E-Paper
భారత్లోకి 3 విదేశీ యూనివర్సిటీలు.. ప్రవేశాలకు యూజీసీ గ్రీన్ సిగ్నల్
భారతదేశాన్ని గ్లోబల్ ఎడ్యుకేషన్ హబ్గా మార్చే లక్ష్యంలో భాగంగా.. యూకే, ఆస్ట్రేలియాలకు చెందిన మూడు ప్రతిష్టాత్మక విదేశీ విశ్వవిద్యాలయాలు భారత్లో తమ క్యాంపస్లను ఏర్పాటు చేయడానికి విశ్వవిద్యాలయ నిధుల సంఘం (UGC) అనుమతి ఇచ్చింది.
భారత ఉన్నత విద్యా రంగంలో సరికొత్త అధ్యాయం మొదలైంది. జాతీయ విద్యా విధానం (NEP) 2020 ఆశయాలకు అనుగుణంగా, దేశీయంగా అంతర్జాతీయ స్థాయి విద్యను అందించేందుకు మూడు ప్రముఖ విదేశీ విశ్వవిద్యాలయాలకు కేంద్ర విద్యా మంత్రిత్వ శాఖ అనుమతి పత్రాలను (Letters of Approval - LoAs) మంజూరు చేసింది. ఇందులో బ్రిటన్కు చెందిన రెండు, ఆస్ట్రేలియాకు చెందిన ఒక వర్సిటీ ఉన్నాయి. విదేశాలకు వెళ్లకుండానే భారతీయ విద్యార్థులకు అంతర్జాతీయ ప్రమాణాలతో కూడిన విద్యను అందించేందుకు యూజీసీ ఈ కీలక నిర్ణయం తీసుకుంది.
ఏయే యూనివర్సిటీలు? ఎక్కడెక్కడ?
కేంద్ర విద్యా మంత్రిత్వ శాఖ వెల్లడించిన వివరాల ప్రకారం.. భారత్లో క్యాంపస్లు ఏర్పాటు చేయబోతున్న ఆ మూడు విదేశీ యూనివర్సిటీల వివరాలు ఇవే:
- యూనివర్సిటీ ఆఫ్ బ్రిస్టల్ (University of Bristol - UK): ఈ బ్రిటన్ వర్సిటీ ముంబైలో తన క్యాంపస్ను ఏర్పాటు చేయనుంది.
- యూనివర్సిటీ ఆఫ్ యార్క్ (University of York - UK): ఇది కూడా ముంబై వేదికగానే తన తొలి విదేశీ క్యాంపస్ను ప్రారంభించబోతోంది.
- యూనివర్సిటీ ఆఫ్ న్యూ సౌత్ వేల్స్ (University of New South Wales - Australia): ఆస్ట్రేలియాకు చెందిన ఈ ప్రతిష్టాత్మక వర్సిటీ ఐటీ హబ్ బెంగళూరులో తన క్యాంపస్ను నిర్మించనుంది.
'నెప్ 2020' విజన్లో ఇదొక కీలక అడుగు: ధర్మేంద్ర ప్రధాన్
"ఈ మూడు అంతర్జాతీయ విశ్వవిద్యాలయాల రాక.. ఎన్ఈపీ 2020లో పేర్కొన్న విద్యా అంతర్జాతీయకరణ (Internationalisation of Education) విజన్ను ముందుకు తీసుకెళ్లడంలో కీలక అడుగు" అని కేంద్ర విద్యాశాఖ మంత్రి ధర్మేంద్ర ప్రధాన్ పేర్కొన్నారు. మన దేశంలో అత్యంత వేగంగా అభివృద్ధి చెందుతున్న నాలెడ్జ్, టెక్నాలజీ హబ్లైన ముంబై, బెంగళూరు నగరాల్లో ఈ క్యాంపస్లు ఏర్పాటు కావడం విశేషమన్నారు. ముఖ్యంగా తూర్పు ప్రపంచపు సిలికాన్ వ్యాలీగా గుర్తింపు పొందిన బెంగళూరులో ఆస్ట్రేలియా వర్సిటీ రావడం విద్యార్థులకు ఎంతో ప్రయోజనకరంగా మారుతుందని ఆయన ఆశాభావం వ్యక్తం చేశారు.
యూజీసీ నిబంధనల ప్రకారం.. విదేశీ వర్సిటీలు తమ స్వయంప్రతిపత్తిని, గ్లోబల్ స్టాండర్డ్స్ను కాపాడుకుంటూనే, ఇక్కడి నిబంధనలకు లోబడి పారదర్శకమైన కాలపరిమితితో క్యాంపస్లను నిర్వహించుకోవచ్చు.
ఏయే కోర్సులు అందుబాటులోకి రానున్నాయి?
ఈ మూడు యూనివర్సిటీలు నేటి గ్లోబల్ మార్కెట్ డిమాండ్కు అనుగుణంగా సరికొత్త కోర్సులను ఆఫర్ చేస్తున్నాయి.
యూనివర్సిటీ ఆఫ్ బ్రిస్టల్ (ముంబై క్యాంపస్): ఇమ్మర్సివ్ ఆర్ట్స్, ఫైనాన్స్, డేటా సైన్స్, ఎకనామిక్స్, బిజినెస్ మేనేజ్మెంట్, ఎంటర్ప్రెన్యూర్షిప్ అండ్ ఇన్నోవేషన్ వంటి కోర్సులను అందించనుంది.
యూనివర్సిటీ ఆఫ్ యార్క్ (ముంబై క్యాంపస్): ఫైనాన్స్, కంప్యూటర్ సైన్స్ విత్ ఆర్టిఫిషియల్ ఇంటెలిజెన్స్ (AI), సైబర్ సెక్యూరిటీ, బిజినెస్, ఎకనామిక్స్, క్రియేటివ్ ఇండస్ట్రీస్, మేనేజ్మెంట్ కోర్సులను ప్రవేశపెట్టబోతోంది.
యూనివర్సిటీ ఆఫ్ న్యూ సౌత్ వేల్స్ (UNSW బెంగళూరు): మాన్యత బిజినెస్ పార్క్లో ఆగస్టు నుంచే ఈ క్యాంపస్ ప్రారంభం కానుంది. ఇక్కడ బిజినెస్, కంప్యూటర్ సైన్స్, సైబర్ సెక్యూరిటీ, రెన్యూవబుల్ ఎనర్జీ (పునరుత్పాదక ఇంధనం), హెల్త్, ట్రాన్స్పోర్ట్, ఎడ్యుకేషన్ విభాగాల్లో కోర్సులు అందుబాటులో ఉంటాయి.
భారత్లోకి మరిన్ని విదేశీ వర్సిటీలు
ఇప్పటివరకు మొత్తం ఐదు విదేశీ ఉన్నత విద్యా సంస్థలకు యూజీసీ నుంచి అనుమతి పత్రాలు లభించాయి. వీటిలో 'యూనివర్సిటీ ఆఫ్ సౌతాంప్టన్', 'యూనివర్సిటీ ఆఫ్ లివర్పూల్' కూడా ఉన్నాయి. యూనివర్సిటీ ఆఫ్ సౌతాంప్టన్ ఇప్పటికే 2025-26 విద్యా సంవత్సరం నుంచే భారత్లో క్లాసులను ప్రారంభించింది.
దీనికి అదనంగా యూకే, యూఎస్, ఆస్ట్రేలియా, ఇటలీ దేశాలకు చెందిన మరో 10 అంతర్జాతీయ యూనివర్సిటీలకు యూజీసీ లెటర్స్ ఆఫ్ ఇంటెంట్ (LoIs) జారీ చేసింది. కాగా, గుజరాత్లోని గిఫ్ట్ సిటీ (GIFT City)లో డీకిన్ యూనివర్సిటీ, యూనివర్సిటీ ఆఫ్ వోలోంగాంగ్, క్వీన్స్ యూనివర్సిటీ బెల్ఫాస్ట్ విద్యా సంస్థలు ఇప్పటికే తమ కార్యకలాపాలను దిగ్విజయంగా నడుపుతున్నాయి.
