Montha Cyclone Update : మొంథా తుపాను ఎఫెక్ట్.. తెలంగాణలో భారీ వర్షాలు!

తెలంగాణ రాష్ట్రానికి వాతావరణ శాఖ హెచ్చరిక జారీ చేసింది. మొంథా తుపాను ప్రభావంతో పలు రాష్ట్రాల్లో వానలు పడతాయని తెలిపింది.

బంగాళాఖాతంలో ఏర్పడిన మొంథా తీవ్ర తుపానుగా మారింది. దీని ప్రభావంతో తెలంగాణ రాష్ట్రంలోని పలు జిల్లాల్లో భారీ వర్షాలు కురుస్తాయని వాతావరణ శాఖ హెచ్చరించింది. గంటకు 30 నుంచి 40 కిలోమీటర్ల వేగంతో గాలులు వీస్తాయని వెల్లడించింది. ఉరుములు మెరుపులతో కూడిన వానలు పడతాయని తెలిపింది. గత ఆరు గంటల్లో గంటకు 15 కి.మీ వేగంతో ఉత్తర-వాయువ్య దిశగా కదిలి తీవ్ర తుఫానుగా మారింది మొంథా. ఇది మచిలీపట్నానికి దక్షిణ-ఆగ్నేయంగా 190 కి.మీ, కాకినాడకు దక్షిణ-ఆగ్నేయంగా 270 కి.మీ, విశాఖపట్నంకు దక్షిణ-నైరుతి దిశలో 340 కి.మీ, గోపాల్‌పూర్ (ఒడిశా)కి దక్షిణ-నైరుతి దిశలో 550 కి.మీ దూరంలో కేంద్రీకృతమై ఉంది.

తెలంగాణలో వర్షాలు

ఇది ఉత్తర-వాయువ్య దిశగా కదులుతూ అక్టోబర్ 28 సాయంత్రం లేదా రాత్రి సమయంలో కాకినాడ సమీపంలోని మచిలీపట్నం, కళింగపట్నం మధ్య ఆంధ్రప్రదేశ్ తీరాన్ని దాటనుంది. ఈ సమయంలో గరిష్టంగా గంటకు 90 నుంచి 110 కి.మీ. వేగంతో గాలులు వీస్తాయని అంచనా.

అక్టోబర్ 28న పెద్దపల్లి, జయశంకర్ భూపాలపల్లి, ములుగు, ఖమ్మం, సూర్యాపేట, నాగర్‌కర్నూల్, సంగారెడ్డి, రంగారెడ్డి, వికారాబాద్, నల్గొండ, మహబూబ్‌నగర్, జనగాం జిల్లాలతో సహా ఇతర ప్రాంతల్లో భారీ వర్షాలు కురిసే అవకాశం ఉంది. వీటిలో కొన్ని ప్రాంతాలలో అక్టోబర్ 28 న 90–150 మిల్లీమీటర్ల వర్షపాతం నమోదు కావచ్చు.

హైదరాబాద్, మెదక్, కామారెడ్డి, నిజామాబాద్, ఆదిలాబాద్, జగిత్యాల, మంచిర్యాల, మహబూబాబాద్, వరంగల్ జిల్లాల్లో మోస్తరు నుండి భారీ వర్షాలు కురుస్తాయని, కొన్ని చోట్ల 40–70 మి.మీ. వర్షపాతం నమోదయ్యే అవకాశం ఉందని వాతావరణ శాఖ తెలిపింది.

హైదరాబాద్‌లో అక్టోబర్ 28న అంతట ఒక మోస్తరు నుండి భారీ వర్షాలు కురుస్తాయని అంచనా. ఇప్పటికే భాగ్యనగరంలోని పలు ప్రాంతాల్లో వర్షం కురిసింది.

అక్టోబరు 29న (బుధవారం), 30వ తేదీల్లో కొన్ని జిల్లాల్లో భారీగా వర్షం పడే అవకాశం ఉంది. ఆదిలాబాద్, కుమురం భీమ్ ఆసిఫాబాద్, మంచిర్యాల, జయశంకర్ భూపాలపల్లి, ములుగు, భద్రాద్రి కొత్తగూడెంలో అతి భారీ వర్షాలు కురిసే అవకాశం ఉందని ఐఎండీ వెల్లడించింది. హైదరాబాద్, సంగారెడ్డి, ఖమ్మం, కామారెడ్డి, వరంగల్ సహా అనేక ఇతర జిల్లాల్లో భారీ వర్షాలు కురుస్తాయని అంచనా.