తెలంగాణలో రాగల 48 గంటలు భారీ వర్షాలు.. ఆంధ్రప్రదేశ్‌లో వాతావరణం ఇలా!

తెలంగాణలో భారీ వర్షాలు కురవనున్నాయి. ఆంధ్రప్రదేశ్‌లో కూడా కొన్ని ప్రాంతాల్లో జల్లులు పడనున్నాయి. ఈ మేరకు వాతావరణ శాఖ వివరాలు వెల్లడించింది.

బంగాళాఖాతంలో ఏర్పడిన తీవ్ర వాయుగుండం ప్రభావంతో తెలంగాణ వ్యాప్తంగా వానలు దంచికొడుతున్నాయి. రానున్న రెండు రోజుల పాటు (జులై 29, 30 తేదీలు) రాష్ట్రవ్యాప్తంగా పలు ప్రాంతాల్లో భారీ నుంచి అత్యంత భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం (IMD Hyderabad) వెల్లడించింది. ముఖ్యంగా ఉత్తర, ఈశాన్య, పశ్చిమ తెలంగాణ జిల్లాలలో వర్ష తీవ్రత ఎక్కువగా ఉంటుందని హెచ్చరించింది.

ఏపీ, తెలంగాణ వానలు

పరిస్థితి తీవ్రతను బట్టి వాతావరణ శాఖ వివిధ జిల్లాలకు హెచ్చరికలు జారీ చేసింది. ముఖ్యంగా వర్షపాతం ఎక్కువగా నమోదయ్యే అవకాశం ఉన్న జిల్లాలకు ఆరెంజ్ అలెర్ట్ ప్రకటిస్తూ ప్రజలను అప్రమత్తం చేసింది. కరీంనగర్, పెద్దపల్లి, జగిత్యాల, రాజన్న సిరిసిల్ల, హనుమకొండ, జయశంకర్ భూపాలపల్లి జిల్లాలకు ఆరెంజ్ అలెర్ట్ జారీ చేశారు.

మరికొన్ని జిల్లాల్లో భారీ వర్ష సూచనతో ఎల్లో అలర్ట్ జారీ చేశారు. ఇందులో ఆదిలాబాద్, కుమురం భీమ్ ఆసిఫాబాద్, మంచిర్యాల, భద్రాద్రి కొత్తగూడెం, ఖమ్మం, మహబూబాబాద్, వరంగల్, ములుగు, జనగాం, మెదక్, కామారెడ్డి, సంగారెడ్డి, సిద్దిపేట, యాదాద్రి భువనగిరి, సూర్యాపేట, మేడ్చల్ మల్కాజ్‌గిరి, రాజధాని హైదరాబాద్‌తో సహా 21 జిల్లాలు ఉన్నాయి.

జీహెచ్‌ఎంసీ పరిధిలోని హైదరాబాద్, పరిసర ప్రాంతాలలో రోజంతా ఆకాశం పూర్తిస్థాయిలో మేఘావృతమై ఉంటుందని అధికారులు తెలిపారు. నగరంలో అక్కడక్కడ తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు పడే అవకాశముంది. మిగిలిన జిల్లాల్లో అక్కడక్కడా మోస్తరు వర్షాలు నమోదు కావొచ్చని అంచనా వేశారు.

రాబోయే 36 గంటల్లో ఉత్తర తెలంగాణలోని కొన్ని ప్రాంతాల్లో మొత్తం వర్షపాతం 300-450 మి.మీ వరకు నమోదై, భారీ వరదలకు దారితీయవచ్చు. నాగర్‌కర్నూల్, వనపర్తి, నల్గొండ వంటి దక్షిణ తెలంగాణ జిల్లాల్లో కేవలం తేలికపాటి వర్షాలు మాత్రమే కురుస్తాయి.

లోతట్టు ప్రాంతాల ప్రజలు, వాగులు, వంకలు పొంగిపొర్లే ప్రదేశాల్లో ఉన్నవారు అప్రమత్తంగా ఉండాలి. రైతులు తమ పంట ఉత్పత్తులు తడవకుండా తగిన రక్షణ చర్యలు తీసుకోవాలని వ్యవసాయ అధికారులు సూచిస్తున్నారు. విద్యుత్ స్తంభాలు, పాత భవనాలకు దూరంగా ఉండాలి. ప్రయాణాలు చేసేవారు ముందస్తుగా వాతావరణ సమాచారాన్ని తెలుసుకోవడం శ్రేయస్కరం.

ఆంధ్రప్రదేశ్ వాతావరణం

ఆంధ్రప్రదేశ్‌లో బుధవారం రోజున పలు జిల్లాల్లో మోస్తరు నుంచి తేలికపాటి వానలు పడే అవకాశం ఉంది. అల్లూరి సీతారామరాజు, పోలవరం జిల్లాల్లో కొన్నిచోట్ల మోస్తరు వర్షాలు కురిసే అవకాశం ఉందని APSDMA వెల్లడించింది. శ్రీకాకుళం, మన్యం, తూర్పుగోదావరి, పశ్చిమగోదావరి, ఏలూరు, ఎన్టీఆర్, నంద్యాల జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు పడే అవకాశం ఉందని పేర్కొంది.

విజయనగరం, విశాఖ, అనకాపల్లి, కోనసీమ, పల్నాడు, మార్కాపురం, ప్రకాశం, కృష్ణా, అనంతపురం, సత్యసాయి, చిత్తూరు, తిరుపతి జిల్లాల్లో తేలికపాటి జల్లులు పడే అవకాశం ఉందని వాతావరణ శాఖ తెలిపింది.