IMD Weather Update : రాబోయే ఐదారు రోజులు వాతావరణం అప్డేట్.. ఈ జిల్లాల్లో వర్షాలు!

తెలంగాణ ప్రజలకు వాతావరణ శాఖ కీలక హెచ్చరిక జారీ చేసింది. ఆగస్టు 23 రోజున రాష్ట్రంలోని ఐదు ప్రధాన జిల్లాల్లో వర్షాలు పడే అవకాశం ఉందనడంతో అధికారులు ముందస్తు హెచ్చరికలు జారీ చేశారు.

భారత వాతావరణ శాఖ (IMD) హైదరాబాద్‌ వాతావరణ కేంద్రం తెలంగాణ రాష్ట్రానికి రాబోయే రోజుల వాతావరణ సూచనలు, హెచ్చరికల బులేటిన్‌ను విడుదల చేసింది. రాష్ట్రంలో రాబోయే కొన్ని రోజుల పాటు పలు జిల్లాల్లో భారీ వర్షాలతో పాటు గంటకు 30 నుండి 40 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది.

తెలంగాణ వర్షాలు

23వ తేదీన ఉదయం 08:30 నుండి 24వ తేదీ ఉదయం 08:30 వరకు రాష్ట్రంలోని కొన్ని చోట్ల తేలికపాటి నుండి మోస్తరు వర్షాలు పడవచ్చు. కొమురంభీం ఆసిఫాబాద్, మంచిర్యాల, పెద్దపల్లి, జయశంకర్ భూపాలపల్లి, ములుగు జిల్లాల్లో అక్కడక్కడ భారీ వర్షాలు నమోదు కావచ్చు.

ఆదిలాబాద్, నిజామాబాద్, జగిత్యాల, రాజన్న సిరిసిల్ల, కరీంనగర్, భద్రాద్రి కొత్తగూడెం, మహబూబాబాద్, వరంగల్, హనుమకొండ, రంగారెడ్డి, హైదరాబాద్, మేడ్చల్-మల్కాజ్‌గిరి, వికారాబాద్, సంగారెడ్డి, మెదక్, కామారెడ్డి, మహబూబ్‌నగర్ జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు పడే అవకాశముంది.

24వ తేదీన కొమురంభీం ఆసిఫాబాద్, మంచిర్యాల, కరీంనగర్, పెద్దపల్లి, జయశంకర్ భూపాలపల్లి, ములుగు జిల్లాల్లో భారీ వర్షాలు కురిసే అవకాశం ఉంది. ఖమ్మంతో సహా రాష్ట్రంలోని అత్యధిక జిల్లాల్లో ఉరుములు, మెరుపులు మరియు గంటకు 30-40 కి.మీ వేగంతో ఈదురుగాలులు వీచే సూచనలు ఉన్నాయి.

25వ తేదీన ఆదిలాబాద్, కొమురంభీం ఆసిఫాబాద్, మంచిర్యాల, పెద్దపల్లి జిల్లాల్లో భారీ వర్షాలు పడవచ్చు. పలు జిల్లాల్లో ఈదురుగాలులు, ఉరుములతో కూడిన వర్షాలు కురుస్తాయి.

26వ తేదీన రాష్ట్రవ్యాప్తంగా ఉరుములు, మెరుపులతో కూడిన ఈదురుగాలుల వర్షాలు పడే అవకాశం ఉంది. 27, 28 తేదీల్లో తేలికపాటి నుండి మోస్తరు వర్షాలు మాత్రమే కురిసే అవకాశం ఉంది, ఎలాంటి ప్రత్యేక హెచ్చరికలు లేవు.

ఉరుములు, మెరుపులు సంభవించే సమయంలో చెట్ల కింద, విద్యుత్ స్తంభాల వద్ద నిలబడకూడదని నిపుణులు హెచ్చరిస్తున్నారు. ప్రయాణాలు చేసే వాహనదారులు, రోడ్లపై నీరు నిలిచే అవకాశాలు ఉన్నందున జాగ్రత్తగా ప్రయాణించాలని, అత్యవసరమైతే తప్ప బయటకు రాకపోవడమే శ్రేయస్కరమని జీహెచ్‌ఎంసీ, డిజాస్టర్ మేనేజ్‌మెంట్ అధికారులు విజ్ఞప్తి చేశారు.