సీఈసీ జ్ఞానేశ్ కుమార్‌ రాజీనామాకు డిమాండ్.. హైదరాబాద్‌లో కాంగ్రెస్ నిరసన ర్యాలీ

కేంద్ర ఎన్నికల ప్రధాన కమిషనర్ వెంటనే రాజీనామా చేయాలని కాంగ్రెస్ నేతలు డిమాండ్ చేశారు. హైదరాబాద్‌లోని నెక్లెస్‌రోడ్‌లో నిరసన ర్యాలీ చేపట్టారు.

కేంద్ర ఎన్నికల ప్రధాన కమిషనర్ (CEC) జ్ఞానేశ్ కుమార్ వెంటనే తన పదవికి రాజీనామా చేయాలని డిమాండ్ చేస్తూ తెలంగాణ వ్యాప్తంగా కాంగ్రెస్ పార్టీ నాయకులు, కార్యకర్తలు భారీ ఎత్తున ఆందోళన బాట పట్టారు. హైదరాబాద్‌లోని నెక్లెస్ రోడ్‌ వేదికగా కాంగ్రెస్ శ్రేణులు సోమవారం నిర్వహించిన నిరసన కార్యక్రమం ఉద్రిక్తతకు దారితీసింది. ఓటర్ల జాబితా ప్రత్యేక సమగ్ర సవరణ (SIR) ప్రక్రియలో తీవ్ర అక్రమాలు, లోపాలు చోటుచేసుకున్నాయని, వీటన్నింటికీ ఈసీ యాజమాన్యమే పూర్తి బాధ్యత వహించాలని కాంగ్రెస్ పార్టీ సీరియస్ అయ్యింది.

కాంగ్రెస్ నిరసన ర్యాలీ

హైదరాబాద్ డీసీసీ అధ్యక్షులు మోతా రోహిత్, దీపక్ జాన్ ల నేతృత్వంలో నెక్లెస్ రోడ్‌లోని ఇందిరాగాంధీ విగ్రహం సమీపంలో కాంగ్రెస్ కార్యకర్తలు పెద్ద ఎత్తున సమకూరారు. అనంతరం అక్కడి నుంచి రాష్ట్ర ఎన్నికల సంఘం కార్యాలయం వరకు భారీ ర్యాలీగా బయలుదేరారు.

ఈ నిరసన ప్రదర్శనలో తెలంగాణ ప్రదేశ్ కాంగ్రెస్ కమిటీ అధ్యక్షుడు బి. మహేష్ కుమార్ గౌడ్, బీసీ సంక్షేమ, రవాణా శాఖ మంత్రి పొన్నం ప్రభాకర్, దానం నాగేందర్‌‌తోపాటుగా ఇతర ముఖ్య నేతలు భాగస్వాములయ్యారు. ర్యాలీ పొడవునా కేంద్ర ప్రభుత్వం, భారత ఎన్నికల సంఘం తీరుకు వ్యతిరేకంగా కాంగ్రెస్ నేతలు హోరెత్తించేలా నినాదాలు చేశారు.

ఓటర్ల జాబితా సవరణలో జరిగిన లోపాలకు నైతిక బాధ్యత వహిస్తూ సీఈసీ జ్ఞానేశ్ కుమార్ తక్షణమే రాజీనామా చేయాలని కాంగ్రెస్ నేతలు డిమాండ్ చేశారు. ఓటర్ల జాబితా సవరణ, సమగ్ర ఎన్నికల నిర్వహణ విధానంలో స్పష్టత, పారదర్శకతను కేంద్ర ఎన్నికల సంఘం బహిర్గతం చేయాలన్నారు.

అర్హులైన ఓటర్ల పేర్లు గాల్లో కలవడంపై ఈసీ తగిన వివరణ ఇవ్వాలని నేతలు డిమాండ్ చేశారు. ఓటర్ల జాబితా ప్రత్యేక సమగ్ర సవరణ ప్రక్రియలో లోపాలకు బాధ్యత వహిస్తూ.. రాజీనామా చేయాలన్నారు. ఈ మేరకు నెక్లెస్‌రోడ్డులోని ఇందిరాగాంధీ విగ్రహం నుంచి ఈసీ కార్యాలయం వరకు ర్యాలీగా వెళ్లారు. కేంద్ర ప్రభుత్వానికి, ఎన్నికల సంఘానికి వ్యతిరేకంగా కాంగ్రెస్ నేతలు నినాదాలు చేశారు.