Best selling SUV : కియా సోనెట్​ @5లక్షల సేల్స్​- ఎందుకు ఇది భారతీయుల ఫేవరెట్​ ఎస్​యూవీ?

భారత సబ్-కాంపాక్ట్ ఎస్‌యూవీ విభాగంలో కియా సోనెట్ విజయయాత్రను కొనసాగిస్తోంది. విడుదలైన అతి తక్కువ కాలంలోనే 5 లక్షల యూనిట్ల విక్రయాల మైలురాయిని దాటేసింది ఈ సోనెట్​. ఈ నేపథ్యంలో ఈ మోడల్​ క్లిక్​ అవ్వడానికి కారణాలను ఇక్కడ తెలుసుకోండి..

భారత ఆటోమొబైల్ మార్కెట్​లో కియా ఇండియా మరో అద్భుతమైన ఘనతను తన ఖాతాలో వేసుకుంది. దేశంలో అత్యధికంగా అమ్ముడవుతున్న సబ్-కాంపాక్ట్ ఎస్‌యూవీల్లో ఒకటిగా పేరుగాంచిన ‘కియా సోనెట్’.. తాజాగా 5 లక్షల యూనిట్ల విక్రయాల మైలురాయిని అధిగమించింది.

కియా సోనెట్​ ఎస్​యూవీ..

కియా సోనెట్​ ఎస్​యూవీ..

కియా కంపెనీ దేశీయ వృద్ధిలో సోనెట్ అత్యంత కీలక పాత్ర పోషిస్తోంది. ప్రస్తుతం ఈ దక్షిణ కొరియా కార్ల తయారీ సంస్థ సాధిస్తున్న మొత్తం విక్రయాల్లో కేవలం ఈ ఒక్క మోడల్ వాటాయే దాదాపు 35 శాతంగా ఉండటం విశేషం.

భారత్‌లోనే తయారవుతున్న సోనెట్.. ఇక్కడ మాత్రమే కాకుండా ప్రపంచవ్యాప్తంగా దాదాపు 70 శాతం దేశాలకు ఎగుమతి అవుతోంది. మిడిల్​ ఈస్ట్​, ఆఫ్రికా, మధ్య- దక్షిణ అమెరికా, మెక్సికోతో పాటు ఆసియా పసిఫిక్ మార్కెట్లలోనూ ఈ కారు దూసుకుపోతోంది. సెల్టోస్, కార్నివాల్ తర్వాత 2020 సెప్టెంబర్‌లో కియా నుంచి వచ్చిన మూడొవ మోడల్ ఇది.

తీవ్రమైన పోటీ ఉన్న ఈ విభాగంలోనూ సోనెట్ ఎస్​యూవీ ఇంతటి విజయం సాధించడానికి గల ప్రధాన 5 కారణాలను ఇక్కడ తెలుసుకోండి..

1. అదిరిపోయే ఫీచర్లు.. ప్రీమియం లుక్!

సోనెట్ ఎస్​యూవీ మార్కెట్​లోకి వచ్చిన మొదటి రోజు నుంచే తన విభాగంలో మరెక్కడా లేని ఫీచర్లతో సంచలనం సృష్టించింది. ఈ కారులో ఉన్న వెంటిలేటెడ్ ఫ్రంట్ సీట్లు, బోస్ ప్రీమియం ఆడియో సిస్టమ్, 10.25 ఇంచ్​ టచ్‌స్క్రీన్ ఇన్ఫోటైన్‌మెంట్ సిస్టమ్ వంటివి కస్టమర్లను అమితంగా ఆకర్షించాయి. ముఖ్యంగా టెక్నాలజీకి ప్రాధాన్యత ఇచ్చే నేటి యువత మనసును సోనెట్ గెలుచుకుంది.

2. ఇంజన్- గేర్ బాక్స్ ఎంపికలో వైవిధ్యం

వినియోగదారుల అవసరాలకు తగ్గట్టుగా కియా సోనెట్ ఎస్​యూవీ అనేక రకాల ఇంజన్ ఆప్షన్లను అందిస్తోంది.

1.2 లీటర్ పెట్రోల్ ఇంజన్.

1.0 లీటర్ టర్బోచార్జ్డ్ పెట్రోల్ ఇంజన్.

1.5 లీటర్ డీజిల్ ఇంజన్.

గేర్ బాక్స్ విషయానికి వస్తే మాన్యువల్, ఐఎంటీ, 7-స్పీడ్ డ్యూయల్ క్లచ్, ఆటోమేటిక్ వేరియంట్లలో ఇది లభిస్తుంది. సిటీలో తిరిగే వారికి, హైవేలపై లాంగ్ డ్రైవ్ వెళ్లే వారికి ఇది సరైన ఎంపికగా నిలుస్తోంది.

3. భద్రతకే మా ప్రాధాన్యం

ఫ్యామిలీ ఎస్​యూవీగా పేరు తెచ్చుకున్న ఈ సోనెట్​ భద్రత విషయంలో కియా ఎక్కడా రాజీ పడలేదు. ఇందులోని అన్ని వేరియంట్లలో 6 ఎయిర్‌బ్యాగ్‌లు, ఏబీఎస్ విత్ ఈబీడీ, ఎలక్ట్రానిక్ స్టెబిలిటీ కంట్రోల్, హిల్‌ స్టార్ట్ అసిస్ట్ వంటి 15 రకాల స్టాండర్డ్ సేఫ్టీ ఫీచర్లు ఉన్నాయి. 2024లో లెవల్-1 అడాస్​ ఫీచర్లను కూడా చేర్చి భద్రతను మరింత పెంచారు.

4. అన్ని బడ్జెట్లకు తగిన వేరియంట్లు

సోనెట్​లో దాదాపు 18 నుంచి 23 వరకు విభిన్న వేరియంట్లు అందుబాటులో ఉన్నాయి. సామాన్యులకు అందుబాటులో ఉండే హెచ్‌టీఈ వేరియంట్​ నుంచి విలాసవంతమైన ఎక్స్-లైన్ (X-Line) వరకు కియా ఆప్షన్లను ఇస్తోంది. దీని ధర రూ. 7.30 లక్షల నుంచి రూ. 18.80 లక్షల (ఎక్స్-షోరూమ్) మధ్యలో ఉండటం వల్ల మారుతీ సుజుకీ బ్రెజ్జా, టాటా నెక్సాన్ వంటి దిగ్గజాలకు ఇది గట్టి పోటీనిస్తోంది.

5. కాంపాక్ట్ డిజైన్.. ప్రాక్టికల్ యూసేజ్

చూడటానికి ఎంతో మస్క్యులర్​ ఉండే సోనెట్, రోడ్డుపై వెళుతుంటే ఒక గంభీరమైన రూపాన్ని ఇస్తుంది. 4 మీటర్ల కంటే తక్కువ పొడవు ఉండటం వల్ల నగరాల్లో ట్రాఫిక్ ఇబ్బందులు లేకుండా డ్రైవ్ చేయడానికి, ఇరుకైన ప్రదేశాల్లో పార్కింగ్ చేయడానికి ఇది ఎంతో సౌకర్యవంతంగా ఉంటుంది. నిత్యం సిటీలో ప్రయాణించే వారికి ఇది ఒక వరమని చెప్పవచ్చు.