సంక్షేమ హాస్టళ్లలో విద్యార్థులకు హెల్త్ చెకప్‌లు చేయాలి.. ఫేస్ రికగ్నిషన్ సిస్టమ్ తీసుకురావాలి : సీఎం రేవంత్

రాష్ట్రంలోని సంక్షేమ హాస్టళ్లపై ప్రత్యేక దృష్టి పెట్టాలని అధికారులను ముఖ్యమంత్రి రేవంత్ రెడ్డి ఆదేశించారు. విద్యార్థులకు అందుతోన్న పౌష్టిక ఆహారం, వారి ఆరోగ్య పరిస్థితులపై పీరియాడికల్ గా హెల్త్ చెకప్‌లు చేయాలన్నారు.

బీసీ, ఎస్సీ, ఎస్టీ, మైనార్టీ, సంక్షేమశాఖలపై కమాండ్‌ కంట్రోల్‌ కార్యాలయంలో సీఎం రేవంత్ రెడ్డి సమీక్ష చేశారు. తెలంగాణలోని సంక్షేమ హాస్టళ్లపై ప్రత్యేకంగా ఫోకస్ చేయాలని సీఎం రేవంత్ రెడ్డి చెప్పారు. విద్యార్థులకు అందుతోన్న పౌష్టిక ఆహారం, వారి ఆరోగ్య పరిస్థితుల‌పై పీరియాడికల్‌గా హెల్త్ చెకప్‌లు చేయాలని ఆదేశించారు. హాస్టళ్లలో విద్యార్థులు, టీచింగ్, నాన్ టీచింగ్ సిబ్బందిని పూర్తిగా ఫేస్ రికగ్నిషన్ సిస్టమ్ పరిధిలోకి తీసుకురావాలని చెప్పారు రేవంత్ రెడ్డి. విద్యార్థులకు అందించే భోజనం క్వాలిటీ చెక్‌కు టెక్నాలజీని ఉపయోగించుకోవాలన్నారు.

సీఎం రేవంత్ రెడ్డి

'సంక్షేమ హాస్టళ్లపై ప్రత్యేకంగా దృష్టి సారించాలి. హాస్టళ్లలో టీచింగ్, నాన్ టీచింగ్ సిబ్బందికి ఫేస్ రికగ్నిషన్ విధానం అమలు చేయాలి. పూర్తి డేటాతో సంక్షేమ హాస్టళ్ల వ్యవస్థలో జవాబుదారీతనం ఉండేలా చర్యలు తీసుకోవాలి. విద్యార్థులకు అందే భోజనం నాణ్యతను సాంకేతికతతో పరీక్షించాలి. ఇందులో భాగంగా విద్యార్థులకు పౌష్టికాహారం అందేలా చర్యలు తీసుకోవాలి.' అని రేవంత్ రెడ్డి ఆదేశించారు.

హాస్టళ్లలో విద్యార్థులకు అందించే దుస్తులు, పుస్తకాలు, వారికి చేరుతున్నాయా లేదో చూసుకోవాలని అధికారులను సీఎం ఆదేశించారు. ప్రతీ హాస్టల్‌‌లో మౌలిక సదుపాయాలపై పూర్తి స్థాయి డేటాను ఎప్పటికప్పుడు ఆన్‌లైన్‌లో అప్‌డేట్ చేయాలన్నారు.

విద్యార్థుల ఆరోగ్యంపై ప్రత్యేక దృష్టి పెట్టాలని సీఎం చెప్పారు. వారి ఆరోగ్య పరిస్థితిని సమీక్షించేందుకు ప్రత్యేక విధానాన్ని అనుసరించాలని స్పష్టం చేశారు. హాస్టళ్లపై సమీపంలోని వైద్య కళాశాలలు, కమ్యూనిటీ హెల్త్ సెంటర్లకు అనుసంధానం చేయాలన్నారు. అధికారులు ఎప్పటికప్పుడు హాస్టళ్లను సందర్శించి ఆరోగ్య తనిఖీలు చేయాలని స్పష్టం చేశారు. హాస్టళ్లకు సంబంధించి.. ప్రతీ నెలా గ్రీన్ ఛానెల్‌లో నిధులు అందేలా కార్యాచరణ రూపొందించాలన్నారు.