా, రాష్ట్ర అభివృద్ధి కోసం అందరినీ కలుపుకుపోతాననే సంకేతాన్ని విజయ్ బలంగా పంపారు.

ఈ మర్యాదపూర్వక భేటీ కేవలం ఒక ఫార్మాలిటీ మాత్రమే కాదని, పాత తరం రాజకీయ అనుభవాన్ని, కొత్త తరం ఆకాంక్షలను మేళవించే దిశగా పడిన తొలి అడుగు అని రాజకీయ విశ్లేషకులు భావిస్తున్నారు.