E-Paper
ఎట్టకేలకు ఆగస్టులో అందుబాటులోకి రానున్న నల్గొండ ఎక్స్ రోడ్స్ ఫ్లైఓవర్!
హైదరాబాద్ నుంచి నల్గొండ వైపు వెళ్లేవారికి ట్రాఫిక్ కష్టాలు తప్పనున్నాయి. ఎప్పటి నుంచో ఎదురుచూస్తున్న నల్గొండ ఎక్స్ రోడ్స్ ఫ్లై ఓవర్ ఆగస్టులో ప్రారంభం కానుంది.
హైదరాబాద్ నగరంలో ట్రాఫిక్ కష్టాలను తీర్చేందుకు గ్రేటర్ హైదరాబాద్ మున్సిపల్ కార్పొరేషన్(GHMC) ప్రతిష్టాత్మకంగా చేపట్టిన వ్యూహాత్మక రహదారుల అభివృద్ధి పథకంలో భాగంగా ఎంతో కాలంగా ఎదురుచూస్తున్న నల్గొండ ఎక్స్ రోడ్స్ ఫ్లైఓవర్ ప్రారంభానికి సిద్ధమవుతోంది. అడ్డంకులను అధిగమించి, సుదీర్ఘ నిరీక్షణ తర్వాత ఈ ఫ్లైఓవర్ను వచ్చే ఆగస్టు నెలలో ప్రారంభానికి అధికారులు సర్వం సిద్ధం చేస్తున్నారు.
నల్గొండ ఎక్స్ రోడ్స్ నుండి ఒవైసీ హాస్పిటల్ జంక్షన్ వరకు ప్రయాణించే వాహనదారులకు ఈ ఫ్లైఓవర్ ఒక వరంలా మారనుంది. సుమారు 2.8 కిలోమీటర్ల పొడవుతో, నాలుగు లేన్లతో నిర్మిస్తున్న ఈ ఫ్లైఓవర్ ప్రయాణికులకు ఎలాంటి సిగ్నల్స్ లేకుండా సాఫీగా సాగిపోయే మార్గం సుగమం కానుంది.
జీహెచ్ఎంసీ కమిషనర్ ఆర్వీ.కేర్ణన్, చీఫ్ ఇంజనీర్ రత్నాకర్, ఇతర ఉన్నతాధికారులతో కలిసి ప్రాజెక్ట్ స్థలాన్ని స్వయంగా సందర్శించారు. నిర్మాణ పనుల పురోగతిని క్షేత్రస్థాయిలో పరిశీలించిన ఆయన.. ప్రస్తుతం జరుగుతున్న సివిల్, ఫినిషింగ్ పనులపై సంతృప్తి వ్యక్తం చేశారు. ఆగస్టు మొదటి వారానికల్లా మిగిలిపోయిన అన్ని పనులను పూర్తి చేయాలని కాంట్రాక్ట్ ఏజెన్సీలను ఆదేశించారు. నిర్దేశిత గడువులోగా ఫ్లైఓవర్ను ప్రజలకు అందుబాటులోకి తీసుకురావాలని స్పష్టం చేశారు.
ఈ ఫ్లైఓవర్ చంచల్గూడ వద్ద ప్రారంభమై, సంతోష్ నగర్లోని యాదగిరి థియేటర్ సమీపంలో ముగుస్తుంది. ప్రయాణికుల సౌకర్యార్థం సైదాబాద్ వద్ద అప్-ర్యాంప్ (పైకి వెళ్లే మార్గం), ఐఎస్ సదన్ వద్ద డౌన్-ర్యాంప్ (కిందికి దిగే మార్గం)లను ఏర్పాటు చేశారు.
ప్రస్తుతం చంచల్గూడ ప్రింటింగ్ ప్రెస్ నుండి ఐఎస్ సదన్ వరకు ప్రయాణించాలంటే తీవ్రమైన ట్రాఫిక్ జామ్ అవుతుంది. దీంతో వాహనదారులు దాదాపు 30 నిమిషాల పాటు నరకం చూస్తున్నారు. అయితే ఈ సరికొత్త ఫ్లైఓవర్ అందుబాటులోకి వస్తే.. ఈ ప్రయాణ సమయం కేవలం 8 నుండి 10 నిమిషాలకు తగ్గిపోతుంది. దీంతో ఇంధనం ఆదా అవ్వడమే కాదు.. టైమ్ కూడా సేవ్ అవుతుంది. ప్రధాన కూడళ్లలో ట్రాఫిక్ రద్దీ గణనీయంగా తగ్గుతుంది.
