New Timetable : ఎస్సీ సంక్షేమ గురుకులాల వేళల్లో మార్పు.. కొత్త టైమ్ టేబులు ఇదే

ఎస్సీ సంక్షేమ గురుకుల పాఠశాలలు, జూనియర్ కళాశాలల్లో టైమింగ్స్ మార్చారు. ఈ మేరకు కొత్త టైమ్ టేబుల్‌ను ప్రభుత్వం విడుదల చేసింది.

తెలంగాణలోని షెడ్యూల్డ్ కులాల (ఎస్సీ) సంక్షేమ గురుకుల పాఠశాలలు, జూనియర్ కళాశాలల సమయ వేళల్లో విద్యాశాఖ, గురుకుల సొసైటీ కీలక మార్పులు చేశాయి. తాజా ఉత్తర్వుల ప్రకారం, ఈ విద్యాసంవత్సరం (2026-27) నుంచి గురుకులాల పనివేళలను సవరించారు. గతంలో అమల్లో ఉన్న సమయపాలన వల్ల విద్యార్థులు, ఉపాధ్యాయులు ఎదుర్కొంటున్న ఇబ్బందులను దృష్టిలో ఉంచుకుని ఈ నిర్ణయం తీసుకున్నారు.

ఎస్సీ గురుకులాల్లో కొత్త టైమ్ టేబుల్

కొత్త టైంటేబుల్ వివరాలు ఇవే..

గతంలో ఎస్సీ గురుకుల పాఠశాలలు, కళాశాలలు ఉదయం 8:00 గంటలకే ప్రారంభమై, సాయంత్రం 4:30 గంటల వరకు కొనసాగేవి. అయితే, ఉదయాన్నే తరగతులు ప్రారంభం కావడం వల్ల దూర ప్రాంతాల నుండి వచ్చే రోజువారీ విద్యార్థులు, ఉపాధ్యాయులు తీవ్ర ఇబ్బందులు పడేవారు. దీనిని పరిశీలించిన సొసైటీ ఇన్‌ఛార్జి కార్యదర్శి శారద సరికొత్త ఆదేశాలను జారీ చేశారు. పాత సమయం ఉదయం 8:00 గంటల నుండి సాయంత్రం 4:30 గంటల వరకు ఉండేది. కానీ దీనిని మారుస్తూ.. కొత్త సమయం ఉదయం 9:00 గంటల నుండి సాయంత్రం 4:30 గంటల వరకు చేశారు.

ఈ మార్పు ద్వారా ఉదయం వేళలో విద్యార్థులకు అదనంగా ఒక గంట సమయం లభించనుంది. ఇది వారి మానసిక ఉల్లాసానికి, ప్రశాంతంగా సిద్ధమవడానికి ఎంతగానో దోహదపడుతుంది.

ఉపాధ్యాయ సంఘాల హర్షం

టైంటేబుల్‌లో మార్పులు చేస్తూ ప్రభుత్వం తీసుకున్న నిర్ణయంపై ఎస్సీ గురుకుల ఉపాధ్యాయులు, ఉద్యోగుల అసోసియేషన్ సంతోషం వ్యక్తం చేసింది. ఈ సందర్భంగా అసోసియేషన్ అధ్యక్ష, ప్రధాన కార్యదర్శులు బాలరాజు, దయాకర్, ఎట్‌గ్రీవ అధ్యక్షుడు కూకుట్ల యాదయ్యలు ప్రభుత్వ నిర్ణయాన్ని స్వాగతించారు.

ఫలితాలు విడుదల

తెలంగాణ సోషల్‌ వెల్ఫేర్‌ రెసిడెన్షియల్‌ ఎడ్యుకేషనల్‌ ఇనిస్టిట్యూషన్స్‌ సొసైటీ ఆధ్వర్యంలోని వివిధ ఇంటర్మీడియట్ కళాశాలల్లో ప్రవేశాల కోసం నిర్వహించిన ప్రవేశ పరీక్ష ఫలితాలు విడుదలయ్యాయి. మంత్రి అడ్లూరి లక్ష్మణ్‌ కుమార్‌ ఈ ఫలితాలను అధికారికంగా విడుదల చేశారు. ఈ ఫలితాలు సొసైటీ పరిధిలోని సైనిక పాఠశాలలు, సెంటర్‌ ఆఫ్‌ ఎక్సలెన్స్‌ (COE), నాన్‌-సీఓఈ, ఒకేషనల్‌ జూనియర్‌ కళాశాలల్లో ప్రవేశాలకు సంబంధించినవి.

• మొత్తం అందుబాటులో ఉన్న సీట్లు: 19,740
• పరీక్షకు హాజరైన విద్యార్థులు: 39,052 మంది (మే 15న జరిగిన పరీక్ష)
• ఫేజ్‌-1లో సీట్లు పొందిన వారు: 18,401 మంది
• ఇంకా మిగిలి ఉన్న సీట్లు: 1,339

రాష్ట్రవ్యాప్తంగా జూన్‌ ఒకటో తేదీ నుంచే ఇంటర్మీడియట్‌ కళాశాలలు ప్రారంభం కానున్నాయి. ఫేజ్‌-1 కౌన్సెలింగ్‌లో సీట్లు సాధించిన విద్యార్థులు తమ అన్ని రకాల ఒరిజినల్‌ ధ్రువపత్రాలతో జూన్‌ 7లోపు కేటాయించిన కళాశాలల్లో రిపోర్ట్ చేయాల్సి ఉంటుంది. జూన్‌ 1 నుంచే క్లాసులు ప్రారంభం అవుతున్నందున, విద్యార్థులు చదువులో వెనకబడకుండా ఉండేందుకు మొదటి రోజు నుంచే వారిని కళాశాలలకు పంపాలని తల్లిదండ్రులకు మంత్రి అడ్లూరి లక్ష్మణ్‌ కుమార్‌ విజ్ఞప్తి చేశారు.