బండి భగీరథ్ పోక్సో కేసులో ఆ పేరు వాడకూడదు.. కోర్టు ఆదేశాలు

Bandi Bhageerath Case : బండి భగీరథ్ పోక్సో కేసులో కేంద్రమంత్రి బండి సంజయ్ సివిల్ కోర్టును ఆశ్రయించారు. తన పేరును ప్రస్తావించకూడదని పిటిషన్ వేశారు.

హైదరాబాద్ : బండి భగీరథ్ పోక్సో కేసుకు సంబంధించి సిటీ సివిల్ కోర్టు శుక్రవారం ఒక కీలకమైన ఆదేశాన్ని జారీ చేసింది. ఈ వివాదాస్పద కేసులో కేంద్రమంత్రి, బీజేపీ ఎంపీ బండి సంజయ్ కుమార్ పేరును ఎక్కడా ఉపయోగించరాదంటూ కోర్టు స్పష్టమైన ఆదేశాలు (గ్యాగ్ ఆర్డర్) ఇచ్చింది.

కోర్టును ఆశ్రయించిన కేంద్రమంత్రి

బండి సాయి భగీరథ్

బండి భగీరథ్ అనే వ్యక్తికి సంబంధించిన కేసులో అనవసరంగా తన పేరును లాగుతున్నారని, దీనివల్ల సమాజంలో తన ప్రతిష్టకు భంగం కలుగుతోందని ఆవేదన వ్యక్తం చేస్తూ బండి సంజయ్ సిటీ సివిల్ కోర్టులో పిటిషన్ దాఖలు చేశారు. ఈ కేసుకు, తనకు ఎలాంటి సంబంధం లేకపోయినప్పటికీ కేవలం రాజకీయ ప్రయోజనాల కోసం, సంచలనం కోసం మీడియాలోని కొన్ని విభాగాలు తన పేరును వాడుతున్నాయని కోర్టు దృష్టికి తీసుకెళ్లారు.

మీడియా వార్తలపై ఆంక్షలు

బండి సంజయ్ దాఖలు చేసిన పిటిషన్‌పై సమగ్రంగా విచారణ జరిపిన సిటీ సివిల్ కోర్టు, ఆయన వాదనలతో ఏకీభవించింది. బండి భగీరథ్ కేసు విషయంలో కేంద్రమంత్రి బండి సంజయ్ పేరును ఎలక్ట్రానిక్, ప్రింట్ లేదా సోషల్ మీడియాలో ఎక్కడా ఉపయోగించరాదని కోర్టు స్పష్టం చేసింది.

ఈ కేసుకు సంబంధించి బండి సంజయ్ పేరును వాడుతూ ఎలాంటి తప్పుడు లేదా ప్రతిష్టకు భంగం కలిగించే వార్తలను ప్రసారం చేయకూడదని, రాయకూడదని మీడియా సంస్థలను ఆదేశించింది. దీనితో పాటు ఇప్పటివరకు మీడియా వేదికలపై తన పేరుతో వచ్చిన ఈ కేసుకు సంబంధించిన పాత వార్తలను, కథనాలను డిలీట్ (తొలగించే) చేసేలా తగిన ఆదేశాలు ఇవ్వాలని కూడా బండి సంజయ్ కోర్టును విన్నవించారు.

మరోవైపు బండి భగీరథ్ కేసులో బాలిక వివరాలు సోషల్ మీడియాలో ప్రసారం కావడంపై కేసు నమోదైంది. బాలిక ఫొటోలు, వీడియోలు, తల్లిదండ్రుల వివరాల ప్రసారంపై కేసు నమోదు చేశారు. మేడ్చల్ జిల్లా బాలల సంక్షేమ కమిటీ ఛైర్ పర్సన్ ఫిర్యాదు మేరకు పేట్ బషీరాబాద్ పోలీసులు చర్యలు చేపట్టారు. సోషల్ మీడియా నిర్వాహకుల మీద కేసులు పెట్టినట్టుగా చెప్పారు.