అదరగొట్టిన విన్​ఫాస్ట్! భారతీయులకు మరో రెండు 5 స్టార్​ సేఫ్టీ రేటింగ్​ ఎలక్ట్రిక్​ కార్లు​..

వియత్నాం ఎలక్ట్రిక్ కార్ల దిగ్గజం 'విన్​ఫాస్ట్' భారత మార్కెట్​లో సత్తా చాటుతోంది. భారత్ ఎన్​సీఏపీ నిర్వహించిన క్రాష్ టెస్టుల్లో ఆ కంపెనీకి చెందిన వీఎఫ్​6, వీఎఫ్​7 మోడళ్లు అత్యున్నతమైన 5-స్టార్ సేఫ్టీ రేటింగ్‌ను సొంతం చేసుకున్నాయి. పూర్తి వివరాలను ఇక్కడ చూసేయండి..

భారత ఆటోమొబైల్​ కస్టమర్లకు మరో రెండు బెస్ట్​ సేఫ్టీ ఆప్షన్స్​ లభించాయి. ప్రముఖ ఎలక్ట్రిక్ వాహనాల తయారీ సంస్థ ‘విన్ ఫాస్ట్’ తన బ్రాండ్ విలువను మరింత పెంచుకుంటూ, తన ఎస్‌యూవీ లైనప్‌లో భద్రతా ప్రమాణాలకు పెద్దపీట వేసింది. ఇటీవలే జరిగిన భారత్ ఎన్​సీఏపీ క్రాష్ టెస్టుల్లో ఆ సంస్థకు చెందిన వీఎఫ్​6, వీఎఫ్​7 మోడళ్లు రెండూ అత్యున్నతమైన 5-స్టార్ రేటింగ్ సాధించాయి.

విన్​ఫాస్ట్​ ఎలక్ట్రిక్​ కార్లు..

పెద్దల రక్షణ (అడల్ట్​ ఆక్యుపెంట్​ ప్రొటెక్షన్​)తో పాటు పిల్లల భద్రత (చైల్డ్​ ఆక్యుపెంట్​ ప్రొటెక్షన్​) విషయంలోనూ ఈ కార్లు అద్భుతమైన పనితీరును కనబరిచాయి. భారత్​ ఎన్​సీఏపీ క్రాష్​ టెస్ట్​కి సంబంధించిన పూర్తి వివరాలను ఇక్కడ తెలుసుకోండి..

విన్ ఫాస్ట్ వీఎఫ్​7: రక్షణలో మేటి..

2025లో నిర్వహించిన ఈ పరీక్షల ఫలితాలు ఇటీవలే వెల్లడయ్యాయి. 2,493 కిలోల బరువున్న ఈ విన్​ఫాస్ట్​ వీఎఫ్​7 ఎస్‌యూవీ, భద్రతలో సరికొత్త బెంచ్‌మార్క్‌ను సెట్ చేసింది.

పెద్దల రక్షణ: దీనికి 32 పాయింట్లకు గాను 28.54 పాయింట్లు లభించాయి. ముఖ్యంగా సైడ్ ఇంపాక్ట్ టెస్టులో 16కి 16 పాయింట్లు సాధించడం విశేషం.

పిల్లల రక్షణ: 49 పాయింట్లకు గాను 45.25 పాయింట్లు సాధించింది. 18 నెలల, 3 ఏళ్ల వయసున్న చిన్నారులకు అత్యుత్తమ రక్షణ కల్పిస్తున్నట్లు పరీక్షల్లో వెల్లడైంది.

భద్రతా ఫీచర్లు: ఈ విన్​ఫాస్ట్​ వీఎఫ్​7 ఎలక్ట్రిక్​ ఎస్​యూవీలో ఫ్రంటల్ ఎయిర్‌బ్యాగ్‌లు, సైడ్ చెస్ట్, సైడ్ పెల్విస్, కర్టెన్ ఎయిర్‌బ్యాగ్‌లు ప్రామాణికంగా వస్తున్నాయి. దీనితో పాటు ఈఎస్​సీ, పెడెస్ట్రియన్ ప్రొటెక్షన్ సిస్టమ్ వంటి ఫీచర్లు ప్రయాణికులకు రక్షణ కవచంలా పనిచేస్తాయి.

విన్ ఫాస్ట్ వీఎఫ్​6: బడ్జెట్‌లో భద్రత..

వీఎఫ్​7 తరహాలోనే ఈ వీఎఫ్​6 కూడా 5-స్టార్ రేటింగ్‌తో అదరగొట్టింది. 2,252 కిలోల బరువున్న ఈ కారు కూడా కుటుంబాలకు అత్యంత సురక్షితమైన ఎంపికగా నిలిచింది.

స్కోరు వివరాలు: పెద్దల రక్షణలో 27.13 (32కి), పిల్లల రక్షణలో 44.41 (49కి) పాయింట్లను సాధించింది.

సైడ్ ఇంపాక్ట్: సైడ్ మూవబుల్ డిఫార్మబుల్ బారియర్ టెస్టులో ఈ ఎస్​యూవీ 16కి 16 పాయింట్లు సాధించి, పక్క నుంచి జరిగే ప్రమాదాల్లో ప్రయాణికులు సురక్షితంగా ఉంటారని నిరూపించింది.

సేఫ్టీ కిట్: వీఎఫ్​7 మాదిరిగానే ఇందులో కూడా అన్ని రకాల ఎయిర్‌బ్యాగ్‌లు, ఐసోఫిక్స్ చైల్డ్ సీట్ యాంకర్లు, సీట్ బెల్ట్ రిమైండర్లు వంటి కీలక ఫీచర్లు ఉన్నాయి.

"విన్ ఫాస్ట్ వీఎఫ్​7, వీఎఫ్​6 సాధించిన ఈ 5-స్టార్ రేటింగ్, కస్టమర్ల భద్రత పట్ల మాకున్న నిబద్ధతకు నిదర్శనం," అని కంపెనీ ప్రతినిధులు సంతోషం వ్యక్తం చేశారు. కేవలం విలాసం, టెక్నాలజీ మాత్రమే కాదు.. ప్రాణాలకు రక్షణ ఇచ్చే విషయంలోనూ తాము రాజీ పడబోమని ఈ ఫలితాల ద్వారా విన్ ఫాస్ట్ నిరూపించింది.

ఎలక్ట్రిక్​ కార్ల సేల్స్​లో హ్యుందాయ్​, కియాను వెనక్కి నెట్టి (డిసెంబర్​ 2025) నాలుగో స్థానంలో విన్​ఫాస్ట్​ నిలిచిన నేపథ్యంలో, ఈ భారత్​ ఎన్​సీఏపీ క్రాష్​ టెస్ట్​ ఫలితాలు ఇండియాలో సంస్థ ప్రదర్శనకు మరింత ఊతం అందిచే అవకాశం ఉంది.