E-Paper
కోకాపేట్లో ఎకరం రూ.120 కోట్లు.. హెచ్ఎండీఏ ఈ-వేలంలో రికార్డు ధరలు!
కోకాపేట్లో మరోసారి భూముల ధరలు ఆకాశాన్ని తాకాయి. హెచ్ఎండీఏ నిర్వహించన వేలంలో గోల్డెన్ మైల్, నియోపాలీస్ లేఅవుట్లలో రికార్డు ధరలు పలికాయి.
Prefer HTon Google
హైదరాబాద్ రియల్ ఎస్టేట్ రంగంలో మరోసారి రికార్డు స్థాయి ధరలు నమోదయ్యాయి. నగరంలోని అత్యంత విలాసవంతమైన, వ్యూహాత్మక ప్రాంతంగా పేరొందిన కోకాపేట్ భూములకు ఈ-వేలంలో ఊహించని రీతిలో భారీ స్పందన లభించింది. రంగారెడ్డి జిల్లా గండిపేట మండలం కోకాపేట్లోని గోల్డెన్ మైల్, నియోపోలిస్ లేఅవుట్లోని విలువైన భూములకు హైదరాబాద్ మహానగరాభివృద్ధి సంస్థ (HMDA) నిర్వహించిన ఈ-వేలంలో బిల్డర్లు, డెవలపర్లు పోటీపడి మరీ కోట్లు కుమ్మరించారు.
HMDA విడుదల చేసిన పత్రికా ప్రకటన ప్రకారం, ఈ వేలంలో భూముల ధరలు కేటాయించిన అప్సెట్ ధర (కనీస మద్దతు ధర) కంటే చాలా రెట్లు ఎక్కువ ధరను పలికాయి.
గోల్డెన్ మైల్ సైట్-1 : ఇక్కడ ఉన్న 0.70 ఎకరాల భూమి ఎకరానికి రూ. 115 కోట్ల చొప్పున అత్యధిక బిడ్ దక్కించుకుంది. HMDA ఈ ప్లాట్కు ప్రాథమికంగా ఎకరానికి రూ. 70 కోట్లు అప్సెట్ ధరగా నిర్ణయించగా, వేలంలో ఊహించని రీతిలో ఆకాశాన్ని తాకే ధర లభించింది.
నియోపోలిస్ లేఅవుట్ (ప్లాట్ నెం. 17): 4.59 ఎకరాల విస్తీర్ణం కలిగిన ప్లాట్ నంబర్ 17కు సంబంధించి సింగిల్ బిడ్ ద్వారా ఎకరానికి అత్యధికంగా రూ. 120 కోట్ల ధర నమోదైంది.
హైదరాబాద్ పశ్చిమ ప్రాంత అభివృద్ధి కారిడార్లో కోకాపేట్ అత్యంత కీలకమైన వ్యాపార, నివాస కేంద్రంగా వేగంగా రూపాంతరం చెందుతోంది. ఈ భూములకు ఉన్న ప్రాధాన్యతను పరిశీలిస్తే.. ఔటర్ రింగ్ రోడ్డుకి అతి సమీపంలో ఉండటం వల్ల శంషాబాద్ అంతర్జాతీయ విమానాశ్రయానికి నేరుగా, సులువుగా చేరుకోవచ్చు.
గచ్చిబౌలి, ఫైనాన్షియల్ డిస్ట్రిక్ట్, హైటెక్ సిటీ వంటి ప్రధాన ఐటీ ఉత్పత్తుల ప్రాంగణాలకు ఐదు నుంచి పది నిమిషాల వ్యవధిలోనే చేరుకునేంత సమీపంలో ఈ లేఅవుట్లు ఉన్నాయి.
HMDA నియోపోలిస్లో విస్తృతమైన మల్టీ-లేన్ రోడ్లు, అండర్గ్రౌండ్ డ్రైనేజీ, త్రాగునీరు, విద్యుత్ సరఫరా వ్యవస్థలతో ప్రపంచ స్థాయి సదుపాయాలు కల్పించింది. అంతేకాకుండా ఇక్కడ గగనతలాన్ని తాకే బహుళ అంతస్తుల భవనాల నిర్మాణానికి దిగ్గజ డెవలపర్లు ఆసక్తి చూపుతున్నారు.
ఈ వేలం ఫలితాలు హైదరాబాద్ రియల్ ఎస్టేట్ మార్కెట్ స్థిరత్వాన్ని, గ్లోబల్ ఇన్వెస్టర్లకు నగరంలో ఉన్న నమ్మకాన్ని మరోసారి స్పష్టం చేస్తున్నాయని ఆర్థిక విశ్లేషకులు అభిప్రాయపడుతున్నారు.
