SIR in Telangana : మీ 'ఎన్యూమరేషన్ ఫామ్' ఇంకా రాలేదా..? సందేహాలుంటే ఈ టోల్ ఫ్రీ నంబర్‌కు కాల్ చేయండి!

తెలంగాణలో ఓటర్ల జాబితా నమోదు, ధృవీకరణ ప్రక్రియ వేగవంతమైంది. ఇప్పటివరకు ఎన్యూమరేషన్ ఫామ్ అందని వారు ఆన్‌లైన్ ద్వారా లేదా తమ ప్రాంత బీఎల్ఓను సంప్రదించి వివరాలను నమోదు చేసుకోవచ్చు. సాంకేతిక ఇబ్బందులుంటే 1950 టోల్ ఫ్రీ నంబర్‌కు కాల్ చేసి సహాయం పొందవచ్చు

తెలంగాణలోని ఓటర్లకు ఎన్నికల సంఘం కీలక అలర్ట్ జారీ చేసింది. రాబోయే ఎన్నికలను దృష్టిలో ఉంచుకొని ఓటర్ల జాబితాను పక్కాగా రూపొందించేందుకు భారత ఎన్నికల సంఘం (ECI) ప్రత్యేక చర్యలు చేపట్టింది.

మీ 'ఎన్యూమరేషన్ ఫామ్' ఇంకా రాలేదా?

ప్రజాస్వామ్యంలో ప్రతి ఓటు ఎంతో విలువైనది. ఓటర్ల జాబితాలో మీ పేరు ఖచ్చితంగా ఉండేలా చూసుకోవడం ప్రతి పౌరుడి బాధ్యత. అయితే…. ఓటర్ల వివరాల నమోదు, మార్పులు చేర్పులకు సంబంధించిన 'ఎన్యూమరేషన్ ఫామ్' (Enumeration Form) ఇంకా మీకు అందకపోతే ఆందోళన చెందాల్సిన అవసరం లేదు. ఓటర్లు తమ ఫామ్‌ను సులభంగా పొందేందుకు ఎన్నికల సంఘం మూడు ముఖ్యమైన మార్గాలను అందుబాటులోకి తెచ్చింది.

ఫామ్ కోసం ఏం చేయాలి? ఎలా దరఖాస్తు చేసుకోవాలి?

• ఆన్‌లైన్ ద్వారా: ఒకవేళ మీకు ఎన్యూమరేషన్ ఫామ్ భౌతికంగా అందకపోతే, మీరు నేరుగా భారత ఎన్నికల సంఘం అధికారిక వెబ్‌సైట్ voters.eci.gov.in ను సందర్శించవచ్చు. అక్కడ ఆన్‌లైన్ లోనే మీ ఎన్యూమరేషన్ ఫామ్‌ను పూర్తి చేసి సమర్పించే సదుపాయం ఉంది.
• బీఎల్ఓను సంప్రదించడం ద్వారా: మీ పరిధిలోని బూత్ స్థాయి అధికారిని (BLO) కలిసి మీ ఎన్యూమరేషన్ ఫామ్‌ను ఇవ్వాల్సిందిగా కోరవచ్చు. వారు మీ వివరాలను నమోదు చేయడంలో పూర్తి సహాయం అందిస్తారు.
• బీఎల్ఓ వివరాలు తెలుసుకోవడం ఎలా?: మీ ప్రాంతానికి సంబంధించిన బీఎల్ఓ ఎవరో మీకు తెలియకపోతే, తెలంగాణ ఎన్నికల సంఘం అధికారిక వెబ్‌సైట్ ceotelangana.nic.in ను సందర్శించి మీ బూత్ స్థాయి అధికారి పూర్తి వివరాలను సులభంగా తెలుసుకోవచ్చు.

ఈ ప్రక్రియ ద్వారా ఓటర్ల జాబితాలో మీ పేరు ఎలాంటి తప్పులు లేకుండా భద్రంగా ఉంటుంది. ఇది ప్రజాస్వామ్యాన్ని మరింత బలోపేతం చేయడమే కాకుండా, ప్రతి ఓటరుకు తమ ఓటు హక్కును వినియోగించుకునేలా పూర్తి భరోసా ఇస్తుంది. గుర్తుంచుకోండి.. ప్రతి ఫామ్ ఎంతో కీలకం, ప్రతి ఓటూ ఎంతో విలువైనది.

హెల్ప్‌లైన్ నంబర్

ఎన్యూమరేషన్ ఫామ్ నింపడంలో లేదా ఓటరు నమోదు ప్రక్రియలో ఎలాంటి సందేహాలున్నా, సాంకేతిక ఇబ్బందులు ఎదురైనా ఓటర్లు వెంటనే 1950 టోల్ ఫ్రీ నంబర్‌కు కాల్ చేసి సహాయం పొందవచ్చు. దీనితో పాటు ఎన్నికల సంఘం కొత్తగా ప్రవేశపెట్టిన 'బుక్ ఏ కాల్ విత్ బీఎల్ఓ' (Book a Call with BLO) సేవను ఉపయోగించుకొని కూడా మీ సందేహాలను నివృత్తి చేసుకోవచ్చు.