జులై నెలలోని శుభ ముహూర్తాల రోజులు.. ఆషాఢ మాసం ప్రారంభం ఎప్పుడు?

జులై నెలలో ఆషాఢ మాసం ప్రారంభమవుతుంది. అంతకుముందు కొన్ని శుభ ముహూర్తాలు వచ్చే రోజులు ఉన్నాయి. గృహప్రవేశాలు, ఇతర కార్యక్రమాలు ఉంటే ముహూర్తాలు పెట్టుకోవచ్చు.

హిందూ సంప్రదాయంలో ప్రతి నెలా ఒక విశిష్టత ఉంటుంది. అయితే ఆషాఢ మాసానికి ఒక ప్రత్యేకమైన ఆధ్యాత్మిక ప్రాధాన్యత ఉంది. సాధారణంగా ఈ మాసంలో పెళ్ళిళ్ళు, గృహప్రవేశాల వంటి శుభకార్యాలు నిర్వహించకపోయినా.. దైవారాధనకు పవిత్రమైన సమయంగా భావిస్తారు. ఆకాశంలో జరిగే అద్భుత ఖగోళ మార్పులకు, ఆధ్యాత్మిక సాధనలకు ఈ మాసం వేదికగా నిలుస్తుంది. పౌర్ణమి నాడు చంద్రుడు పూర్వాషాఢ లేదా ఉత్తరాషాఢ నక్షత్రంలో సంచరించడం వల్లే ఈ మాసానికి ఆషాఢం అనే పేరు వచ్చింది. జులై నెలలో గృహప్రవేశాలు, వివాహాది శుభకార్యాలు, కొత్త పనులు మెుదలుపెట్టేందుకు జులై 1, 2, 3, 4, 5, 6 తేదీలు అత్యంత అనుకూలమైన రోజులు.

జులైలో మంచి రోజులు

ఖగోళ శాస్త్రం ప్రకారం జూలై నెలలో ఒక పెద్ద మార్పు చోటుచేసుకోబోతోంది. జూలై 17వ తేదీ ఉదయం 11:04 గంటలకు సూర్యుడు కర్కాటక రాశిలోకి ప్రవేశిస్తాడు. దీనినే ‘కర్కాటక సంక్రమణం’ లేదా దక్షిణాయన పుణ్యకాలం అంటారు. ఇప్పటివరకు ఉత్తరం వైపు ప్రయాణించిన సూర్యుడు, ఈ రోజు నుండి దక్షిణ దిశగా తన ప్రయాణాన్ని మెుదలుపెడతాడు. శాస్త్రాల ప్రకారం ఉత్తరాయణం దేవతలకు పగలు అయితే.. దక్షిణాయనం రాత్రి కాలంతో సమానంగా భావిస్తారు. ఈ ఆరు నెలల కాలంలో పితృదేవతల ఆరాధన, దానధర్మాలు, వ్రతాలు చేయడం వల్ల అమితమైన పుణ్యఫలాలు లభిస్తాయి.

ఈ నెల జులై 29న అత్యంత పవిత్రమైన వ్యాస పూర్ణిమ(గురు పూర్ణిమ) రానుంది. ఈ ఏడాది గురుపూర్ణిమ నాడు గురు గ్రహం ఉచ్ఛ రాశిలో ఉండటం విశేషం. రవి, గురు గ్రహాల కలయిక వల్ల ఏర్పడే ఈ పుణ్యకాలంలో ధ్యానం, జపం చేయడం వల్ల మానసిక ప్రశాంతత దొరుకుతుంది.

జూలై 3 సూర్యుడు ఆర్ద్ర నక్షత్రం 4వ పాదంలోకి ప్రవేశించడం వల్ల వాతావరణంలో మార్పులు వచ్చి వర్షాలు కురుస్తాయి. సంకట హర చతుర్థి కూడా ఇదే రోజు. గణపతి ఆరాధన చేస్తారు.

జూలై 4 శుక్రుడు సింహరాశిలోకి, కుజుడు రోహిణి నక్షత్రంలోకి ప్రవేశిస్తారు. దీనివల్ల కీలక పరిణామాలు చోటుచేసుకునే అవకాశం ఉంది.

• జూలై 10యోగిని ఏకాదశి ఉంది. ఆరోగ్య ప్రాప్తి కోసం పూజలు చేస్తారు.
• జూలై 12, 26 ప్రదోష వ్రతం (శివారాధనకు శ్రేష్ఠం)
• జూలై 15 ఆషాఢ మాసం ప్రారంభం అవుతుంది.
• జూలై 16 పూరీ జగన్నాథుని రథయాత్ర ప్రారంభం
• జూలై 25న తొలి ఏకాదశి (దేవశయని ఏకాదశి) - చాతుర్మాస్య దీక్షల ప్రారంభం