భవన నిర్మాణాలకు ఊరట: ఫైర్ ఎన్‌ఓసీ నిబంధనల్లో తెలంగాణ అగ్నిమాపక శాఖ కీలక మార్పులు

తెలంగాణలో ప్రొవిజనల్ ఫైర్ ఎన్‌ఓసీల జారీకి సంబంధించి అగ్నిమాపక శాఖ కీలక మార్పులు చేసింది. నివాస సముదాయాల ఎత్తు పరిమితి పెంపుతో పాటు బిల్డర్లకు సులభతర నిబంధనలను అందుబాటులోకి తీసుకొచ్చింది.

హైదరాబాద్: రాష్ట్రంలో భవనాల భద్రత, నిర్మాణ రంగానికి ఊరటనిచ్చేలా తెలంగాణ ఫైర్, డిజాస్టర్ రెస్పాన్స్, ఎమర్జెన్సీ అండ్ సివిల్ డిఫెన్స్ డిపార్ట్‌మెంట్ ప్రొవిజనల్ ఫైర్ అభ్యంతరం లేని పత్రాల (ఎన్‌ఓసీ) జారీ నిబంధనలను సవరించింది. అగ్నిప్రమాదాల నివారణ మరియు ప్రాణరక్షణ చర్యలను మరింత సమర్థవంతంగా అమలు చేస్తూనే, అనుమతుల ప్రక్రియను సరళతరం చేయడమే లక్ష్యంగా ఈ కొత్త మార్పులు తీసుకొచ్చారు.

భవన నిర్మాణాలకు ఊరట: ఫైర్ ఎన్‌ఓసీ నిబంధనల్లో తెలంగాణ అగ్నిమాపక శాఖ కీలక మార్పులు

నిర్మాణ రంగానికి స్పష్టమైన మార్గదర్శకాలు

అగ్నిమాపక సేవల శాఖ డైరెక్టర్ జనరల్ విక్రమ్ సింగ్ మాన్ ఈ మేరకు నూతన మార్గదర్శకాలను విడుదల చేశారు. రియల్ ఎస్టేట్ రంగానికి చెందిన క్రెడాయ్ (CREDAI), తెలంగాణ బిల్డర్స్ ఫెడరేషన్ ప్రతినిధులతో నిర్వహించిన విస్తృత సంప్రదింపుల అనంతరం ఈ నిర్ణయం తీసుకున్నారు. అక్టోబర్ 7 నుంచే ఈ కొత్త నిబంధనలు అమల్లోకి వచ్చాయి. అక్టోబర్ 7 లేదా ఆ తర్వాత అందిన కొత్త ప్రొవిజనల్ ఫైర్ ఎన్‌ఓసీ దరఖాస్తులకు మాత్రమే ఇవి వర్తిస్తాయని అధికారులు స్పష్టం చేశారు.

నూతన నిబంధనల్లో ప్రధాన మార్పులు ఇవే..

మార్గదర్శకాల ప్రకారం నివాస భవనాలకు సంబంధించిన ఫైర్ ఎన్‌ఓసీ నిబంధనల్లో ప్రధాన సవరణలు చేశారు.

ఎత్తు పరిమితి పెంపు: గతంలో 18 మీటర్లు అంతకంటే ఎక్కువ ఎత్తు ఉన్న నివాస అపార్ట్‌మెంట్లకు ఫైర్ ఎన్‌ఓసీ తప్పనిసరిగా ఉండేది. ప్రస్తుత సవరణల ప్రకారం ఈ పరిమితిని 24 మీటర్లకు పెంచారు. ఇతర రకాల భవన నిర్మాణాలకు పాత నిబంధనలే కొనసాగుతాయి.

ఫైర్ టవర్: భవనం రకంతో సంబంధం లేకుండా 24 మీటర్లు, అంతకంటే ఎక్కువ ఎత్తు ఉండే ప్రతి నిర్మాణానికి 'ఫైర్ టవర్' ఏర్పాటు చేయడం తప్పనిసరి.

ఫైర్ కమాండ్ సెంటర్: 24 మీటర్లు అంతకంటే ఎక్కువ ఎత్తు ఉన్న అన్ని రకాల భవనాల్లోనూ 'ఫైర్ కమాండ్ సెంటర్' గదిని నిర్మించాలి.

డీజిల్ జెనరేటర్ గదుల వెంటిలేషన్: బేస్‌మెంట్లలో ఉండే డీజిల్ జెనరేటర్ (డీజీ) గదుల వెంటిలేషన్ కోసం కనీసం ఒక మీటరు ఎత్తు ఉన్న ఫైర్ రేటెడ్ గోడ పైన లూవర్లను (Louvres) ఏర్పాటు చేయడానికి అనుమతించారు. అయితే ఆ గోడకు కనీసం రెండు గంటల పాటు మంటలను తట్టుకునే (2-hour Fire Resistance rating) సామర్థ్యం ఉండాలి.

అనుమతుల ప్రక్రియ వేగవంతం

రాష్ట్రవ్యాప్తంగా భవన నిర్మాణాల్లో అగ్నిప్రమాద నివారణ, ప్రాణరక్షణ చర్యలు పక్కాగా అమలుకావడంతో పాటు అనుమతుల జారీలో సరళమైన విధానాన్ని తీసుకురావడమే ఈ సవరణల ముఖ్య ఉద్దేశమని అగ్నిమాపక శాఖ వెల్లడించింది. దీనివల్ల భవన నిర్మాణదారులకు స్పష్టమైన, ఏకరూప మార్గదర్శకాలు అందుబాటులోకి రానున్నాయి.