విప్రోకు 'మెటా' బిగ్ షాక్: రూ.200 కోట్ల ఐటీ ప్రాజెక్ట్‌పై ఏఐ దెబ్బ

ఆర్టిఫిషియల్ ఇంటెలిజెన్స్ (AI) వాడకాన్ని పెంచే క్రమంలో సోషల్ మీడియా దిగ్గజం 'మెటా' భారత ఐటీ సంస్థ విప్రోకు ఇచ్చే ప్రాజెక్టుల్లో కోత విధించింది. డిజిటల్ మార్కెటింగ్ విభాగాన్ని నిలిపివేయడంతో విప్రో దాదాపు 25 మిలియన్ డాలర్ల (సుమారు రూ.200 కోట్లు) వార్షిక ఆదాయాన్ని కోల్పోనుంది.

కృత్రిమ మేధ (AI) ధాటికి భారత ఐటీ రంగానికి మరో గట్టి ఎదురుదెబ్బ తగిలింది. ప్రముఖ సోషల్ మీడియా దిగ్గజం 'మెటా' (Meta) తమ సంస్థలో ఏఐ సాంకేతికతను విస్తృతంగా అమలు చేస్తుండటంతో అవుట్‌సోర్సింగ్ పనులను భారీగా తగ్గించుకుంది. ఇందులో భాగంగా దేశంలో నాలుగో అతిపెద్ద ఐటీ సేవల సంస్థ అయిన విప్రోకు (Wipro) ఇచ్చే ప్రాజెక్టులలో దాదాపు 25 శాతం కోత విధిస్తూ నిర్ణయం తీసుకుంది.

విప్రోకు 'మెటా' బిగ్ షాక్: రూ.200 కోట్ల ఐటీ ప్రాజెక్ట్‌పై ఏఐ దెబ్బ

రూ.200 కోట్ల ఆదాయానికి గండి

ఆర్థిక సంవత్సరం 2026 (FY26) లో మెటా సంస్థ నుంచి విప్రోకు ఏటా దాదాపు 100 మిలియన్ డాలర్ల ఆదాయం వచ్చేది. విప్రో యొక్క టాప్ 20 అతిపెద్ద క్లయింట్ ఖాతాలలో మెటా ఒకటి. ఐటీ సపోర్ట్, కస్టమర్ సర్వీస్, డిజిటల్ మార్కెటింగ్ పనులను విప్రో బృందాలు నిర్వహించేవి.

ఖర్చుల కోత, అంతర్గత ఏఐ వ్యవస్థలను బలోపేతం చేసే క్రమంలో మెటా తన డిజిటల్ మార్కెటింగ్ రంగాన్ని మూసివేసింది. దీనివల్ల విప్రో పొందే వార్షిక ఆదాయం 75 మిలియన్ డాలర్లకు పడిపోనుంది. అంటే ఒక్కసారిగా 25 మిలియన్ డాలర్ల (దాదాపు రూ.200 కోట్లు) ఆదాయం హరించుకుపోయింది.

200 మంది ఉద్యోగులు బెంచ్‌పైకి..

ఈ పరిణామ ప్రభావం నేరుగా విప్రో ఉద్యోగులపై పడింది. గురుగ్రామ్ కార్యాలయం నుంచి మెటా ఖాతాను పర్యవేక్షిస్తున్న దాదాపు 200 మంది ఉద్యోగులను కంపెనీ బెంచ్‌పైకి పంపింది. వీరిని ఇతర ప్రాజెక్టుల్లోకి మార్చేందుకు ప్రయత్నాలు జరుగుతున్నాయి. కేవలం విప్రో మాత్రమే కాకుండా కాన్సెంట్రిక్స్, టెలిపెర్ఫార్మెన్స్, యాక్సెంచర్ వంటి ఇతర అంతర్జాతీయ సంస్థలు కూడా మెటా నిర్ణయంతో తమ కాంట్రాక్టులను కోల్పోయాయి.

ఆరు నెలల్లో రెండో అతిపెద్ద దెబ్బ

గతేడాది మే నెలలో శ్రీని పల్లియా సీఈఓగా బాధ్యతలు చేపట్టిన తర్వాత విప్రోను లాభాల బాట పట్టించేందుకు శ్రమిస్తున్నారు. అయితే ఆరు నెలల వ్యవధిలోనే కంపెనీకి ఇది రెండో పెద్ద షాక్. ఈ ఏడాది మార్చి నెలలో న్యూయార్క్‌కు చెందిన సౌందర్య ఉత్పత్తుల దిగ్గజం ఎస్టే లాడర్ (Estée Lauder) విప్రోకు ఇచ్చే కాంట్రాక్ట్‌ను నిలిపివేసి యాక్సెంచర్‌కు అప్పగించింది. దానివల్ల విప్రో ఏటా 100 మిలియన్ డాలర్ల ఆదాయాన్ని కోల్పోయింది.

పడిపోతున్న షేరు విలువ.. ఎందుకు ఈ మార్పు?

వరుస ఎదురుదెబ్బలతో ప్రస్తుత ఏడాదిలో విప్రో షేరు విలువ ఇప్పటివరకు 31 శాతానికి పైగా క్షీణించింది. Q2FY27 లో కూడా కంపెనీ ఆదాయం -1.5% నుంచి 0.5% మధ్య ప్రతికూలంగా ఉండే అవకాశముందని అంచనా వేస్తున్నారు.

మరోవైపు మెటా అధినేత మార్క్ జుకర్‌బర్గ్ తమ అంతర్గత సామర్థ్యాలను పెంచుకోవడానికి, సొంత డేటా సెంటర్లు, ఏఐ సిస్టమ్‌లపై భారీగా పెట్టుబడులు పెడుతున్నట్లు వెల్లడించారు. "రాబోయే కొన్ని సంవత్సరాలలో మా యాప్‌లలో అధునాతన ఏఐ వ్యవస్థలను అందుబాటులోకి తెస్తాం. థర్డ్ పార్టీ వెండర్లపై ఆధారపడటాన్ని తగ్గించుకుని, స్వయంప్రతిపత్తి వ్యవస్థలను బలోపేతం చేయడంపై దృష్టి పెడతాం" అని మెటా యాజమాన్యం స్పష్టం చేసింది.

కంటెంట్ పర్యవేక్షణ, డిజిటల్ మార్కెటింగ్ వంటి పునరావృత పనులను ఏఐ ద్వారానే నిర్వహించాలని మెటా నిర్ణయించుకోవడంతో, భారత ఐటీ రంగానికి ఆటోమేషన్ సవాళ్లు మరింత పెరిగాయి.