వెదర్ రిపోర్ట్ : ఏపీలో పిడుగులతో కూడిన వర్షాలు - తెలంగాణలోని ఈ జిల్లాలకు హెచ్చరికలు

AP Telangana Weather Update : ఏపీ, తెలంగాణలో ఇవాళ వర్షాలు కురిసే అవకాశం ఉందని వాతావరణ శాఖ తెలిపింది. ఏపీలో పిడుగులతో కూడిన వర్షాలు, తెలంగాణలో ఈదురుగాలులు వీచే అవకాశం ఉందని అంచనా వేసింది.

AP Telangana Weather Update : తెలుగు రాష్ట్రాల ప్రజలకు వాతావరణ శాఖ ముఖ్యమైన సమాచారాన్ని అందించింది. ఇవాళ(ఆగస్ట్ 21) పలు జిల్లాల్లో వర్షాలు కురిసే అవకాశం ఉందని వాతావరణశాఖ పేర్కొంది. పలు జిల్లాలకు ఎల్లో హెచ్చరికలను జారీ చేసింది.

తెలుగు రాష్ట్రాలకు వర్ష సూచన

ఆంధ్రప్రదేశ్‌లో వర్షాలు….

ఆంధ్రప్రదేశ్ రాష్ట్ర విపత్తుల నిర్వహణ సంస్థ (APSDMA) తెలిపిన వివరాల ప్రకారం… ఇవాళ పోలవరం, ఏలూరు జిల్లాల్లో ఉరుములు, మెరుపులతో పాటు అక్కడా ఇక్కడా పిడుగులు పడే అవకాశం ఉంది. ఈ ప్రాంతాల్లో మోస్తరు వర్షాలు కురుసే సూచనలున్నాయి.

పిడుగులు పడే అవకాశం ఉన్నందున ప్రజలు, ముఖ్యంగా పొలాల్లో పనిచేసే రైతులు, కూలీలు, పశువుల కాపరులు చెట్ల కింద నిలబడకూడదని అధికారులు సూచించారు. సురక్షితమైన ప్రాంతాల్లో ఆశ్రయం పొందాలని పేర్కొన్నారు.

కాకినాడ, అంబేడ్కర్ కోనసీమ, తూర్పుగోదావరి, పశ్చిమగోదావరి జిల్లాల్లోని కొన్ని ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉంది. అలాగే మిగిలిన ఉత్తరాంధ్ర, దక్షిణ కోస్తా జిల్లాల్లో అక్కడక్కడ చెదురుమదురుగా తేలికపాటి జల్లులు కురిసే సూచనలున్నాయి.

తెలంగాణలో ఈదురుగాలులు….

మరోవైపు హైదరాబాద్‌ వాతావరణ కేంద్రం బులెటిన్ ప్రకారం…. తెలంగాణలోని పలు జిల్లాల్లో గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉంది. ఉరుములు, మెరుపులతో కూడిన వర్షాలు పడే సూచనలున్నాయి.

ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, భూపాలపల్లి, ములుగు, కొత్తగూడెం, ఖమ్మం, వికారాబాద్, సంగారెడ్డి, మెదక్, కామారెడ్డి జిల్లాల్లో అక్కడక్కడ ఉరుములు, మెరుపులు, ఈదురుగాలులతో కూడిన వర్షాలు పడే అవకాశం ఉంది. ఈ జిల్లాలకు ఎల్లో హెచ్చరికలు జారీ అయ్యాయి.

హైదరాబాద్ వాతావరణం ఎలా ఉండనుంది..?

హైదరాబాద్ సిటీతో పాటు పరిసర ప్రాంతాల్లో ఆకాశం పాక్షికంగా మేఘావృతమై ఉంటుంది. సాయంత్రం లేదా రాత్రి వేళల్లో నగరంలోని కొన్ని ప్రాంతాల్లో తేలికపాటి వర్షం లేదా చినుకులు పడే అవకాశం ఉంది. నగరంలో గరిష్ఠ ఉష్ణోగ్రత 32 డిగ్రీలు, కనిష్ఠ ఉష్ణోగ్రత 25 డిగ్రీల సెల్సియస్‌గా నమోదయ్యే అవకాశం ఉంది. వాయువ్య దిశల నుంచి గంటకు 6 నుండి 10 కిలోమీటర్ల వేగంతో ఈదురు గాలులు వీచే సూచనలున్నాయి.