Godavari Floods : భద్రాచలం వద్ద మూడో ప్రమాద హెచ్చరిక.. కోనసీమలోని పలు గ్రామాల్లో హైఅలర్ట్

Godavari Floods : ఎగువ ప్రాంతాల నుంచి భారీగా వరద నీరు వచ్చి చేరుతుండటంతో భద్రాచలం వద్ద గోదావరి నది ఉగ్రరూపం దాల్చింది. శనివారం ఉదయం నీటిమట్టం 55 అడుగులు దాటడంతో అధికారులు మూడో ప్రమాద హెచ్చరికను జారీ చేశారు. దీంతో భద్రాచలం ఏజెన్సీతో పాటు జిల్లాలోని పలు ప్రాంతాల్లో తీవ్ర వరద హెచ్చరికలు జారీ అయ్యాయి.

గోదావరి పరీవాహక ప్రాంతాల్లో కురుస్తున్న ఎడతెరిపి లేని భారీ వర్షాల కారణంగా గత 24 గంటల్లో నీటిమట్టాలు గోదావరి నదిలో భారీగా పెరిగాయి. వాగులు, వంకలు పొంగిపొర్లుతుండటంతో చర్ల - వెంకటాపురం మధ్య రహదారి సంబంధాలు తెగిపోయాయి. ఏజెన్సీలోని పలు గ్రామాలకు రాకపోకలు పూర్తిగా నిలిచిపోయాయి. శ్రీ సీతారామచంద్రస్వామి వారి ఆలయం సమీపంలోని విస్టా కాంప్లెక్స్ పరిసరాల్లో నిలిచిన వరద నీటిని బయటకు పంపేందుకు అధికారులు భారీ పంపులను ఏర్పాటు చేశారు. భద్రాచలం వద్ద నీటి మట్టం 55 అడుగులు దాటడంతో మూడో ప్రమాద హెచ్చరిక జారీ చేశారు అధికారులు.

గోదావరి వరద

భద్రాచలంతో పాటు జిల్లాలోని ముంపు ప్రాంతాల్లో తాత్కాలిక పునరావాస కేంద్రాలను ఏర్పాటు చేశారు. లోతట్టు ప్రాంతాల ప్రజలను సురక్షిత ప్రాంతాలకు తరలించేందుకు అధికారులు తీవ్రంగా శ్రమిస్తున్నారు. ఒకవేళ నీటిమట్టం మరింత పెరిగినా ఎదుర్కొనేందుకు వీలుగా అధికార యంత్రాంగం పూర్తి సన్నాహాలతో సిద్ధంగా ఉంది.

అత్యవసర సహాయం, వరద సమాచారం కోసం కొత్తగూడెంలోని ఇంటిగ్రేటెడ్ జిల్లా అధికారుల కాంప్లెక్స్‌లో 24 గంటలూ పనిచేసే కంట్రోల్ రూమ్‌ను ప్రారంభించారు. ఫోన్ నంబర్: 08744 241950, వాట్సాప్ నంబర్: 9392919743.

ఏపీలో పలు గ్రామాల్లో హైఅలర్ట్

వరద నీరు దిగువకు ప్రవహిస్తుండటంతో ఆంధ్రప్రదేశ్‌లోని విపత్తు నిర్వహణ అధికారులు, జిల్లా యంత్రాంగాలు హై అలర్ట్ ప్రకటించాయి. పోలవరం ప్రాజెక్ట్ సైట్‌లో స్పిల్‌వే నీటిమట్టం 30 మీటర్లకు పెరగడంతో, దిగువన ఉన్న లోతట్టు ప్రాంతాలపై ఆందోళనలు పెరిగాయి.

ధవళేశ్వరంలోని సర్ ఆర్థర్ కాటన్ బ్యారేజీ వద్దకు శుక్రవారం నాడు నీటి ప్రవాహం 3 లక్షల క్యూసెక్కులు దాటింది. ఇంద్రావతి, శబరి, ప్రాణహిత నదులతో సహా కీలక ఉపనదులు ఉధృతంగా ప్రవహిస్తుండటంతో, రాబోయే రెండు మూడు రోజుల్లో ఈ ప్రవాహం 15-17 లక్షల క్యూసెక్కులకు వేగంగా పెరిగే అవకాశం ఉందని అంచనా వేస్తున్నారు.

ధవళేశ్వరం వద్ద మొదటి ప్రమాద హెచ్చరిక జారీ చేశారు. నీటి ప్రవాహం మరింత పెరిగితే రెండో హెచ్చరిక శనివారం జారీ చేయవచ్చు. పోలవరం, ఏలూరు జిల్లాల్లోని చింతూరు, వీఆర్ పురం, కూనవరం, ఏటపాక, దేవీపట్నం, వేలేరుపాడు, కుక్కునూరు సహా నీట మునిగిన ఏజెన్సీ మండలాలతో పాటు కోనసీమలోని 11 మండలాల్లోని 32 ద్వీప గ్రామాల్లో హై అలర్ట్ ప్రకటించారు.