ఒక్క రూపాయి నోటు ఉంటే రూ.45 లక్షలు.. ఆశ చూపి లక్షలు కొట్టేసిన కేటుగాళ్లు

హైదరాబాద్‌లో ఘోరమైన ఘటన వెలుగుచూసింది. ఒక్క రూపాయి నోటు మీ దగ్గర ఉంటే లక్షలు వస్తాయంటూ ఓ వ్యక్తిని కేటుగాళ్లు నమ్మించారు. విడతలవారీగా డబ్బులు దోచేశారు.

పాత రూపాయి నోటు ఉంటే రూ.45 లక్షలు ఇస్తామన్న ప్రకటనను నమ్మి ఒక వ్యక్తి తన కష్టార్జితాన్ని దారపోశాడు. సైబర్ నేరగాళ్ల మాయమాటలు, డిఎస్పీ పేరుతో బెదిరింపులకు భయపడి నాలుగు రోజుల్లోనే రూ.7.9 లక్షలకు పైగా సమర్పించుకున్నాడు. ఈ ఘటన హైదరాబాద్‌లో వెలుగుచూసింది.

ప్రతీకాత్మక చిత్రం

హైదరాబాద్‌కు చెందిన 49 ఏళ్ల బాధితుడు సెప్టెంబర్ 20న సోషల్ మీడియాలో ఒక ప్రకటన చూశాడు. 'మీ దగ్గర పాత ఒక రూపాయి నోటు ఉంటే రూ.45 లక్షలకు కొనుగోలు చేస్తాం.' అనేది ఆ ప్రకటన సారాంశం. ప్రకటనలోని ఫోన్ నంబర్‌ను బాధితుడు సంప్రదించగా, డబ్బులు అకౌంట్‌లో వేయడానికి ముందు నోటు ఫోటోలు, వ్యక్తిగత వివరాలు కావాలని సైబర్ కేటుగాళ్లు కోరారు. బాధితుడు వివరాలు పంపిన వెంటనే అసలు మోసం మొదలైంది. రూ.45 లక్షల భారీ మొత్తం డిపాజిట్ చేయడానికి ఆదాయపు పన్ను, ఆర్‌బీఐ క్లియరెన్స్ ఛార్జీల పేరుతో డబ్బులు వసూలు చేయడం ప్రారంభించారు.

సెప్టెంబర్ 20 - 22 ఆర్బీఐ, ప్రాసెసింగ్, పన్నుల పేరుతో విడతల వారీగా డబ్బులు వసూలు చేశారు. సెప్టెంబర్ 23 ఆంధ్రప్రదేశ్ సైబర్ క్రైమ్ డీఎస్పీ పేరుతో బెదిరింపు చేశారు. వివిధ విడతలలో బాధితుడు మొత్తం రూ.7,90,000 చెల్లించాడు.

అంతటితో ఆగకుండా ఆంధ్రప్రదేశ్ సైబర్ క్రైమ్ డీఎస్పీగా నటిస్తూ ఒక కేటుగాడు ఫోన్ చేశాడు. 'నువ్వు బ్లాక్ మనీ విక్రయించే ముఠాతో చేతులు కలిపావు, కేసు నమోదు చేస్తాం.' అని బెదిరించి మరింత డబ్బు వసూలు చేశాడు. బాధితుడు భయాందోళనకు గురై మెుత్తం రూ.7.9 లక్షలకు పైగా పంపించాడు. చివరకు మళ్లీ డబ్బు కావాలని ఒత్తిడి చేయడంతో మోసపోయానని గ్రహించి పోలీసులను ఆశ్రయించాడు.

సామాన్య, మధ్యతరగతి కుటుంబాలు తమ పిల్లల భవిష్యత్తు కోసమో లేదా ఉన్నపళంగా ఆర్థిక కష్టాల నుంచి బయటపడటానికో ఇలాంటి సులభమైన ఆదాయ మార్గాల వైపు ఆకర్షితులవుతుంటారు. కష్టపడి కూడబెట్టిన సొమ్ము లేదా అప్పులు చేసి తెచ్చిన డబ్బును ఇలాంటి సైబర్ నేరగాళ్లకు సమర్పించుకుని మానసికంగా, ఆర్థికంగా నలిగిపోతున్నారు. బాధితుడు సైతం భయంతో ఎవరికీ చెప్పుకోలేక తీవ్ర వేదన అనుభవించాడు.