...
...
Next Story

అయ్యప్ప మాల ధరించాడని ఐటీ ఉద్యోగికి నో ఎంట్రీ.. ఆదిభట్లలో ఆందోళన

రంగారెడ్డి జిల్లా ఆదిభట్లలోని ఓ ఐటీ కంపెనీ ఎదుట అయ్యప్ప భక్తులు, హిందూ సంఘాలు ఆందోళన చేపట్టాయి. అయ్యప్ప దీక్షలో ఉన్న ఉద్యోగిని డ్రెస్ కోడ్ పేరుతో లోపలికి అనుమతించలేదన్న ఆరోపణలతో గురువారం ఉద్రిక్తత నెలకొంది. దీక్షలో ఉన్నా విధులకు అనుమతించాలని నిరసనకారులు డిమాండ్ చేశారు.

Published on: Nov 20, 2026, 07:21:31 IST
Advertisement

రంగారెడ్డి జిల్లా ఆదిభట్లలోని ఓ ఐటీ కంపెనీ కార్యాలయం ఎదుట గురువారం తీవ్ర ఉద్రిక్తత నెలకొంది. అయ్యప్ప దీక్ష చేపట్టిన ఓ ఉద్యోగిని కంపెనీ లోపలికి అనుమతించలేదన్న ఆరోపణలతో అయ్యప్ప భక్తులు, వివిధ హిందూ సంఘాల నాయకులు పెద్ద ఎత్తున ఆందోళనకు దిగారు. కంపెనీ యాజమాన్యానికి వ్యతిరేకంగా నినాదాలు చేస్తూ నిరసన తెలిపారు.

శబరిమల అయ్యప్ప ఆలయం
శబరిమల అయ్యప్ప ఆలయం

కార్తీక, మార్గశిర మాసాల్లో శబరిమల యాత్ర కోసం భక్తులు మండల దీక్ష చేపట్టడం ఆనవాయితీ. ఈ దీక్షా కాలంలో నలుపు లేదా కాషాయ వస్త్రాలు ధరించడం, పాదరక్షలు లేకుండా నడవడం వంటి కఠిన నియమాలను పాటిస్తారు. అయితే, కార్పొరేట్ సంస్థల్లో అమలు చేసే డ్రెస్ కోడ్ నిబంధనల కారణంగా ఆదిభట్ల ఐటీ కంపెనీలో తాజా వివాదం రాజుకుంది.

రెండు నెలల ముందే చెప్పినా అడ్డుకున్నారు: బాధిత ఉద్యోగి

ఆదిభట్లలోని సదరు ఐటీ కంపెనీలో మనీష్ అనే యువకుడు రెండేళ్లుగా పనిచేస్తున్నాడు. తాను అయ్యప్ప దీక్ష తీసుకోబోతున్నట్లు రెండు నెలల క్రితమే యాజమాన్యానికి సమాచారం ఇచ్చానని మనీష్ తెలిపాడు. అయినప్పటికీ నవంబర్ 19, గురువారం నాడు విధులకు హాజరయ్యేందుకు వచ్చిన తనను డ్రెస్ కోడ్ సాకుతో లోపలికి అనుమతించలేదని ఆరోపించాడు.

"నేను ఈ కంపెనీలో రెండేళ్లుగా పనిచేస్తున్నాను. అయ్యప్ప దీక్ష తీసుకుంటానని రెండు నెలల ముందే యాజమాన్యానికి తెలియజేశాను. కానీ ఈరోజు డ్రెస్ కోడ్ పాటించకపోతే లోపలికి అనుమతించబోమని నన్ను అడ్డుకున్నారు. డ్రెస్ కోడ్ లేకుండా వస్తున్న ఇతర ఉద్యోగులను మాత్రం లోపలికి పంపుతున్నారు. నేను అయ్యప్ప దీక్ష చేపట్టిన తర్వాతే ఎందుకు అడ్డుకుంటున్నారో అర్థం కావడం లేదు" అని మనీష్ ఆవేదన వ్యక్తం చేశాడు.

విధులకు అనుమతించాలని భక్తుల డిమాండ్

ఈ నిరసన కార్యక్రమం గురించి సమాచారం అందుకున్న ఆదిభట్ల పోలీసులు వెంటనే ఘటనా స్థలానికి చేరుకుని పరిస్థితిని సమీక్షించారు. ఉద్యోగి చేసిన ఆరోపణల నేపథ్యంలోనే అయ్యప్ప భక్తులు, హిందూ సంఘాలు ఆందోళన చేపట్టాయని ఆదిభట్ల పోలీస్ అధికారి ఒకరు ఏఎన్ఐ వార్తా సంస్థకు వెల్లడించారు.

"ఉద్యోగుల్లో ఒకరు ఈ ఆరోపణలు చేశారు. ఈ ఘటనపై మాకు ఇప్పటివరకు ఎలాంటి అధికారిక ఫిర్యాదు అందలేదు. ప్రస్తుతం అక్కడ పరిస్థితి పూర్తిగా అదుపులోనే ఉంది. ఈ వ్యవహారంపై మేము ఆరా తీస్తున్నాం" అని పోలీస్ అధికారి స్పష్టం చేశారు. ఈ ఘటనకు సంబంధించిన పూర్తి వాస్తవాలను పరిశీలిస్తున్నట్లు పోలీసులు తెలిపారు.

 
ABOUT THE AUTHOR
Praveen Kumar Lenkala

ప్రవీణ్ కుమార్ లెంకల ప్రస్తుతం హిందుస్తాన్ టైమ్స్ తెలుగు ఎడిటర్‌గా బాధ్యతలు నిర్వహిస్తున్నారు. జర్నలిజంలో 25 ఏళ్ల సుదీర్ఘ అనుభవం కలిగిన వీరు, గతంలో సాక్షి దినపత్రికలో ఢిల్లీ నేషనల్ బ్యూరో చీఫ్‌గా (2014-2021) సుమారు ఎనిమిదేళ్ల పాటు పనిచేశారు. ఆ సమయంలో జాతీయ రాజకీయాలు, ప్రభుత్వ విధానాలు, కేంద్ర బడ్జెట్, సార్వత్రిక ఎన్నికలు, రాష్ట్రాల శాసన సభలకు ఎన్నికలు తదితర అనేక అంశాలపై కథనాలు, విశ్లేషణలు, పరిశీలనాత్మక వార్తలు అందించారు. పార్లమెంటు ప్రొసీడింగ్స్ నుంచి.. సుప్రీంకోర్టు విచారణల వరకు కవరేజీలో విశేష అనుభవం ఉంది. ఢిల్లీలో ఆంధ్రప్రదేశ్, తెలంగాణ రాష్ట్రాల రాజకీయ పరిణామాలు, అభివృద్ధి సంబంధిత పెండింగ్ సమస్యలు లోతుగా అందించారు. అంతకుముందు హైదరాబాద్‌లో సాక్షి టాస్క్‌ఫోర్స్ బ్యూరోలో (2008-2013) పనిచేస్తూ భూకుంభకోణాలు, ఫైనాన్స్ సంస్థల మోసాలు, వైట్ కాలర్ స్కామ్స్‌ను వెలికితీశారు. ముఖ్యంగా పోలీసు వ్యవస్థలోని 'ఆర్డర్లీ వ్యవస్థ'పై వీరు చేసిన పరిశోధనాత్మక కథనాలు ప్రభుత్వం ఆ వ్యవస్థను రద్దు చేయడానికి కారణమయ్యాయి. ఈనాడు దినపత్రికలో (2003-2007) నల్గొండ, ఖమ్మం జిల్లాల్లో రిపోర్టర్‌గా, సబ్ ఎడిటర్‌గా పనిచేసి గిరిజన తండాల్లో ఆడపిల్లల అమ్మకాలు, గ్రామీణ ప్రాంతాల వెనుకబాటుతనం, ప్రభుత్వ పథకాల్లో అవినీతిపై సంచలనాత్మక కథనాలు రాశారు. ప్రస్తుతం జాతీయ, అంతర్జాతీయ పరిణామాలు, బిజినెస్, స్టాక్ మార్కెట్, టెక్నాలజీ, ఆటోమొబైల్ రంగాలపై నిశితమైన విశ్లేషణలు అందిస్తున్నారు. హిందుస్తాన్ టైమ్స్ నుంచి రెండుసార్లు Digi Journo పురస్కారం పొందారు. కమ్యూనికేషన్ అండ్ జర్నలిజంలో పీజీ (MCJ) పట్టా పొందిన వీరు, కామర్స్ (B.Com) నేపథ్యం కలిగి ఉండటం వల్ల ఆర్థిక అంశాలను సరళంగా వివరించడంలో సిద్ధహస్తులు. ప్రజా సమస్యలపై పోరాటం, విధానపరమైన మార్పులకు కారణమైన వీరి రిపోర్టింగ్ శైలి తెలుగు జర్నలిజంలో వీరికి ఒక ప్రత్యేక గుర్తింపును తెచ్చిపెట్టింది. 2001లో సీ ఛానెల్ అనే కేబుల్ టీవీలో చేరి కెరీర్ ప్రారంభించి హైదరాబాద్ నగర ఆర్థిక, సామాజిక రంగాలపై కథనాలతో పాటు సినిమా వార్తలను కూడా అందించారు.

SHARE THIS ARTICLE ON
Notifications

Get breaking alerts directly from the newsroom

Notifications are on!You'll be notified when news breaks