Railway Update : రైలు ప్రయాణికులకు అలర్ట్.. పలు రైళ్లు రద్దు.. కర్నూలు-కాచిగూడపై అప్డేట్

Railway Update : హైదరాబాద్ డివిజన్ పరిధిలోని ట్రాక్ నిర్వహణ పనుల కారణంగా రైల్వే శాఖ కీలక ప్రకటన చేసింది. పలు రైళ్లను పాక్షికంగా రద్దు చేయడమే కాకుండా.. కొన్ని రైళ్ల వేళల్లో మార్పులు చేసినట్లు దక్షిణ మధ్య రైల్వే ప్రకటించింది.

హైదరాబాద్ రైల్వే డివిజన్ పరిధిలోని నవీపేట్ – జానకంపేట్, కాచిగూడ – డోన్ సెక్షన్ల మధ్య అత్యవసర ట్రాక్ నిర్వహణ పనులు చేపట్టనున్నారు. ఈ మరమ్మతు పనుల కారణంగా అక్టోబర్, నవంబర్ నెలల్లో నడిచే పలు రైలు సర్వీసులను పాక్షికంగా రద్దు చేస్తున్నట్లు, మరికొన్ని రైళ్లను ఆలస్యంగా నడుపుతున్నట్లు రైల్వే అధికారులు ఒక ప్రకటనలో వెల్లడించారు.

ప్రతీకాత్మక చిత్రం

కొన్ని రైళ్లు నిర్దేశిత తేదీల్లో నిజామాబాద్ వరకు కాకుండా ముద్ఖేడ్ స్టేషన్ వరకు మాత్రమే నడుస్తాయి.

దౌండ్ – నిజామాబాద్ (రైలు నంబర్ 11409)

అక్టోబర్ 15, 16, 19, 22, 23, 26, 29, 30, నవంబర్ 02, 05, 06, 09, 12, 13 తేదీల్లో ముద్ఖేడ్ వరకే నడుస్తాయి. ఈ రైలు ముద్ఖేడ్ – నిజామాబాద్ మధ్య పాక్షికంగా రద్దవుతుంది. అనగా దౌండ్ నుంచి బయలుదేరే ఈ రైలు ముద్ఖేడ్ స్టేషన్ వద్దనే తన ప్రయాణాన్ని ముగిస్తుంది.

నిజామాబాద్ – పండర్‌పూర్ (రైలు నంబర్ 11413)

అక్టోబర్ 16, 17, 20, 23, 24, 27, 30, 31, నవంబర్ 03, 06, 07, 10, 13, 14 తేదీల్లో ఈ రైలు నిజామాబాద్ – ముద్ఖేడ్ మధ్య రద్దవుతుంది. ఇది నిజామాబాద్‌కు బదులుగా ముద్ఖేడ్ స్టేషన్ నుంచే పండర్‌పూర్‌కు బయలుదేరుతుంది.

కర్నూలు సిటీ – కాచిగూడ (రైలు నంబర్ 17024) అక్టోబర్ 15, 22, 29, నవంబర్ 05 రోజుల్లో ఈ రైలును మార్గమధ్యంలో దాదాపు 60 నిమిషాలపాటు నిలిపివేసి నడుపుతారు.

పాక్షికంగా రద్దయిన స్టేషన్ల మధ్య ప్రయాణించాల్సిన ప్రయాణికులు నిబంధనల ప్రకారం ఐఆర్‌సీటీసీ వెబ్‌సైట్ లేదా రైల్వే కౌంటర్ల వద్ద తమ టికెట్ రద్దు చేసుకుని రీఫండ్ పొందవచ్చు. ప్రయాణికులు తమ ప్రయాణంలో ఎలాంటి అసౌకర్యం కలగకుండా రైల్వే విచారణ సంఖ్య 139 ద్వారా లేదా రైల్వే అధికారిక యాప్/వెబ్‌సైట్ NTES ద్వారా రైళ్ల రాకపోకల సమయాలను ముందుగానే సరిచూసుకోవాలని రైల్వే అధికారులు కోరారు.