1 నుండి 19 ఏళ్ల పిల్లలకు ఆరోగ్య శాఖ నుంచి అప్డేట్.. జులై 13న ఆ టాబ్లెట్స్ పంపిణీ!

జులై 13న రాష్ట్రవ్యాప్తంగా అల్బెండజోల్ మాత్రలను పంపిణీ చేయనుంది రాష్ట్ర ప్రభుత్వం. జాతీయ నులిపురుగు నిర్మూలన దినోత్సవంలో భాగంగా ఈ విషయాన్ని ప్రకటించింది.

తెలంగాణ రాష్ట్ర ప్రభుత్వం పిల్లల ఆరోగ్యంపై ప్రత్యేక దృష్టి సారించింది. రాష్ట్రంలోని మొత్తం 33 జిల్లాల్లో జులై 13, 2026న జాతీయ నులిపురుగుల నిర్మూలన దినోత్సవం(National Deworming Day) నిర్వహించనున్నట్లు వైద్య ఆరోగ్య శాఖ ప్రకటించింది. 1 నుండి 19 సంవత్సరాల వయస్సు గల పిల్లలందరికీ ఉచితంగా అల్బెండజోల్ (Albendazole) మాత్రలను పంపిణీ చేయనున్నారు.

తెలంగాణ ప్రభుత్వం

ఏదైనా కారణంగా జులై 13న మాత్రలు తీసుకోలేకపోయిన లేదా గైర్హాజరైన పిల్లల కోసం జూలై 20, 2026న Mop-Up Day నిర్వహిస్తారు. ఈ విడతలో రాష్ట్రవ్యాప్తంగా మొత్తం 96,81,855 మంది పిల్లలను లక్ష్యంగా నిర్దేశించుకున్నారు. అంగన్‌వాడీ కేంద్రాలు, ప్రభుత్వ, ప్రైవేట్ పాఠశాలలు, కళాశాలల ద్వారా ఒకే రోజున ఈ మాత్రలను నిర్దేశిత పద్ధతిలో ఉచితంగా అందజేస్తారు. వైద్య ఆరోగ్య శాఖ, విద్యాశాఖ, మహిళా శిశు సంక్షేమ శాఖల సమన్వయంతో ఈ కార్యక్రమం జరగనుంది. పిల్లల వయస్సును బట్టి మాత్రలను ఈ క్రింది విధంగా అందించాలని అధికారులు స్పష్టం చేశారు:

1 నుండి 2 సంవత్సరాలు: సగం మాత్ర (½ Tablet - పొడి చేసి ఇవ్వాలి)

2 నుండి 3 సంవత్సరాలు: ఒక పూర్తి మాత్ర (1 Tablet - పొడి చేసి ఇవ్వాలి)

3 నుండి 19 సంవత్సరాలు: ఒక పూర్తి మాత్ర (1 Tablet - నమిలి మింగాలి)

1 నుండి 3 సంవత్సరాల పిల్లలకు మాత్రను బాగా పొడి చేసి, నీటితో కలిపి తాగించాలి. 3 ఏళ్లు పైబడిన పిల్లలు మాత్రను నమిలి, ఆపై 2-3 గుటకల నీరు తాగాలి. ఈ అల్బెండజోల్ 400mg మాత్రలు 100 శాతం సురక్షితమైనవి. అయితే ఈ మాత్రలను ఇంటికి తీసుకువెళ్లడానికి ఇవ్వరు, సిబ్బంది సమక్షంలోనే వేసుకోవాలి.

నులిపురుగుల నిర్మూలన వల్ల అనేక ప్రయోజనాలు ఉన్నాయి. పిల్లల్లో రక్తహీనత తగ్గుతుంది. మట్టి ద్వారా సంక్రమించే నులిపురుగుల ఇన్ఫెక్షన్లు పూర్తిగా నశిస్తాయి. పిల్లలు మరింత చురుగ్గా, ఉత్సాహంగా ఉంటారు. అనారోగ్యం తగ్గడం వల్ల పాఠశాలలకు హాజరు శాతం పెరుగుతుంది. పిల్లల భవిష్యత్తు, ఆరోగ్య రక్షణకై తల్లిదండ్రులు, ఉపాధ్యాయులు ఈ అవకాశాన్ని సద్వినియోగం చేసుకోవాలని ప్రభుత్వం కోరింది.