ప్రదోష వ్రతం ఎందుకు చేయాలి? శివుడిని ప్రసన్నం చేసే పవిత్ర కథ ఇదే!

ప్రతి నెలా వచ్చే త్రయోదశి తిథి నాడు ఆచరించే 'ప్రదోష వ్రతం' శివపార్వతుల అనుగ్రహాన్ని ప్రసాదిస్తుందని పురాణాలు చెబుతున్నాయి. పేద బ్రాహ్మణ స్త్రీ భక్తితో చేసిన ప్రదోష వ్రతం, ఒక రాజకుమారుడి జీవితాన్ని ఎలా మార్చిందో, ఆమెకు ఏ విధంగా అదృష్టాన్ని తెచ్చిపెట్టిందో ఈ కథ వివరిస్తుంది.

ప్రదోష వ్రతం అంటేనే శివపార్వతుల అనుగ్రహానికి నిదర్శనం. ప్రతి నెలా శుక్ల, కృష్ణ పక్షాల్లో వచ్చే త్రయోదశి నాడు భక్తులు భక్తిశ్రద్ధలతో ఈ వ్రతాన్ని ఆచరిస్తారు. జూన్ నెలలో మొదటి ప్రదోష వ్రతం జూన్ 12న రానుంది, రెండోది జూన్ 27న వస్తుంది. ఈ రోజున శివాలయాల్లో ప్రత్యేక పూజలు, శివ చాలీసా పఠనం విశేష ఫలితాలనిస్తాయి. ఈ వ్రతానికి సంబంధించిన పురాణ గాథను తెలుసుకోవడం వల్ల అపారమైన పుణ్యఫలాలు లభిస్తాయని విశ్వాసం.

ప్రదోష వ్రత పురాణ గాథ

ప్రదోష వ్రతం ఎందుకు చేయాలి? శివుడిని ప్రసన్నం చేసే పవిత్ర కథ ఇదే!

పూర్వం ఒకానొక నగరంలో భర్తను కోల్పోయిన ఒక నిరుపేద బ్రాహ్మణ స్త్రీ తన చిన్న కుమారుడితో కలిసి నివసించేది. భిక్షాటనతో కడుపు నింపుకుంటూ జీవనం సాగిస్తున్న ఆమెకు ఒకరోజు దారిలో గాయపడిన ఒక యువకుడు కనిపించాడు. దయార్ద్ర హృదయంతో అతడిని ఇంటికి తీసుకెళ్లి, కోలుకునే వరకు ఎంతో భక్తితో సేవలు చేసింది. ఆ యువకుడు ఎవరో కాదు, విదర్భ రాజ్యపు రాజకుమారుడు. శత్రువుల దాడుల వల్ల తన రాజ్యాన్ని, తండ్రిని కోల్పోయి ప్రాణాలు దక్కించుకునే క్రమంలో అతడు అడవిలో దారితప్పాడు.

ఆ యువకుడు కోలుకున్నాక, బ్రాహ్మణుడి ఇంట్లోనే ఉండసాగాడు. అదే సమయంలో 'అంశుమతి' అనే గంధర్వ కన్య అతడిని చూసి ప్రేమలో పడింది. తన తల్లిదండ్రులను తీసుకువచ్చి యువకుడిని పరిచయం చేయగా, వారు కూడా ఎంతో సంతోషించారు.

శివజ్ఞానంతో మారిన తలరాత

ఒక రాత్రి అంశుమతి తల్లిదండ్రులకు స్వప్నంలో సాక్షాత్తు పరమేశ్వరుడు కనిపించి, వారిద్దరికీ వివాహం జరిపించమని ఆదేశించాడు. శివాజ్ఞ మేరకు వారి వివాహం జరిగింది. మరోవైపు, ఆ బ్రాహ్మణ స్త్రీ నిత్యం ప్రదోష వ్రతాన్ని ఆచరిస్తూ శివారాధనలో తరిస్తుండేది. ఆ వ్రత ప్రభావం వల్ల, అంశుమతి తండ్రి తన సైన్యంతో కలిసి రాజకుమారుడికి తోడుగా నిలిచాడు. శత్రువులను సంహరించి, విదర్భ రాజ్యాన్ని తిరిగి కైవసం చేసుకుని, బంధీగా ఉన్న రాజును విడుదల చేశారు.