ఉత్తరాంధ్ర ప్రయాణికులకు అలర్ట్... విశాఖ - పార్వతీపురం మధ్య కొత్తగా మెము స్పెషల్ రైలు, పూర్తి వివరాలు

విశాఖపట్నం - పార్వతీపురం మధ్య కొత్త మెము (MEMU) స్పెషల్ రైలు నడుస్తుందని సౌత్ కోస్ట్ రైల్వే ప్రకటించింది. అక్టోబర్ 10 నుంచి 20 వరకు అందుబాటులో ఉంటుంది.

ఉత్తరాంధ్ర ప్రాంత ప్రయాణికులకు సౌత్ కోస్ట్ రైల్వే (దక్షిణ తీర రైల్వే) తీపి కబురు అందించింది. పండుగ వాతావరణం నెలకొన్న వేళ ప్రయాణికుల రద్దీని దృష్టిలో ఉంచుకుని విశాఖపట్నం - పార్వతీపురం మార్గంలో కొత్త స్పెషల్ మెము (MEMU) రైలును అందుబాటులోకి తెస్తున్నట్లు ప్రకటించింది.

విశాఖ - పార్వతీపురం ప్రయాణికులకు అలర్ట్

ఈనెల 10 నుంచి రాకపోకలు - టైమింగ్స్ వివరాలు…

ఈ రోజువారీ ప్రత్యేక సర్వీసు 2026 అక్టోబర్ 10వ తేదీ నుంచి అక్టోబర్ 20వ తేదీ వరకు ప్రయాణికులకు అందుబాటులో ఉంటుంది. ఈ ప్రత్యేక రైలు వేళలు మరియు స్టాప్‌ల వివరాలను రైల్వే శాఖ అధికారికంగా విడుదల చేసింది.

• విశాఖపట్నం – పార్వతీపురం స్పెషల్ మెము (రైలు నంబరు - 07268) : ఈ ప్రత్యేక రైలు ప్రతిరోజు ఉదయం 10:00 గంటలకు విశాఖపట్నం స్టేషన్ నుంచి బయలుదేరుతుంది. మార్గమధ్యలో సింహాచలం (10.21/10.22), కొత్తవలస (10.35/10.36), విజయనగరం (11.04/11.06), గజపతినగరం (11.28/11.29), కోమటిపల్లి (11.37/11.38), దొంకినవలస (11.47/11.48), బొబ్బిలి (11.59/12.01), సీతానగరం (12.11/12.12), నరసింహపురం హాల్ట్ (12.18/12.19) స్టేషన్లలో ఆగుతూ మధ్యాహ్నం 12:35 గంటలకు పార్వతీపురం చేరుకుంటుంది.
• పార్వతీపురం – విశాఖపట్నం స్పెషల్ మెము (రైలు నంబరు - 07267) : తిరుగు ప్రయాణంలో ఈ రైలు ప్రతిరోజు మధ్యాహ్నం 12:35 గంటలకు పార్వతీపురంలో బయలుదేరుతుంది. నరసింహపురం హాల్ట్ (12.39/12.40), సీతానగరం (12.45/12.46), బొబ్బిలి (12.57/12.59), దొంకినవలస (13.10/13.11), కోమటిపల్లి (13.20/13.21), గజపతినగరం (13.29/13.30), విజయనగరం (13.50/13.52), కొత్తవలస (14.17/14.18), సింహాచలం (14.30/14.31) స్టేషన్ల మీదుగా ప్రయాణించి సాయంత్రం 16:00 (4:00) గంటలకు విశాఖపట్నం చేరుకుంటుంది.

విశాఖపట్నం, విజయనగరం, పార్వతీపురం మన్యం జిల్లాల మధ్య నిత్యం రాకపోకలు సాగించే ఉద్యోగులు, విద్యార్థులు, వ్యాపారులు మరియు పండుగలకు సొంతూర్లకు వెళ్లే ప్రయాణికులకు ఈ మెము స్పెషల్ రైలు సర్వీసు ఎంతో సౌకర్యవంతంగా మారనుంది. ప్రయాణికులు ఈ తాత్కాలిక రైలు సదుపాయాన్ని వినియోగించుకోవాలని రైల్వే అధికారులు కోరారు.