హైదరాబాద్ మెట్రో ఫేజ్ IIకు వెంటనే ఆమోదం తెలపండి.. కేంద్రానికి రేవంత్ రెడ్డి విజ్ఞప్తి

Hyderabad Metro : హైదరాబాద్ మెట్రో ఫేజ్ IIకు వెంటనే ఆమోదం తెలపాలని కేంద్రమంత్రి మనోహర్‌లాల్ ఖట్టర్‌ను సీఎం రేవంత్ రెడ్డి కోరారు. రెండో దశ డీపీఆర్‌ను ఇప్పటికే కేంద్రానికి సమర్పించామని చెప్పారు.

హైద‌రాబాద్ మెట్రో ఫేజ్‌-IIకు ఆమోదం తెల‌పాల‌ని ముఖ్యమంత్రి రేవంత్ రెడ్డి కేంద్ర ప‌ట్టణ వ్యవ‌హారాల శాఖ మంత్రి మనోహర్‌లాల్ ఖట్టర్‌కు విజ్ఞప్తి చేశారు. ఏడు కారిడార్లతో కూడిన మెట్రో ఫేజ్‌-II స‌మ‌గ్ర ప్రణాళిక‌ను రూపొందించి డీపీఆర్‌ను ఇప్పటికే స‌మ‌ర్పించామ‌ని తెలిపారు.

కేంద్రమంత్రి మనోహర్‌లాల్ ఖట్టర్‌తో సీఎం రేవంత్ రెడ్డి

ముఖ్యమంత్రి ఢిల్లీలో కేంద్ర మంత్రి ఖ‌ట్టర్‌‌తో సమావేశమయ్యారు. ఈ సంద‌ర్భంగా హైదరాబాద్ మెట్రో ఫేజ్‌ -II, మెట్రో ఫేజ్‌ -III పై చ‌ర్చించారు. వేగంగా అభివృద్ధి చెందుతున్న హైద‌రాబాద్ న‌గ‌రంలో ప్రయాణికుల సౌక‌ర్యార్థం మెట్రోను మ‌రింత‌గా విస్తరించాల్సిన అవ‌స‌రం ఉంద‌ని చెప్పారు.

హైదరాబాద్ మెట్రో రైలు ఫేజ్ -II, ఫేజ్‌ -III విస్తర‌ణ స‌జావుగా సాగాల‌నే ఉద్దేశంతోనే మెట్రో ఫేజ్‌-Iను L అండ్ TMRHL ను రాష్ట్ర ప్రభుత్వం స్వాధీనం చేసుకుంద‌ని వివ‌రించారు. ప్రస్తుతం ఫేజ్-I ప్రభుత్వం ప‌రిధిలో ఉండ‌డంతో ఫేజ్‌-II, ఫేజ్‌-III విస్తరణ సులుభమవుతుందని చెప్పారు.

మెట్రోరైల్ నెట్‌వర్క్‌ను విస్తరించేందుకు రాష్ట్ర ప్రభుత్వం ఫేజ్ -IIలో ఏడు కారిడార్లతో మొత్తం 122.9 కి.మీ మేర విస్తరణకు, రూ. 38,595 కోట్ల అంచనా వ్యయంతో రూపొందించిన సమగ్ర డీపీఆర్‌ను ఇప్పటికే స‌మ‌ర్పించిన విషయాన్ని గుర్తుచేశారు.

హైదరాబాద్ మెట్రో రైలు ఫేజ్ -II ప్రాజెక్ట్‌ను భారత ప్రభుత్వం - తెలంగాణ ప్రభుత్వాల జాయింట్ వెంచర్‌గా చేప‌ట్టేందుకు త్వర‌గా ఆమోదం తెల‌పాల‌ని కేంద్ర మంత్రిని విజ్ఞప్తి చేశారు. హైద‌రాబాద్ న‌గ‌ర భ‌విష్యత్ అవ‌స‌రాల దృష్ట్యా ఆర్జీఐ ఎయిర్‌పోర్ట్ - భారత్ ఫ్యూచర్ సిటీ కారిడార్‌ను మెట్రో ఫేజ్ -III గా చేపట్టాలని విజ్ఞప్తి చేశారు. మెట్రో ఫేజ్-III కి సంబంధించిన డీపీఆర్‌ను కూడా ఇప్పటికే స‌మ‌ర్పించామ‌ని తెలిపారు.

స‌మావేశంలో మినిస్ట్రీ ఆఫ్ హౌజింగ్ అర్బన్ శాఖ కార్యద‌ర్శి కె. శ్రీ‌నివాస్‌, ముఖ్యమంత్రి ప్రత్యేక కార్యద‌ర్శి బి.అజిత్ రెడ్డి, హెచ్ఎంఆర్ఎల్ ఎండీ స‌ర్ఫరాజ్ అహ్మద్‌, రాష్ట్ర ప్రభుత్వ స‌ల‌హాదారు(ప‌ట్టణ ర‌వాణా) ఎన్‌.వి.ఎస్‌.రెడ్డి, ఢిల్లీ తెలంగాణ భ‌వ‌న్ ప్రత్యేకాధికారి సంజ‌య్ కుమార్‌, కేంద్ర ప్రభుత్వ ప‌థ‌కాల స‌మ‌న్వయ కార్య‌ద‌ర్శి అద్వైత్ కుమార్ సింగ్‌తోపాటు ఇతర అధికారులు పాల్గొన్నారు.