E-Paper
అమ్మవారు సింహంపైనే ఎందుకు కూర్చుంటారు? దుర్గాదేవి వాహనం వెనుక ఉన్న ఆసక్తికరమైన పౌరాణిక కథ ఇదే!
హిందూ పురాణాల ప్రకారం దుర్గాదేవి సింహంపై విహరించడం శక్తి, ధైర్యం, విజయానికి ప్రతీకగా భావిస్తారు. శివుడు సరదాగా చేసిన వ్యాఖ్యతో పార్వతీదేవి కఠిన తపస్సు చేయగా, ఆమెను వేటాడాలని వచ్చిన ఒక సింహం ఏళ్ల తరబడి ఓర్పుతో వేచి చూసిందని కథనం చెబుతుంది.
హిందూ పురాణాల ప్రకారం దుర్గాదేవికి సింహంతో విడదీయరాని అనుబంధం ఉంది. శివుని వ్యాఖ్యతో పార్వతీదేవి తపస్సు చేయడం, ఆమె కోసం ఓ సింహం ఏళ్ల తరబడి వేచి చూడటం వెనుక ఉన్న ఆసక్తికరమైన పౌరాణిక గాథ ఇక్కడ తెలుసుకోండి.
మన హిందూ శాస్త్రాలు, పురాణాల ప్రకారం చూసినట్లయితే, దుర్గాదేవి సింహంపై విహరించే రూపంతో కనిపిస్తుంది. శక్తి, నిర్భయత్వం, విజయానికి ప్రతీకగా ఈ రూపం భావించబడుతుంది. సింహం కేవలం అమ్మవారి వాహనమే కాదు, అమ్మవారి దివ్య తేజస్సు, ధైర్యం, పరాక్రమానికి చిహ్నం కూడా. ఈ అనుబంధం వెనుక ఆసక్తికరమైన పురాణ గాథ ఉంది.
సరదాగా శివుడు చెప్పిన మాటలతో మొదలైన కథ
పురాణాల ప్రకారం చూస్తే, ఓ రోజు శివుడు సరదాగా పార్వతీదేవిని "కాళి" అని అంటాడు. తన వర్ణాన్ని ఉద్దేశించి చేసిన ఈ వ్యాఖ్యతో పార్వతీదేవికి ఆవేదన కలిగింది. ఆమె అరణ్యానికి వెళ్లి కఠిన తపస్సు చేయడం మొదలు పెట్టింది. తన తపస్సు ద్వారా తెల్లగా, కాంతివంతమైన చర్మాన్ని పొందాలని సంకల్పంతో దీక్షను చేపట్టింది. ఆ సమయంలో అడవిలో ఆహారం కోసం వెతుకుతూ ఆకలితో ఉన్న సింహం సంచరిస్తోంది.
పార్వతీదేవిని వేటాడాలని అనుకున్న సింహం
తపస్సులో నిమగ్నమైన పార్వతీదేవిని చూసి ఆమెను తన ఆహారంగా చేసుకోవాలని అనుకుంది. అయితే, ఆమె ధ్యానం పూర్తయ్యాక మాత్రమే దాడి చేయాలని ఆ సింహం నిర్ణయించుకుంది. ఆ నిర్ణయంతో సింహం ఎన్నో సంవత్సరాలు ఓర్పుతో వేచి చూసింది. తెలియకుండానే సింహం తపస్సు చేసినట్లుగా సహనం, నియమాన్ని పాటించింది.
సింహం జీవితం శివ పార్వతుల అనుగ్రహంతో మారిపోయింది
పార్వతీదేవి తపస్సుకు సంతోషించిన శివుడు ఆమెకు గౌరవర్ణాన్ని ప్రసాదించాడు. ఆ తర్వాత పార్వతీదేవి అక్కడే ఏళ్లుగా ఓర్పుతో ఎదురు చూస్తున్న సింహాన్ని గమనించింది. దాని సహనం, అంకితభావం చూసి సంతోషపడి, సింహాన్ని తన వాహనంగా ఉండే వరాన్ని ప్రసాదించింది
దుర్గా దేవితో విడదీయరాని అనుబంధం
అప్పటి నుంచి కూడా సింహానికి దుర్గా దేవితో విడదీయరాని అనుబంధం ఏర్పడిందని పురాణాలు తెలుపుతున్నాయి. ఈ కథ ద్వారా సహనం, అంకితభావం, పట్టుదల ఉంటే చివరకు మంచి ఫలితాలు తప్పక కలుగుతాయని తెలుస్తోంది. అందుకే ఇప్పటికీ సింహాన్ని దుర్గాదేవి శక్తికి, ధైర్యానికి, గౌరవానికి ప్రతీకగా భావిస్తారు.
నిరాకరణ: ఈ వ్యాసంలో ఉన్న సమాచారం పూర్తిగా నిజం మరియు ఖచ్చితమైనదని మేము చెప్పము. మరిన్ని వివరాలు మరియు మరింత సమాచారం కోసం, సంబంధిత రంగంలో నిపుణుడిని సంప్రదించాలని నిర్ధారించుకోండి.
