EB 5 Green Card fees అమెరికా గ్రీన్‌కార్డ్ దరఖాస్తుదారులకు షాక్: ఈబీ-5 ఫీజులు భారీగా పెంపు

అమెరికాలో పెట్టుబడుల ద్వారా గ్రీన్‌కార్డ్ పొందాలనుకునే విదేశీయులకు డొనాల్డ్ ట్రంప్ సర్కార్ భారీ షాక్ ఇచ్చింది. ఈబీ-5 (EB-5) వీసా ఫీజులను సగటున 70.7 శాతం పెంచుతూ నిర్ణయం తీసుకుంది. నవంబర్ 30 నుంచి ఈ కొత్త చార్జీలు అమల్లోకి రానున్నాయి.

చట్టబద్ధమైన వలసలపై నియంత్రణలు కఠినతరం చేస్తున్న డొనాల్డ్ ట్రంప్ యంత్రాంగం.. వీసా, గ్రీన్‌కార్డ్ నిబంధనల్లో కీలక మార్పులు చేస్తోంది. ఇందులో భాగంగా విదేశీ పెట్టుబడిదారులను ఆకర్షించే 'ఈబీ-5' (EB-5) ఇమ్మిగ్రెంట్ ఇన్వెస్టర్ ప్రోగ్రామ్ దరఖాస్తుల రుసుములను అమాంతం పెంచేసింది. అమెరికా పౌరసత్వ, వలసల సేవల సంస్థ (యూఎస్‌సీఐఎస్) పర్యవేక్షణలోని ఈబీ-5 విధానంలో దరఖాస్తు ప్రక్రియను మార్చుతూ డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (డీహెచ్‌ఎస్) కొత్త నిబంధనలు జారీ చేసింది.

ఈబీ-5 వీసా అంటే ఏమిటి?

అమెరికా గ్రీన్‌కార్డ్ దరఖాస్తుదారులకు షాక్: ఈబీ-5 ఫీజులు భారీగా పెంపు

అమెరికాలో వ్యాపారాలు ప్రారంభించి, స్థానికులకు ఉపాధి కల్పించే విదేశీయులకు శాశ్వత నివాస హోదా (గ్రీన్‌కార్డ్) కల్పించే అద్భుతమైన అవకాశం ఈబీ-5 వీసా. దీనికి అర్హత సాధించాలంటే ఎంపిక చేసిన ఏదైనా సంస్థలో కనీసం 1.05 మిలియన్ డాలర్లు పెట్టుబడి పెట్టాలి. అదే గ్రామీణ ప్రాంతాలు లేదా మౌలిక సదుపాయాల ప్రాజెక్టుల్లో (టార్గెటెడ్ ఎంప్లాయ్‌మెంట్ జోన్) అయితే 800,000 డాలర్లు ఇన్వెస్ట్ చేయాలి. వీటితో పాటు కనీసం 10 మందికి పూర్తిస్థాయి ఉద్యోగాలు కల్పించాలనేది ప్రధాన నిబంధన.

నవంబర్ 30 నుంచి కొత్త ఫీజులు షురూ

వచ్చే నెల అంటే నవంబర్ 30వ తేదీ లేదా ఆ తర్వాత పోస్ట్‌మార్క్ చేసే ప్రతి దరఖాస్తుకూ పెరిగిన ఫీజులే వర్తిస్తాయి. ఆలోపు పంపిన దరఖాస్తులను పాత ఫీజుల ప్రకారమే ప్రాసెస్ చేస్తారు. ఏటా సుమారు 16,600 ఈబీ-5 దరఖాస్తులపై ఈ పెరిగిన ఫీజుల ప్రభావం పడుతుందని డీహెచ్‌ఎస్ అంచనా వేస్తోంది. ఈ నిబంధన పరిధిలోకి వచ్చే తొమ్మిది దరఖాస్తు ఫారాలపై సగటున 70.7 శాతం మేర ఫీజు పెరిగింది. అంటే ప్రతి దరఖాస్తుకు అదనంగా సుమారు 2,946 డాలర్ల భారం పడనుంది. ఫారమ్‌ను బట్టి, అదనపు ఛార్జీలను బట్టి నిర్దిష్ట ఫీజుల పెంపు వేర్వేరుగా ఉంటుంది.

పెట్టుబడిదారులు ఎంత చెల్లించాలంటే..

రీజనల్ సెంటర్ ద్వారా పెట్టుబడిదారులు 'ఫారం ఐ-526ఈ' సమర్పిస్తే, టెక్నాలజీ ఛార్జీతో కలిపి 7,850 డాలర్లు చెల్లించాలి. దీనికి అదనంగా చెల్లించే 'ఈబీ-5 ఇంటిగ్రిటీ ఫండ్' ఫీజును 1,000 డాలర్ల నుంచి 1,100 డాలర్లకు పెంచారు. అదే ఫారం ఐ-526ఈ సవరణకు దరఖాస్తు చేస్తే 7,775 డాలర్లు చెల్లించాలి, దీనికి టెక్నాలజీ ఫీజు వర్తించదు. షరతుల తొలగింపు కోసం అర్హత కలిగిన పెట్టుబడిదారులు దాఖలు చేసే 'ఫారం ఐ-829' ఫీజును 3,750 డాలర్ల నుంచి 5,000 డాలర్లకు పెంచారు. దరఖాస్తులో చేర్చని కుటుంబ సభ్యులు ఎవరైనా ఉంటే, వారు విడిగా పిటిషన్లు సమర్పించాల్సి ఉంటుంది.

రీజనల్ సెంటర్లపై అదనపు భారం

కొత్త నిబంధనల ప్రకారం రీజనల్ సెంటర్ల వార్షిక ఫీజులు కూడా భారీగా పెరిగాయి. 20కి పైగా పెట్టుబడిదారులు ఉన్న సెంటర్ల ఫీజు 20,000 డాలర్ల నుంచి 22,000 డాలర్లకు చేరింది. 20 అంతకంటే తక్కువ మంది ఇన్వెస్టర్లు ఉన్నవాటికి ఈ ఫీజు 10,000 డాలర్ల నుంచి 11,000 డాలర్లకు పెరిగింది.

"ఈ ప్రోగ్రామ్‌లో ఆడిట్‌లు, సైట్ విజిట్‌లతో పాటు మోసాలను అరికట్టే విచారణల కోసమే ఈ ఫీజులను ఉపయోగిస్తాం" అని డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ స్పష్టం చేసింది.

నవంబర్ 1 నుంచి నవంబర్ 30 లోపు వార్షిక ఇంటిగ్రిటీ ఫండ్ ఫీజులు చెల్లించే రీజనల్ సెంటర్లకు 10 శాతం జరిమానా విధిస్తారు. అదే డిసెంబర్ 1 నుంచి డిసెంబర్ 30 మధ్య చెల్లిస్తే పెనాల్టీ 20 శాతానికి పెరుగుతుంది. డిసెంబర్ 30 లోగా ఫీజుతో పాటు జరిమానా చెల్లించని సెంటర్లు తమ గుర్తింపును కోల్పోయే ప్రమాదం ఉంది. కొత్తగా రీజనల్ సెంటర్ హోదా పొందేందుకు సమర్పించే 'ఫారం ఐ-956' దరఖాస్తు ఫీజును 44,115 డాలర్లకు, 'ఫారం ఐ-956ఎఫ్' ఫీజును 42,675 డాలర్లకు ఖరారు చేశారు.