పుంజుకోనున్న నైరుతి రుతుపవనాలు.. జూన్ 21 నుంచి తెలంగాణలో భారీ వర్షాలు

తెలంగాణకు వాతావరణ శాఖ చల్లని కబురు చెప్పింది. నైరుతి రుతుపవనాలు పుంజుకోనున్నాయని, జూన్ 21 నుంచి రాష్ట్రంలో భారీ వర్షాలు కురుస్తాయని ఐఎండీ తెలిపింది.

రాష్ట్రంలో నైరుతి రుతుపవనాలు ఎప్పుడు పుంజుకుంటాయా అని ఎంతో ఆత్రుతగా ఎదురుచూస్తున్న సాధారణ ప్రజలకు, రైతు లోకానికి భారత వాతావరణ శాఖ పెద్ద ఊరటనిచ్చే వార్త చెప్పింది. తెలంగాణ వ్యాప్తంగా జూన్ 23 (మంగళవారం) నుండి రుతుపవనాలు మళ్లీ చురుగ్గా కదలనున్నట్లు న్యూఢిల్లీలోని ఐఎండీ తెలిపింది.

నైరుతి రుతుపవనాలు

జూన్ 23 నాటికి నైరుతి రుతుపవనాలు తెలంగాణలోని మరికొన్ని ప్రాంతాలతో పాటు ఒడిశా, జార్ఖండ్, బీహార్, ఛత్తీస్‌గఢ్‌లోని కొన్ని ప్రాంతాల్లోకి విస్తరించే అవకాశం ఉందని ఐఎండీ వాతావరణ బులిటెన్‌లో పేర్కొంది.

ఐఎండీ న్యూఢిల్లీ తాజా బులిటెన్ల ప్రకారం.. రుతుపవనాలు తిరిగి పుంజుకోవడానికి, రాబోయే 4 నుండి 5 రోజుల్లో రాష్ట్రంలోని మిగిలిన ప్రాంతాలకు విస్తరించడానికి వాతావరణ పరిస్థితులు అనుకూలంగా మారాయి. ప్రస్తుతం రుతుపవనాల ఉత్తర పరిమితి హైదరాబాద్, భద్రాచలం పరిసరాల్లోనే స్థిరంగా కొనసాగుతుండగా, వాతావరణ పరిస్థితుల్లో స్పష్టమైన మార్పు రాబోతోందని శాస్త్రవేత్తలు అంచనా వేస్తున్నారు.

జూన్ 21 నుండి విస్తారంగా వర్షాలు

ప్రస్తుతం రాష్ట్రంలో అక్కడక్కడా కురుస్తున్న వర్షాలు.. జూన్ 21 నుండి భారీగా వర్షాలు కురుస్తాయని ఐఎండీ అంచనా వేసింది. జూన్ 21 నుండి తెలంగాణలోని పలు ప్రాంతాల్లో ఇవి విస్తారమైన వర్షాలు ఉంటాయి. జూన్ 23 (మంగళవారం) నాటికి రుతుపవనాలు మరింత బలోపేతమై, రాష్ట్రవ్యాప్తంగా విస్తరించి, ఇంకా కొనసాగుతున్న వేసవి వేడి నుండి ఎంతో ఉపశమనాన్ని కలిగిస్తాయని ఐఎండీ తెలిపింది.

తగ్గనున్న ఉష్ణోగ్రతలు.. రానున్న చల్లని గాలులు

రుతుపవనాల పునఃప్రారంభానికి మద్దతుగా వాతావరణంలో ఉష్ణోగ్రతలు తగ్గడం ప్రారంభమవుతుంది. జూన్ 19 (శుక్రవారం) నుండి గరిష్ట ఉష్ణోగ్రతలు క్రమంగా 2 డిగ్రీల సెల్సియస్ నుండి 3 డిగ్రీల సెల్సియస్ వరకు తగ్గే అవకాశం ఉందని ఐఎండీ అంచనా వేసింది. జూన్ నెలలో వడగాల్పులకు కారణమైన పొడి గాలి వెనక్కి తగ్గి, దాని స్థానంలో తేమతో కూడిన చల్లని గాలులు వీస్తాయి.

జూన్ 18 నుండి 20 వరకు తెలంగాణలో అక్కడక్కడా వర్షాలు కురిసే అవకాశం ఉంది. జూన్ 21 నుండి తెలంగాణలోని అన్ని ప్రాంతాలలో విస్తారంగా వర్షాలు కురిసే అవకాశం ఉంది. తెలంగాణలో అక్కడక్కడా ఉరుములు, మెరుపులతో పాటు గంటకు 40-50 కిలోమీటర్ల వేగంతో (గరిష్టంగా 60 కిలోమీటర్ల వేగంతో) ఈదురు గాలులు వీచే అవకాశం ఉందని ఐఎండీ న్యూఢిల్లీ స్పష్టం చేసింది.